Read Lampung Api 1 YOHANES 2 Bible Online

1 YOHANES 2 - Lampung Api bible

1 YOHANES 2

¹Anak-anakku! Nyak nulis sinji jama keti in keti dang nyani dusa. Kidang kik wat sai nyani dusa, maka ram ngedok jelma sai ngebela, yakdo Isa Almasih sai adil ano, Ia haga ngilu nihan untuk ram di hadap Bapa.

²Liwat perantaraan Isa Almasih udido dusa-dusa ram diampuni. Rik lain hak dusa-dusa ram gaoh, melainko dusa sunyin manusia juga.

³Kik ram taat jama perintah-perintah-Ni Allah, udi tandani bahwa ram kenal jama Allah.

⁴Jelma sai cawa, “Nyak kenal jama Allah”, kidang mak taat jama perintah-perintah-Ni, jelma udi pembuhung, rik Allah mak tinggal di delom hatini.

⁵Kidang jelma sai taat jama cawa-Ni Allah, jelma udi sempurna mengasihi Allah. Udi tandani bahwa hurik besatu jama Allah.

⁶Sapa gaoh sai cawa bahwa ia hurik besatu jama Allah, ia harus hurik nutuk jejak Almasih.

⁷ Puari-puari sai tecinta! Sai kutulis inji lain hak suatu perintah sai ampai. Inji perintah saka sai radu disampaiko jama niku radu jak keti mulai percaya jama Almasih; yakdo kabar jak Allah sai radu keti dengi semakkungni.

⁸Walaupun injuk reno, perintah sai kutulis inji ampai juga; mani kebenoranni dapok diliak pada diri-Ni Almasih rik pada diri keti. Mani kekelaman semakin lebon rik terang sai benor radu mulai besinar.

⁹Jelma sai cawa bahwa ia tinggal di delom terang kidang jelma udi masih nyuohko puarini, jelma udi masih tinggal delom kekelaman sampai tano.

¹⁰Jelma sai mengasihi puarini, hurik delom terang sehingga mak ngedok sai pun jama ia sai haga nyebabko jelma bareh kuruk delom dusa.

¹¹Kidang jelma sai nyuohko puarini, wat delom kekelaman. Ia lapah delom kekelaman, rik mak pandai dipa ia mik, mani kekelaman udi nyani ia mak dapok ngeliak.

¹²Nyak nulis jama niku, Anak-anak, mani dusamu radu diampuni mani Almasih.

¹³Nyak nulis jama niku, Bapak-bapak, mani keti kenal jama Ia sai radu wat radu jak mula-mula. Nyak nulis jama niku, Jelma-jelma ngura, mani keti radu ngalahko Si Jahat.

¹⁴Nyak nulis jama niku, Anak-anak, mani keti kenal jama Allah Bapa. Nyak nulis jama niku, Bapak-bapak, mani keti kenal jama Sabda sai radu wat radu jak mula-mula. Nyak nulis jama niku, Jelma-jelma ngura, mani keti kuat. Cawa-Ni Allah wat di delom hatimu, rik keti radu ngalahko Si Jahat.

¹⁵Dang mencintai dunia inji atau api gaoh sai wat di delom dunia inji. Kik keti mencintai dunia, keti mak mencintai Bapa.

¹⁶Sunyin hal sai wat di delom dunia inji — sai dimirakko ulih tabiatni manusia sai bedusa, sai diliak raduni dimirakko rik sai dibangga-banggako — sunyinni anodo hal-hal sai mak asalni jak Bapa, melainko jak dunia.

¹⁷Dunia rik sunyin hal di delomni sai dimirakko ulihni manusia, lagi lebon. Kidang jelma sai nutuk kehaga-Ni Allah tetap hurik sampai selama-lamani.

¹⁸Anak-anakku, akher zaman radu redik! Radu dikeni pandai jama niku semakkungni bahwa Musuh-Ni Almasih haga ratong; rik tano radu muncul lamon jelma sai memusuhi Almasih. Udi tandani bahwa akher zaman radu redik.

¹⁹Musuh-musuh-Ni Almasih udi iado jelma-jelma sai radu ninggalko ram, mani tian sebenorni sangun lain jelma-jelma ram. Kik tian jelma-jelma ram, tantu tian tetap jejama ram. Kidang tian ninggalko ram, in jelas bahwa mak sai jelma pun jak tian sai benor-benor kuruk golongan ram.

²⁰Kidang keti radu nerima Ruh-Ni Allah sai dicurahko ulih-Ni Isa Almasih rik udi sebabni niku sunyinni kenal jama ajaran sai benor.

²¹Jadi nyak nulis inji jama niku lain hak mani keti mak kenal jama ajaran sai benor, kidang malah mani keti radu kenal jama ia, rik keti juga pandai bahwa mak ngedok buhung delom ajaran sai benor udi.

²²Sai bebuhung iado jelma sai cawa bahwa Isa laindo Raja Penyelamat sai dijanjiko Allah. Jelma udi Musuh-Ni Almasih; ia mak ngakui Bapa maupun Anak.

²³Jelma sai mak ngakui Anak retini mak nerima Bapa juga. Rik jelma sai ngakui Anak, retini nerima Bapa juga.

²⁴Ulihni seno, kabar sai radu keti dengi radu jak keti mula-mula percaya harus keti jaga betik-betik di delom hati. Kik kabar udi keti perhatiko betik-betik, keti haga selalu hurik besatu jama Anak rik jama Bapa.

²⁵Rik injido sai dijanjiko Almasih tenggalan jama ram: hurik sejati rik kekal.

²⁶Nyak nulis inji jama niku tentang jelma sai sedang berusaha nipu keti.

²⁷Kidang tentang keti tenggalan, Almasih radu mencurahko Ruh-Ni jama niku. Rik selama Ruh-Ni wat jama niku, mak perlu wat jelma bareh untuk ngajar keti. Mani Ruh-Ni ngajar keti tentang sunyin hal; rik api sai diajarko-Ni udi benor, lain buhung. Ulihni seno, hagani keti taat jama api sai diajarko ulih-Ni Ruh udi, rik hagani keti tetap hurik besatu jama Almasih.

²⁸Jadi, anak-anakku, tetapdo hurik besatu jama Almasih, in kanah waktu Ia ratong, ram ngehadap Ia jama bani nihan, rik mak segok mani meliom.

²⁹Keti radu pandai bahwa Almasih hurik nutuk kehaga-Ni Allah. Ulihni seno keti harus pandai muneh bahwa unggal jelma sai hurik nutuk kehaga-Ni Allah iado anak-Ni Allah.