Read Lampung Api YAKOBUS 5 Bible Online

YAKOBUS 5 - Lampung Api bible

YAKOBUS 5

¹Puari-puari, jelma-jelma mebatin! Dengiko petuahku. Hagani keti miwang rik bebatui mani keti haga menderita sengsara!

² Kebatinanmu radu busuk. Kawaimu radu dikanik anai-anai.

³Emas rik perakmu radu disalok karat; karatni haga jadi saksi ngelawan keti rik haga nganik bela badanmu injuk apui. Keti radu nimbun harta pada waktu ngeredik akher zaman.

⁴ Keti mak ngebayar upah jelma-jelma sai beguai di kebunmu. Tano dengiko keluhan tian! Jelma-jelma sai ngumpulko hasil kebunni, mekik ngilu tulung rik pekik tian radu sampai di cuping-Ni Allah, Tuhan Sai Mahakuasa.

⁵Keti radu hurik mewah rik ngerasako kesenangan di dunia inji. Keti seolah-olah sedang ngegemukko diri untuk rani penikolan.

⁶Keti ngehukum rik ngebunuh jelma-jelma sai mak besalah, rik tian mak ngelawan keti.

⁷Ulihni seno, sabardo Puari-puariku, sampai Tuhan ratong. Liakdo injuk repa sabarni sai jelma petani nunggu sampai tanohni ngeniko hasil sai berega jama ia. Ia sabar nunggu labung musim gugor rik labung musim kumbang.

⁸Hagani keti juga besabar rik berbesar hati, mani rani ratongni Tuhan radu redik.

⁹Dang ngomel rik saling nyalahko, in keti mak dihukum ulih-Ni Allah. Ingok! Hakim radu redik, siap untuk ratong.

¹⁰Puari-puari ingokdo para nabi sai cawa atas gelar-Ni Tuhan. Tian sabar rik tabah menderita. Jadi, akukdo tian sebagai cuntoh.

¹¹ Tian disebut bebahagia mani tian tabah. Keti radu ngedengi tentang kesabaranni Ayub, rik keti pandai injuk repa Tuhan pada akherni ngeberkati ia. Mani Tuhan mudah kesian nihan rik betik hati.

¹² Sai mula-mula nihan, iado: Dang besumpah, baik demi langit, maupun demi bumi atau demi api pun gaoh. Ucakko gaoh “Ya” kik maksudmu ya, rik “Mawat” kik maksudmu mawat; in keti dang dikeni hukuman ulih-Ni Allah.

¹³Kik di hantaramu wat sai lagi susah, hagani ia bedua. Kik wat sai riang, hagani ia nyanyi memuji Allah.

¹⁴ Kik wat sai meruyuh, hagani ia ngurau jelma-jelma sai mimpin jemaah. Rik hagani jelma-jelma sai mimpin udi ngeduako jelma sai meruyuh udi rik ngolesko jama minyak atas gelar-Ni Tuhan.

¹⁵Kik dua tian disampaiko jama yakin, Tuhan haga ngunyaiko jelma sai meruyuh udi, rik ngampuni dusa-dusa sai radu disanini.

¹⁶Ulihni seno, hagani keti saling ngakui kesalahan rik saling ngeduako, in keti dimunyaiko. Dua jelma sai nutuk kehaga-Ni Allah, ngedok kuasa sai balak.

¹⁷ Elia jama-jama manusia injuk ram. Ia temon-temon bedua in labung mak ratong, maka labung pun mak ratong selama telu setengah tahun.

¹⁸ Kak raduni ia bedua lagi, raduni langit ngeratongko labung sehingga tanoh ngeniko hasilni muneh.

¹⁹Puari-puariku! Kik di hantaramu wat sai jelma sai mak nutuk lagi ajaran jak Allah, raduni sai jelma bareh nyani jelma udi muloh jama Allah,

²⁰ ingokdo ayat inji: Jelma sai nyani ulun bedusa muloh jak jalan sai salah, jelma udi nyelamatko jiwa ulun bedusa udi jak kematian rik nyebabko lamon dusa diampuni. Hormat sekam, Yakobus