Read Lampung Api WAHYU 16 Bible Online

WAHYU 16 - Lampung Api bible

WAHYU 16

¹Raduni nyak ngedengi suara keras jak delom Lamban Ibadah cawa jama kepitu malaikat udi, “Mikdo rik nuangko isi kepitu cumbung butong-Ni Allah udi mik atas bumi!”

² Malaikat mula-mula mik rik nuangko isi cumbungni mik bumi. Maka timbuldo mesunuk-mesunuk sai hibat rik perih nihan jama sunyinni jelma sai ngedok tanda binatang udi, rik di jelma-jelma sai nyumbah patungni.

³Radu jak seno malaikat kerua nuangko isi cumbungni mik laok. Maka way laok pun injuk rah jelma mati, rik matido sunyin makhluk sai hurik di laok.

⁴ Kak raduni malaikat sai ketelu nuangko isi cumbungni mik way-way rik mik mata-mata way, maka sunyinni wayni jadi rah.

⁵Nyak ngedengi malaikat sai bekuasa atas way cawa, “Hukuman sai Niku keniko adil, ya Mahasuci, Allah sai wat, rik sai radu wat.

⁶Tian radu nuangko rah umat-Ni Allah rik rah nabi-nabi; tano Niku nyani tian nginum rah. Sangun wajardo udi untuk tian!”

⁷Raduni nyak ngedengi suara jak mezbah cawa, “Tuhan, Allah Mahakuasa, benor rik adildo hukuman-hukuman sai Niku keniko!”

⁸Radu jak seno malaikat keepak nuangko isi cumbung mik matarani, maka matarani pun ngasi ngemutungko manusia jama panasni sai hibat nihan.

⁹Manusia dimutungko ulih panas terikni, rik tian ngutuk gelar Allah, sai bekuasa atas bencana-bencana seno. Walaupun injuk reno, tian mak haga betubat jak dusa-dusa tian rik mak haga memuji kemuliaan Allah.

¹⁰ Raduni malaikat kelima nuangko isi cumbungni mik takhta binatang udi. Maka sunyin kerajaan binatang udi jadi kelam, rik manusia ngegigik ema mani kesakikan.

¹¹Raduni tian ngutuk Allah di surga mani tian kesakikan rik mani mesunuk-mesunuk tian. Kidang tian mak juga betubat jak perbuatan-perbuatan tian sai jahat.

¹² Radu jak seno malaikat keenam nuangko isi cumbungni mik Way Efrat sai balak udi. Maka way udi menyangu sehingga raja-raja jak timur dapok ngeliwatini.

¹³Radu jak nyak ngeliak telu ruh jahat sai rupani injuk kemincak. Masing-masing kemincak udi luah jak banguk ulai naga, jak banguk binatang, rik jak banguk nabi palsu.

¹⁴Tian iado ruh-ruh jahat sai nyani keanehan-keanehan. Ketelu ruh udi mik jama sunyin raja di seluruh dunia rik ngumpulko tian untuk betempur di Rani sai balak, yakdo Rani jak Allah Mahakuasa.

¹⁵ “Dengiko! Nyak ratong injuk maling! Bebahagiado jelma sai tetap waspada rik ngejaga kawaini, sehingga ia mak lapah riluk rik jadi meliom di hadap umum!”

¹⁶ Kak raduni ruh-ruh udi ngumpulko raja-raja udi di rang sai delom bahasa Ibrani digelarko Harmagedon.

¹⁷Radu jak seno malaikat kepitu nuangko isi cumbungni mik udara. Maka kedengian suara sai keras jak takhta di Lamban Ibadah, sai cawa, “Radu selesai!”

¹⁸ Raduni tejadido kilat sabung-menyabung rik suara guntor bebunyi rik bergelegar, rik kukuk sai dasyat. Mak pernah tejadi kukuk gegoh seno radu jak manusia diciptako. Injido kukuk sai paling dasyat!

¹⁹ Kota sai balak udi pecoh jadi telu bagian, rik hancor juga kota-kota sunyin negara di dunia. Raduni Allah ingok jama Babel sai balak udi. Maka Allah nyani ia nginum anggor jak rang anggor-Ni Allah — yakdo anggor butong-Ni sai meluap-luap.

²⁰ Sunyin pulau lebon, rik sunyin gunung pun lebon.

²¹ Labung es balak, sai masing-masing biakni lima puluh kilogram, gugor jak langit nimpa jelma-jelma. Maka tian ngutuk Allah mani bencana labung es sai dasyat udi.