Read Lampung Api 2 PETRUS 3 Bible Online

2 PETRUS 3 - Lampung Api bible

2 PETRUS 3

¹Puari-puariku sai tecinta! Injido suratku sai kerua untuk niku. Di delom kerua surat inji, nyak berusaha ngebangkitko pikeran-pikeran sai murni jama niku.

²Nyak nganjurko in keti ingok jama cawa-cawa sai tumbai diucakko ulih-ulih nabi-Ni Allah, rik perintah jak Tuhan, Raja Penyelamat, sai disampaiko jama niku liwat rasul-rasul.

³ Mula-mula, keti harus pandai bahwa pada rani-rani akher, haga muncul jelma-jelma sai hurikni dikuasai ulih hawa nafsu tian tenggalan. Tian haga ngehina keti

⁴jama cawa injuk reji, “Cawani Tuhan bejanji haga ratong! Tano di dipa Ia? Bapak-bapak leluhur ram radu mati, kidang sunyinni masih gegoh gaoh injuk semenjak terciptani alam!”

⁵ Tian sengaja mak haga ngaku bahwa tumbai Allah nyiptako langit rik bumi atas sabda-Ni. Bumi Ia jadiko jak way, rik jama way,

⁶ rik jama way juga — yakdo way jak banjer balak — dunia purbakala udi dibinasako.

⁷Kidang langit rik bumi sai wat tano inji, dipelihara ulih-Ni sabda Allah udi juga untuk dimusnahko jama apui kanah. Tano langit rik bumi masih dipelihara sampai pada rani jelma-jelma sai jahat dihukum rik dibinasako.

⁸ Kidang puari-puariku, sai hal inji dang keti lupako: bahwa delom pemandangan-Ni Tuhan, sai rani mak ngedok bidani jama seribu tahun — kerua-ruani gegoh gaoh bagi Ia.

⁹Tuhan mak melali ngeniko api sai radu Ia janjiko walaupun wat sai nyangko injuk reno. Sebalikni, Ia sabar tehadap niku, mani Ia mak haga sai jelma pun binasa. Ia mirak in sunyinni jelma betubat jak dusa-dusani.

¹⁰ Kidang Rani ratong-Ni Tuhan haga sampai injuk pemaling. Pada Rani seno langit haga lebon jama bunyi gemuruh, rik benda-benda di langit haga musnah tesuah, rik bumi jama sunyin sai wat di delomni haga lebon.

¹¹Mani sunyinni ano haga dihancorko jama cara injuk reno, injuk repa seharusni keti hurik? Keti harus hurik suci rik khusus untuk Allah,

¹²selama keti nunggu rik niramko ratong-Ni Rani Allah. Pada Rani seno langit bela tesuah, rik ulihni panasni, maka benda-benda di langit haga jadi cair.

¹³ Kidang ram nunggu api sai radu dijanjiko Allah, yakdo langit sai ampai rik bumi sai ampai, di dipa wat keadilan.

¹⁴Ulihni seno, Puari-puari sai tecinta, sementara keti nunggu Rani seno, berusahado temon-temon untuk hurik suci rik tanpa cela di hadap-Ni Allah. Rik peliharado hubungan sai betik jama Allah.

¹⁵Anggapdo kesabaran-Ni Tuhan ram sebagai kesempatan sai Ia keniko jama niku in dapok selamat. Paulus, puari ram sai tecinta, radu nulis sai injuk reno juga jama niku. Ia nulis ano jama kebijaksanaan sai dikeniko Allah jama ia.

¹⁶Delom sunyinni suratni, Paulus selalu nulis tentang hal seno. Sangun wat pira-pira hal sai payah dipahami delom surat-suratni ano. Rik bagian seno diputarbalikko ulih jelma-jelma sai mak pandai api-api rik sai mak kuat imanni. Hal ano mak ngehiranko, mani bagian-bagian lain jak Alkitab diperlakuko reno juga ulih tian. Api sai tian lakuko ano angkah ngakibatko kehancoran tian tenggalan.

¹⁷Kidang keti, Puari-puari sai tecinta, radu pandai tentang hal seno. Ulihni seno waspadado, dang sampai keti teusung mik delom kesesekan jelma-jelma bejat sehingga keti tumbak jak rang cecokmu sai kuat.

¹⁸Hagani keti makin ngerasako rahmat-Ni Isa Almasih, Tuhan rik Raja Penyelamat ram, rik hagani keti juga makin kenal jama Ia. Terpujido Ia, tano rik sampai selama-lamani! Amin. Hormat sekam, Petrus