Read Lampung Api WAHYU 12 Bible Online

WAHYU 12 - Lampung Api bible

WAHYU 12

¹Raduni keliakan di langit sai hal sai aneh rik luar biasa. Sai bebai sai memakai matarani sebagai kawaini, lagi cecok di atas bulan. Di uluni wat sai mahkota sai terdiri jak rua belas bintang.

²Bebai udi sedang ngandung, rik mani radu waktuni untuk nganak, maka ia mekik kesakikan.

³ Raduni keliakan muneh di langit sai hal sai aneh. Wat sai ulai naga suluh sai balak nihan sai ngedok pitu ulu rik puluh tungkah. Unggal uluni makai sai mahkota.

⁴ Jama gundangni ia nyiret sepertelu jak bintang-bintang di langit rik nayarkoni mik bumi. Naga udi cecok di hadap bebai sai haga nganak udi jama maksud ngebelot anakni, reno ia laher.

⁵ Raduni bebai udi nganakko sai anak bakas sai haga memerintah sunyin bangsa jama tungkok besi. Kidang sanak udi dirampas jak bebai udi, raduni diusung jama Allah rik mik hadap takhta-Ni.

⁶Maka bebai udi tegar mik padang gurun, mik rang sai radu disediako ulih-Ni Allah bagi ia. Di rang udi ia haga dipelihara 1.260 rani sakani.

⁷ Raduni di surga tejadi peperangan. Mikhael jejama malaikat-malaikatni beperang ngelawan naga udi. Rik ulai naga udi pun, sai dibantu ulih malaikat-malaikatni, ngelawan Mikhael.

⁸Kidang ulai naga udi dikalahko. Ia rik malaikat-malaikatni mak diizinko tinggal lagi di surga.

⁹ Ulai naga sai balak udi ditokko di luah! Iado ulai tuha udi sai gelarni iblis atau Ruh Jahat, sai nipu seluruh dunia. Ia ditokko mik bumi jama sunyinni malaikatni.

¹⁰ Raduni nyak ngedengi suara sai keras di surga cawa, “Tanodo waktu-Ni Allah nyelamatko umat-Ni! Tano Allah nunjukko kuasa-Ni sebagai Raja! Tano Raja Penyelamat sai dijanjiko udi juga nunjukko kekuasaan-Ni! Mani sai nuduh puari-puari ram di hadap-Ni Allah di rani rik di bingi, radu di luahko jak surga.

¹¹Puari-puari ram radu ngalahko ia jama rah Anak Biri-biri udi, rik jama kabar benor jak Allah sai tian kabarko. Tian rila ngurbanko nyawa tian sampai mati.

¹²Ulihni seno, hagani surga rik sunyin sai tinggal di delomni, beriang-riang! Kidang celakado bumi rik laok, mani iblis radu regah jama niku jama butong balak nihan, mani ia pandai bahwa waktuni tinggal cutik lagi.”

¹³Waktu ulai naga udi sadar bahwa ia radu ditokko mik bumi, ia mulai ngebedak bebai sai nganakko sanak bakas udi.

¹⁴ Kidang bebai udi dikeni rua kepi burung rajawali sai balak, in ia hambor mik rangni di padang gurun, di dipa ia haga dipelihara selama telu setengah tahun, tehindar jak serangan naga.

¹⁵Maka ulai naga udi nyemborko jak bangukni lamon nihan way mik arah bebai udi, untuk ngehanyutkoni.

¹⁶Kidang bumi ngebantu bebai udi; bumi ngebukak bangukni rik ngebelot way sai luah jak banguk ulai naga udi.

¹⁷Ulai naga udi jadi butong nihan jama bebai udi, sehingga ia mik nyerbu keturunan sai bareh jak bebai udi, yakdo sunyin jelma sai mentaati perintah-perintah-Ni Allah, rik sai ngeni kesaksian tentang Isa rik kuasa-Ni.

¹⁸Raduni ulai naga udi cecok di pantai.