Read Lampung Api WAHYU 11 Bible Online

WAHYU 11 - Lampung Api bible

WAHYU 11

¹ Radu jak seno nyak dikeni sepotong kayu sai mirip sebatang tungkok pengukor, raduni diperintahko, “Mikdo ngukor Lamban Ibadah rik mezbah. Hitungdo pira lamon jelma sai beibadah di delomni.

² Kidang dangdo ngukor tengebah sai di kebelah luah Lamban Ibadah udi, mani bagian udi radu diserahko jama jelma-jelma sai mak kenal jama Tuhan. Tian haga ngilik-ilikko kota sai suci udi selama epak puluh rua bulan.

³Nyak haga ngutus rua jelma saksi-Ku sai makai kawai bekabung, rik tian haga ngumumko kabar-Ni Allah selama 1.260 rani.”

⁴ Rua saksi udi iado rua batang zaitun rik rua cukut lampu sai wat di hadap-Ni Tuhan semesta alam.

⁵Kik jelma nyuba ngelakuko sai hal sai mak mebetik tehadap tian, maka jak banguk tian luahdo apui sai ngebinasako musuh-musuhni. Jama cara injuk reno, sunyinni jelma sai haga nyakikko tian haga tebunuh.

⁶ Tian ngedok kuasa untuk nyalok langit in dang ratong labung selama tian ngumumko kabar jak Allah. Tian ngedok juga kuasa atas sunyin mata way, untuk ngubah way jadi rah. Rik tian ngedok muneh kuasa untuk mukul bumi jama sunyin macam bencana, kapan gaoh tian haga ngelakukoni.

⁷ Radu jak tian selesai ngabarko kabar tian, binatang sai luah jak rulah maut haga ngelawan tian. Ia haga ngalahko rik ngebunuh tian.

⁸ Rik mayat tian haga tehamper di renglaya kota balak, di dipa Tuhan tian disalibko. Gelar kiasan kota udi iado Sodom atau Mesir.

⁹Jelma-jelma jak sunyin negara, suku, bahasa, rik bangsa haga ngeliak mayat tian selama telu setengah rani, rik mak ngizinko mayat-mayat udi dikubor.

¹⁰Penduduk bumi haga riang atas kematian kerua saksi udi. Tian haga ngerayakoni rik saling ngirim hadiah, mani kerua nabi udi radu ngeratongko lamon siksaan jama sunyin jelma di bumi.

¹¹ Radu jak telu setengah rani, ratongdo napas hurik jak Allah rik kuruk lagi mik delom kerua nabi udi. Tian pun minjak cecok, sehingga sunyin jelma sai ngeliak tian jadi rabai nihan.

¹² Kak raduni kerua nabi udi ngedengi suara keras sai ngurau tian jak surga, “Ijado cakak mik dija!” Raduni di hadap mata musuh-musuh tian, tian pun cakak mik surga, disalok ulih awan.

¹³ Maka waktu udi tejadido kukuk sai dasyat. Sepersepuluh bagian kota udi hancor, rik pitu ribu jelma tiwas ulihni kukuk udi. Jelma-jelma barehni jadi rabai nihan, raduni tian memuji keagungan-Ni Allah di surga.

¹⁴Celaka sai kerua radu liu. Kidang liakdo! Celaka sai ketelu serebok lagi nyusul.

¹⁵ Raduni malaikat kepitu nyebu trumpetni, maka di surga kedengian suara-suara kuat nihan sai cawa, “Kekuasaan untuk memerintah dunia wat tano delom culuk-Ni Tuhan ram rik Raja Penyelamat sai dijanjiko-Ni. Ia haga memerintah untuk selama-lamani!”

¹⁶Maka kerua puluh epak jelma sai mimpin sai mejong di takhta tian di hadap-Ni Allah, tesungkor rik nyumbah Allah.

¹⁷Tian cawa, “Tuhan, Allah Mahakuasa, sai wat rik sai radu wat! Sekam beterima kasih jama Niku mani Niku radu makai kuasa-Mu sai balak, rik radu mulai memerintah!

¹⁸ Jelma-jelma sai mak kenal jama Tuhan, ngamuk mani radu waktuni Niku ngelampiasko kebutongan-Mu, rik radu muneh saatni Niku ngadili jelma-jelma mati. Injido waktuni untuk ngeni upah jama jelma-jelma sai ngebantu-Mu, para nabi, rik jama sunyin umat-Mu, yakdo sunyin jelma sai beibadah jama Niku, balak ataupun lunik. Injido waktuni untuk ngehancorko jelma-jelma sai ngehancorko bumi!”

¹⁹ Maka tebukakdo Lamban Ibadah di surga, rik keliakando Peti Perjanjian di delomni. Raduni tejadido kilat sabung-menyabung rik suara guntor bebunyi rik bergelegar, rik kukuk rik labung es sai kedok.