Read Lampung Api 1 PETRUS 1 Bible Online

1 PETRUS 1 - Lampung Api bible

1 PETRUS 1

¹Puari-puari umat pilihan-Ni Allah, sai tesebar di perantauan di daerah Pontus, Galatia, Kapadokia, Asia rik Bitinia! Nyak, Petrus rasul-Ni Isa Almasih, ngeharap in Allah ngeni berkat rik sejahtera jama niku belimpah-limpah. Keti dipilih jadi umat-Ni Allah nutuk rencana-Ni Allah Bapa. Rik Ruh-Ni Allah radu ngejadiko keti umat sai kudus, khusus untuk Allah, in keti taat jama Isa Almasih rik disuciko ulih rah-Ni.

³Ijado ram besyukor jama Allah, Bapa Tuhan ram Isa Almasih! Ia mengasihi ram nihan, udi sebabni Ia ngeniko jama ram hurik sai ampai, jama ngehurikko luot Isa Almasih jak kematian. Inji ngeniko ram harapan sai kuat.

⁴Ram ngeharap ngedok berkat-berkat sai disediako Allah bagi umat-Ni, yakdo berkat-berkat sai disegokko-Ni di surga, sehingga mak dapok cadang, atau jadi busuk ataupun mesuh.

⁵Sunyinni anodo untuk niku, mani keti percaya jama Allah. Maka keti dijaga jama kuasa-Ni Allah in keti nerima keselamatan sai siap dinyatako di akher zaman kanah.

⁶Ulihni seno hagani keti besenang hati, walaupun tano untuk sementara waktu keti harus jadi sedih mani keti ngalami lamon macam cubaan.

⁷Tujuanni iado untuk ngebuktiko api keti temon-temon percaya jama Tuhan atau mawat. Emas sai dapok cadang pun, diuji jama apui. Nah, iman keti lebih berega jak emas, jadi harus diuji in jadi kuat. Rik jama injuk reno keti haga dipuji rik dihormati rik dilanggarko di rani Isa Almasih ratong luot.

⁸Keti mengasihi Ia, walaupun tumbai keti mak ngeliak Ia. Rik percaya jama Ia walaupun tano keti mak ngeliak Ia. Udi sebabni keti riang, rik ngerasako sukacita sai agung rik mak dapok dicawako.

⁹Mani tujuan imanmu tecapai, yakdo keselamatan jiwamu.

¹⁰Keselamatan injido sai diteliti rik diselidiki ulih nabi-nabi, rik tian ngeramalko tentang berkat sai dikeniko Allah jama niku.

¹¹Tian nyelidiki injuk repa rik kapan hal ano haga tejadi; sai dimaksudko ulih Ruh-Ni Almasih sai wat di delom diri tian. Waktu seno Ruh-Ni menubuatko jama tian tentang penderitaan-penderitaan sai harus dialami ulih-Ni Almasih rik tentang keagungan-Ni sai haga nyusul radu jak seno.

¹²Untuk nabi-nabi ano Allah ngeni pandai bahwa api sai tian lakuko lain untuk kepentingan tian, melainko untuk niku; yakdo hal-hal sai tano inji keti dengi jelas jak jelma sai ngabarko Kabar Betik tentang Isa Almasih. Tian nyampaiko hal-hal ano jama niku jama kuasa Ruh-Ni Allah sai dikirim-Ni jak surga. Bahkan malaikat-malaikat pun mirak juga pandai kabar sai tian kabarko ano.

¹³Ulihni seno, hagani keti siap siaga. Waspadado rik ngeharapdo temon-temon jama berkat sai haga dikeniko jama niku waktu Isa Almasih ratong kanah.

¹⁴Taatdo jama Allah, rik dang hurik nutuk kemirakanmu tumbai, waktu keti masih makkung kenal jama Allah.

¹⁵Sebalikni, hagani keti suci delom sunyin hal sai keti lakuko, gegoh injuk Allah sai ngurau keti ano suci.

¹⁶ Delom Alkitab tetulis, “Hagani niku suci, mani Nyak suci.”

¹⁷Keti nyebut Allah udi Bapa waktu keti bedua jama Ia. Nah, Allah udido sai ngehakimi manusia nutuk perbuatan masing-masing untuk sapa gaoh. Ulihni seno selama keti masih wat di dunia inji, hagani keti ngagungko Allah delom hurikmu.

¹⁸Keti pandai api sai radu dibayarko untuk ngebebasko keti jak kehurikan sai sia-sia sai diwarisko ulih nenek muyangmu. Bayaranni lain hak sai hal sai dapok cadang injuk perak atau emas,

¹⁹melainko sai hal sai berega nihan; yakdo diri Almasih tenggalan, sai jadi sebagai biri-biri sai dikurbanko jama Allah tanpa cacat atau cela.

²⁰Almasih dipilih ulih-Ni Allah semakkung dunia diciptako. Rik waktu rani-rani redik akher zaman inji, Ia ratong mik dunia in keti diselamatko.

²¹Liwat Iado keti percaya jama Allah sai radu ngehurikko Ia luot jak kematian rik ngagungko Ia. Jadi, Allahdo sai keti percayai rik jama Allahdo juga keti ngepikko harapan.

²²Mani keti taat jama ajaran jak Allah, maka keti ngecahko diri rik keti mengasihi jelma-jelma seiman secara ikhlas. Ulihni seno, hagani keti mengasihi peperda sai bareh jama sepenuh hati.

²³Mani liwat sabda-Ni Allah sai hurik rik sai abadi udi, keti radu dijadiko manusia ampai sai lain hak laher jak manusia, melainko jak Bapa sai abadi.

²⁴ Delom Alkitab tetulis injuk reji, “Sunyin manusia injuk jukuk, rik sunyin kebalakanni injuk kumbang jukuk. Jukuk layu, kumbang pun gugor;

²⁵kidang sabda-Ni Tuhan tetap untuk selama-lamani.” Sabda ano Kabar Betik sai radu dikabarko jama niku.