Read Lampung Api 1 YOHANES 1 Bible Online

1 YOHANES 1 - Lampung Api bible

1 YOHANES 1

¹ Isi surat inji tentang Sabda sai ngeni hurik, yakdo Sabda sai radu wat radu jak mula-mula. Sekam radu ngedengini, rik radu ngeliakni jama mata sekam tenggalan. Sekam radu ngeliakni, rik radu nyatingni jama culuk sekam.

² Waktu hurik udi dinyatako, sekam ngeliakni. Udi sebabni sekam ngeni kesaksian tentang ia. Sekam ngabarko jama keti tentang hurik sejati rik kekal, sai wat jejama Bapa, rik sai radu dinyatako jama sekam.

³Api sai radu sekam liak rik dengi, udido juga sai radu sekam kabarko jama keti, in keti jejama sekam nutuk ngehayati hurik besatu jama Bapa, rik jama Anak-Ni Isa Almasih.

⁴Sekam nulis inji in hati ram temon-temon riang.

⁵Injido kabar sai radu sekam dengi jak Anak-Ni rik sai sekam sampaiko jama keti: Allah anodo terang, rik jama Ia mak ngedok kekelaman sama sekali.

⁶Kik ram cawa bahwa ram hurik besatu jama Ia, padahal ram hurik delom kekelaman, maka ram bebuhung baik jama cawa-cawa maupun jama perbuatan.

⁷Kidang kik ram hurik di delom terang injuk repa Allah wat di delom terang, maka ram hurik akrab, rukun peperda tian, rik rah-Ni Isa, Anak-Ni, ngecahko ram jak sunyin dusa.

⁸Kik ram cawa bahwa ram mak bedusa, ram nipu diri tenggalan; rik Allah mak tinggal di delom hati ram.

⁹Kidang kik ram ngakui dusa-dusa ram jama Allah, Ia haga nepati janji-Ni rik ngelakuko api sai adil. Ia haga ngampuni dusa-dusa ram rik ngecahko jak sunyin perbuatan ram sai salah.

¹⁰Kidang kik ram cawa bahwa ram mak bedusa, ram nyangko seolah-olah Allah pembuhung rik ram mak nyegokko cawa-Ni Allah di hati ram.