Read Lampung Api WAHYU 15 Bible Online

WAHYU 15 - Lampung Api bible

WAHYU 15

¹Kak raduni nyak ngeliak di langit sai hal sai aneh rik luar biasa hibatni. Wat pitu malaikat jama pitu bencana sai paling akher. Injido sai paling akher Allah ngeluahko butong-Ni.

²Radu jak seno nyak ngeliak sai hal sai keliakanni injuk laok kaca becampor apui. Nyak ngeliak juga jelma-jelma sai radu menang atas binatang rik patungni, rik menang atas jelma sai gelarni jama angka. Jelma-jelma sai menang udi cecok di pingger laok kaca sambil nyating kecapi sai dikeniko ulih-Ni Allah jama tian.

³ Rik tian nyanyiko nyanyian Musa, jelma sai ngebantu Allah, rik nyanyian Anak Biri-biri. Injuk reji bunyini, “Tuhan, Allah Mahakuasa, hara balak rik anehni perbuatan-perbuatan-Mu! Raja sunyin bangsa, hara adil rik benor tindakan-tindakan-Mu!

⁴ Sapa sai mak merabai jama Niku, Tuhan? Sapa sai mak haga ngabarko keagungan-Mu. Niku gaohdo sai suci. Sunyin bangsa haga ratong nyumbah Niku mani tindakan-tindakan-Mu sai adil radu diliak ulih sunyin jelma.”

⁵ Radu jak seno nyak ngeliak Lamban Ibadah di surga tebukak, rik Kemah Tuhan wat di delomni.

⁶Raduni kepitu malaikat jama kepitu bencana udi luah jak Lamban Ibadah. Kawai tian jak kain linen sai mekecah rik bekilauan. Rik tian makai salok dada sai disani jak emas.

⁷Raduni jak salah sai jak keepak makhluk udi ngeni jama kepitu malaikat udi pitu cumbung emas sai latap jama butong-Ni Allah, — Allah sai hurik selama-lamani.

⁸ Maka Lamban Ibadah udi latap jama hasok jak keagungan rik kuasa-Ni Allah. Rik selama kepitu bencana sai diusung ulih kepitu malaikat udi makkung berakher, mak ngedok sai jelma pun sai dapok kuruk mik delom Lamban Ibadah.