Read Lampung Api 1 YOHANES 4 Bible Online

1 YOHANES 4 - Lampung Api bible

1 YOHANES 4

¹Puari-puariku sai tecinta! Dangdo percaya jama sunyin jelma sai ngaku ngedok Ruh-Ni Allah, kidang ujido pai untuk ngemandai api ruh sai wat jama tian udi asalni jak Allah atau lain. Mani lamon nabi palsu radu bekeliaran mik dipa-dipa.

²Injuk rejido carani keti pandai api udi Ruh-Ni Allah atau lain: Jelma sai ngakui bahwa Isa Almasih ratong mik dunia sebagai manusia, jelma udi ngedok Ruh sai ratong jak Allah.

³Kidang jelma sai mak ngakui hal inji tentang Isa, mak ngedok Ruh-Ni Allah. Jelma udi ngedok ruh jak Musuh-Ni Almasih. Puari radu ngedengi bahwa ruh udi haga ratong, rik tano ia radu wat delom dunia inji.

⁴Kidang anak-anakku, keti kedau-Ni Allah. Keti radu ngalahko nabi-nabi palsu, mani Ruh sai wat jama niku lebih bekuasa jak ruh sai wat jama jelma-jelma kedauni dunia inji.

⁵Nabi-nabi palsu udi cawa tentang hal-hal dunia, rik dunia ngedengi cawa tian, mani tian kedauni dunia.

⁶Kidang ram iado anak-anak-Ni Allah; rik jelma sai kenal jama Allah, ngedengi cawa ram. Jelma sai kedau Allah, mak ngedengi cawa ram. Renodo carani ngemandai perbidaan hantara Ruh sai ngeni ajaran sai benor, rik ruh sai nyesekko.

⁷Puari-puari sai tecinta! Ijado ram mengasihi peperda ram, mani kasih asalni jak Allah. Jelma sai mengasihi, iado anak-Ni Allah rik ia kenal jama Allah.

⁸Jelma sai mak mengasihi, mak kenal jama Allah; mani Allah iado kasih.

⁹Allah nyatako bahwa Ia mengasihi ram jama mengutus Anak-Ni sai tunggal mik delom dunia in ram dapok hurik liwat Anak-Ni udi.

¹⁰Injido kasih: Lain ram sai radu mengasihi Allah, kidang Allah sai mengasihi ram rik ngutus Anak-Ni in liwat Ia ram mansa pengampunan dusa-dusa.

¹¹Puari-puari sai tecinta, kik Allah reno mengasihi ram, ram pun harus mengasihi peperda ram.

¹² Mak sai jelma pun sai pernah ngeliak Allah, kidang kik ram saling mengasihi, Allah besatu jama ram rik kasih-Ni jadi sempurna delom diri ram.

¹³Ulih-Ni Allah radu ngeniko jama ram Ruh-Ni, maka ram pandai bahwa ram radu hurik besatu jama Allah, rik Allah hurik besatu jama ram.

¹⁴Sekam tenggalan radu ngeliak Anak-Ni Allah, rik sekam ngabarko bahwa Ia diutus ulih-Ni Bapa untuk jadi Raja Penyelamat dunia inji.

¹⁵Sapa gaoh sai ngakui bahwa Isa ano Anak-Ni Allah, Allah hurik besatu jama jelma udi, rik jelma udi pun hurik besatu jama Allah.

¹⁶Ram tenggalan pandai rik percaya jama kasih-Ni Allah jama ram. Allah udi kasih. Jelma sai hurikni dikuasai ulih kasih, ulun udi besatu jama Allah, rik Allah besatu jama ia.

¹⁷Kasih dijadiko sempurna delom diri ram, in ram ngedok kebanian pada Rani Pengadilan. Ram haga ngedok kebanian, mani hurik ram di dunia inji gegoh injuk hurik-Ni Almasih.

¹⁸Jelma sai ngerasako kasih-Ni Allah, mak kenal jama sunyin rasa rabai; mani kasih sai sempurna ngelebonko sunyin rasa rabai. Jadi nyatado bahwa jelma makkung ngerasako kasih-Ni Allah jama sempurna kik jelma udi merabai ngehadapi Rani Pengadilan.

¹⁹Ram mengasihi, mani Allah lebih mena mengasihi ram.

²⁰Kik sai jelma cawa, “Nyak mengasihi Allah”, kidang ia mak mengasihi puarini, jelma udi buhung. Mani jelma sai mak kenal jama puarini sai diliakni, mak mungkin dapok mengasihi Allah sai mak diliakni.

²¹Ulihni seno inji perintah sai dikeni Almasih jama ram: Sapa gaoh sai mengasihi Allah harus mengasihi puarini juga.