Read Lampung Api YAKOBUS 2 Bible Online

YAKOBUS 2 - Lampung Api bible

YAKOBUS 2

¹Puari-puariku! Sebagai jelma sai percaya jama Tuhan Isa Almasih, Tuhan Sai Mahamulia, dang keti ngebida-bidako jelma bedasarko hal-hal laher.

²Mani kik wat sai jelma batin makai ali-ali emas rik kawai helau ratong mik pertemuanmu, raduni ratong muneh sai jelma jerih makai kawai cabik-cabik,

³maka keti lebih ngehormati jelma sai bekawai helau udi. Keti cawa jama ia, “Silakan Bapak mejong di kursi sai paling helau inji.” Kidang jama jelma sai mejerih keti cawa, “Cecokdo di dudi,” atau “Mejongdo di lantai di dija.”

⁴Jama bebuat injuk reno, keti nyani perbidaan di hantara peperda keti rik menilai jelma bedasarko pikeran sai jahat.

⁵Ingok, Puari-puari sai tecinta! Jelma sai mejerih di dunia inji, dipilih Allah untuk jadi jelma sai batin delom iman. Jelma-jelma udi haga jadi anggota umat-Ni Allah injuk sai dijanjiko Allah jama jelma sai ngasihi Ia.

⁶Kidang keti malah ngehina jelma mejerih, padahal jelma-jelma batindo sai nindas keti rik nyiret keti mik pengadilan.

⁷Tiando sai ngehina gelar sai tehormat sai keti terima jak Allah!

⁸ Keti ngelakuko sai benor, kik keti ngelaksanako hukum Kerajaan sai wat delom ayat Alkitab inji, “Cintaido peperda keti injuk niku mencintai dirimu tenggalan.”

⁹Kidang kik keti ngebida-bidako jelma bedasarko hal-hal laher, keti bedusa, rik hukum Allah nyatako bahwa ketido pelanggar hukum.

¹⁰Jelma sai ngelanggar salah sai jak hukum-hukum-Ni Allah, retini ngelanggar sunyinni.

¹¹ Mani sai cawa, “Dang bezinah,” iado juga sai cawa “Dang ngebunuh.” Jadi, kik keti mak bezinah, kidang ngebunuh, maka ketido pelanggar hukum juga.

¹²Cawado rik betindakdo sebagai jelma sai haga diadili nutuk hukum-Ni Allah sai memerdekako manusia.

¹³Mani Allah mak haga nunjukko rasa kesian jama jelma sai mak kenal jama rasa kesian. Kidang rasa kesian lebih kuat jak hukuman!

¹⁴Puari-puari! Api gunani ulun-ulun cawa, “Nyak jelma sai percaya”, kik ia mak nunjukko perbuatanni? Dapok kedo iman injuk reno udi nyelamatkoni?

¹⁵Seandaini sai puari bakas atau puari bebai memerluko kawai rik mak ngedok cukup kanikan untuk serani-rani.

¹⁶Api gunani keti cawa jama ia, “Selamat makai kawai sai handop rik selamat mengan!” — kik keti mak ngeniko jama ia api sai diperlukoni untuk hurik?

¹⁷Injuk reno juga jama iman, kik mak dinyatako jama perbuatan, maka iman udi mak ngedok gunani.

¹⁸Halokni wat sai cawa, “Wat jelma sai besandar jama imanni rik wat muneh sai besandar jama perbuatanni.” Nyak haga ngejawab, “Tunjukkodo jama nyak injuk repa jelma dapok ngedok iman tanpa perbuatan rik nyak haga nunjukko jama perbuatan bahwa nyak ngedok iman.”

¹⁹Keti percaya bahwa Allah angkah sai, kan? Nah, ruh-ruh jahat pun percaya rik tian gegoran kerabaian!

²⁰Keti bugu nihan! Api perlu dibuktiko jama niku bahwa mak ngedok gunani ngedok iman tanpa perbuatan?

²¹ Liak gaoh Abraham nenek muyang ram. Ia diterima betik ulih-Ni Allah mani perbuatanni, yakdo waktu ia mempersembahko Ishak, anakni, jama Allah di atas mezbah.

²²Di dija jelasdo bahwa iman harus ditunjukko jama perbuatan in jadi sempurna.

²³ Udi nutuk ayat Alkitab inji, “Abraham percaya jama Allah, rik ulih imanni udi Allah nerimani sebagai jelma sai ngelakuko kehaga-Ni Allah.” Udi sebabni Abraham disebut, “Kantik-Ni Allah.”

²⁴Jelasdo tano, bahwa jelma diterima betik ulih-Ni Allah mani api sai dilakuko ulih jelma udi, rik lain angkah mani imanni gaoh.

²⁵ Liak juga Rahab, bebai lacor udi. Ia diterima betik ulih-Ni Allah mani perbuatanni, yakdo waktu ia nerima di delom lambanni mata-mata bangsa Israel rik nulung tian lijung liwat renglaya bareh.

²⁶Nah, injuk repa badan tanpa ruh iado badan sai mati, injuk reno juga iman tanpa perbuatan iado iman sai mati.