Read Lampung Api 1 PETRUS 2 Bible Online

1 PETRUS 2 - Lampung Api bible

1 PETRUS 2

¹Ulihni seno, tokko jak dirimu sunyin sai jahat; dang lagi bebuhung, dang icak-icak. Dang sesera, rik dang ngehina ulun bareh.

²Hagani keti jadi injuk upi sai ampai laher, risok mahu jama susu rohani sai murni. Jama injuk reno keti haga tuoh rik diselamatko.

³ Di delom Alkitab tetulis injuk reji, “Niku radu ngerasako tenggalan hara betikni Tuhan.”

⁴Ulihni seno, ratongdo jama Tuhan. Ia bagaiko batu sai hurik, batu sai ditokko ulih manusia mani dianggap mak beguna; kidang sai dipilih ulih-Ni Allah sebagai batu sai berega.

⁵Keti injuk batu-batu sai hurik. Ulihni seno hagani keti haga dipakai untuk ngebangun Lamban Ibadah sai rohani. Jama injuk reno keti jadi imam-imam, sai hurik khusus untuk Allah, rik sai liwat Isa Almasih mempersembahko jama Allah, kurban rohani sai bekenan di hati-Ni Allah.

⁶ Mani di delom Alkitab tetulis injuk reji, “Nyak radu milih batu berega, sai Kupikko di Sion sebagai batu sai mula-mula; rik jelma sai percaya jama Ia mak haga dikecewako.”

⁷ Batu ano berega nihan untuk keti sai percaya. Kidang bagi jelma-jelma sai mak percaya, belakukodo ayat-ayat Alkitab untuk reji, “Batu sai mak dipakai ulih tukang-tukang bangunan udi ternyata jadi batu sai mula-mula,”

⁸ rik “Udido batu sai nyani jelma tehantuk, batu sai nyani tian tumbak.” Tian tehantuk mani tian mak percaya jama cawa-Ni Allah. Injuk renodo radu ditantuko Allah tentang tian.

⁹ Kidang keti yakdo bangsa sai tepilih, imam-imam sai ngelayani raja, bangsa sai kudus, khusus untuk Allah, umat-Ni Allah tenggalan. Allah milih keti rik ngurau keti luah jak kekelaman untuk kuruk mik delom terang-Ni sai gemilang, jama maksud in keti nyebarko kabar tentang perbuatan-perbuatan-Ni sai luar biasa.

¹⁰ Tumbai keti lain umat-Ni Allah, kidang tano keti umat-Ni Allah. Tumbai keti mak dikasihani Allah, kidang tano keti nerima rasa kesian-Ni.

¹¹Puari-puari sai tecinta! Keti yakdo ulun asing rik perantau di dunia inji. Ulihni seno nyak ngilu nihan in keti dang nutuk hawa nafsu manusia sai selalu beperang ngelawan jiwa.

¹²Kelakuanmu di hantara jelma sai mak kenal jama Tuhan harus betik nihan, sehingga kik tian ngefitnah keti sebagai ulun jahat, tian harus ngakui perbuatanmu sai betik, sehingga tian haga memuji Allah di rani Ia ratong.

¹³Demi Tuhan, hagani keti tunduk jama unggal jelma sai nguasai manusia: baik jama Kaisar sai jadi jelma sai bekuasa sai mula-mula,

¹⁴maupun jama gubernur sai ditunjuk ulihni Kaisar untuk ngehukum jelma sai ngelakuko sai jahat rik untuk ngehormati jelma sai ngelakuko sai betik.

¹⁵Mani Allah haga in jama perbuatan-perbuatanmu sai betik keti nyalok banguk jelma sai cawa bugu.

¹⁶Hagani keti hurik sebagai jelma merdeka, kidang dangdo memakai kemerdekaanmu ano untuk nyalok kejahatan, melainko hurikdo sebagai jelma sai ngebantu Allah.

¹⁷Hargaido sunyin jelma, kasihido puari-puarimu peperda jelma Kristen. Rabaido jama Allah, rik hormatido Kaisar.

¹⁸Puari-puari sai jadi jelma sai ngelayani, tundukdo jama majikanmu sehormat-hormatni; lain angkah jama tian sai betik hati rik peramah, kidang juga jama tian sai kejam.

¹⁹Allah haga ngeberkati keti, kik keti ulihni sadar jama kehaga-Ni Allah, sabar menderita perlakuanni sai mak adil.

²⁰Sebab api istimewani kik keti sabar menderita hukuman sai seharusni keti tanggung mani besalah? Kidang kik keti sabar nanggung penderitaan sai ditanggungmu mani bebuat sai benor, maka Allah haga ngeberkatimu.

²¹Untuk senodo Allah nguraumu. Mani Almasih tenggalan radu menderita untuk niku, rik injuk reno Ia ngeniko jama niku suatu teladan, in keti nutuk jejak-Ni.

²² Ia mak pernah nyani dusa, rik mak pernah sai jelma pun ngedengi Ia bebuhung.

²³ Waktu Ia dicaci maki, Ia mak ngebalos jama caci maki. Sewaktu Ia menderita, Ia mak ngancam; Ia angkah nyerahko perkara-Ni jama Allah, Hakim sai adil udi.

²⁴ Almasih tenggalan mikul dusa-dusa ram pada diri-Ni di atas kayu salib, in ram bebas jak kekuasaan dusa, rik hurik nutuk kehaga-Ni Allah. Katan-katan-Ni Almasihdo sai ngunyaiko keti.

²⁵Tumbai keti injuk biri-biri sai sesek, kidang tano keti radu diusung muloh untuk nutuk Gembala rik Jelma Sai Melihara jiwamu.