Read Lampung Api 2 YOHANES 1 Bible Online

2 YOHANES 1 - Lampung Api bible

2 YOHANES 1

¹Untuk Emak sai dipilih ulih-Ni Allah, rik untuk anak-anakni Emak. Surat inji jak nyak, jelma sai mimpin jemaah sai temon-temon mencintai keti. Lain angkah nyak, kidang sunyin jelma sai kenal jama Allah sai benor, mencintai keti juga.

²Mani Allah tinggal delom hati ram, rik haga selalu wat jama ram selama-lamani.

³Semoga ram dikeni berkat, rahmat rik sejahtera ulih-Ni Allah Bapa, rik Isa Almasih Anak-Ni Bapa udi. Semoga sunyinni ano ram ngedok hati sai tulus rik kasih.

⁴Nyak riang nihan ngemandai bahwa wat anak-anakni Emak sai hurik nutuk ajaran-Ni Allah, injuk sai radu diperintahko Allah Bapa jama ram.

⁵ Ulihni seno, Emak, nyak ngilu nihan in ram sunyinni saling mengasihi. Sai kukemukako inji lain hak suatu perintah sai ampai; perintah inji radu dikeniko jama ram radu jak mula-mula percaya.

⁶Mengasihi retini hurik nutuk perintah-perintah-Ni Allah. Rik perintah sai keti radu dengi radu jak mula-mula iado bahwa keti haga hurik jama mengasihi peperda sai bareh.

⁷Lamon jelma sai nipu radu menyebar mik seluruh dunia. Tian anodo jelma-jelma sai mak ngakui bahwa Isa Almasih ratong mik dunia sebagai sai manusia. Jelma injuk reno iado jelma sai nipu, rik Musuh-Ni Almasih.

⁸Ulihni seno, jagado dang sampai keti kelebonan api sai radu sekam usahako untuk keti. Berusahado in keti nerima jak Allah upahmu seluruhni.

⁹Jelma sai mak nyating jama ajaran-Ni Almasih, melainko menyimpang jak api sai diajarko ulih-Ni Almasih, jelma udi mak ngedok Allah. Jelma sai tetap di delom ajaran Almasih, retini ngedok baik Allah Bapa maupun Anak.

¹⁰Ulihni seno, kik wat jelma ratong rik ngabarko jama niku ajaran sai mak diajarko Almasih, dang nerima jelma udi di delom lambanmu atau ngeni salam jama ia.

¹¹Mani jelma sai ngeni salam jama jelma sai injuk reno nutuk juga jejama jelma ano delom ngelakuko sai jahat.

¹²Lamon nihan sai perlu kukeni pandai jama niku, kidang rasani lebih betik dang liwat surat. Nyak ngeharap dapok napol rik cawa tenggalan jama keti, in hati ram temon-temon riang.

¹³Anak-anak jak puari bebai jak Emak sai juga dipilih Allah, ngirim salam jama Emak.