Read Lampung Api WAHYU 13 Bible Online

WAHYU 13 - Lampung Api bible

WAHYU 13

¹ Kak raduni nyak ngeliak sai binatang muncul jak delom laok. Ia ngedok puluh tungkah rik pitu ulu. Di unggal tungkahni wat sai mahkota, rik di unggal uluni tetulis sai gelar sai hina tehadap Allah.

² Binatang sai kuliak udi rupani injuk macan tutul, rik culukni injuk cukut beruang, rik muncungni injuk muncung singa. Raduni binatang udi dikeni ulih ulai naga udi kekuatanni tenggalan, rik takhtani, rik kekuasaan sai balak.

³Sai di hantara kepitu ulu jak binatang udi keliakanni injuk katan parah nihan, kidang katan udi radu munyai. Seluruh bumi nutuk binatang udi jama rasa takjub.

⁴Rik tian memuja ulai naga udi mani ia radu ngeniko kuasani jama binatang udi. Rik tian memuja binatang udi juga. Tian cawa, “Mak ngedok sai gegoh jama binatang inji! Mak wat sai dapok beperang melawan ia!”

⁵ Binatang udi diperkenanko ngucakko hal-hal sai pungah nihan rik ngehina Allah. Ia ngasi memerintah epak puluh rua bulan sakani.

⁶Raduni ia mulai ngehina Allah, rik gelar Allah. Reno muneh rang tinggal Allah, rik sunyin sai tinggal di surga pun dihinani.

⁷ Ia ngasi juga ngelawan umat-Ni Allah rik ngalahko tian. Rik kuasa atas sunyin suku, negara, bahasa, rik bangsa dikeniko jama ia.

⁸ Binatang udi haga disumbah ulih sunyin jelma sai hurik di atas bumi, kecuali jelma-jelma sai gelarni radu terdaptar semakkung dunia diciptako, di delom buku jelma hurik kedau Anak Biri-biri sai radu ditikol.

⁹Ulihni seno, kik keti sanggup ngedengi, dengiko kabar inji:

¹⁰ “Jelma sai haga ditawan, pasti haga ditawan. Rik jelma sai haga dibunuh jama pedang, pasti harus dibunuh jama pedang. Udido sebabni umat-Ni Allah harus tabah rik setia.”

¹¹Raduni nyak ngeliak sai binatang bareh muncul jak delom bumi. Ia ngedok rua tungkah injuk tungkah anak biri-biri. Suarani injuk suara ulai naga.

¹²Di hadap binatang sai mula-mula udi ia makai kuasa sai balak sai didapokni jak binatang udi juga. Seluruh bumi rik sunyin sai tinggal di atasni, dipaksani nyumbah binatang sai mula-mula udi, sai katan parahni radu munyai.

¹³Binatang sai kerua udi nyani keanehan-keanehan sai balak. Di hadap sunyin jelma ia nyani apui regah jak langit mik bumi.

¹⁴Rik sunyin jelma sai hurik di bumi ditipuni jama keanehan-keanehan sai ngasi disanini di hadap binatang sai mula-mula udi. Rik tian sunyinni dikayunni ngediriko sai patung jak binatang sai radu dikatanko ulih pedang, kidang tetap hurik.

¹⁵Binatang sai kerua udi ngasi ngeni nyawa jama patung udi, sehingga patung udi dapok cawa rik ngebunuh sunyin jelma sai mak haga nyumbahni.

¹⁶Sunyinni jelma, balak rik lunik, mebatin rik mejerih, budak rik jelma bebas, dipaksa ulih binatang udi untuk nerima tanda di culuk kanan tian atau di tagak tian.

¹⁷Mak sai jelma pun dapok ngebeli atau ngejual sai hal, kik ia mak ngedok tanda udi, yakdo gelar binatang udi tenggalan, atau angka sai nyatako gelar udi.

¹⁸Di dija perlu wat hikmat. Jelma sai bijaksana dapok ngitung reti jak angka binatang udi, mani angka udi iado gelar sai manusia. Angkani iado 666.