Read Lampung Api WAHYU 18 Bible Online

WAHYU 18 - Lampung Api bible

WAHYU 18

¹Radu jak seno nyak ngeliak sai malaikat bareh regah jak surga. Ia ngedok kuasa sai balak, rik semarakni nyani seluruh bumi jadi terang.

² Jama suara sai keras, ia beseru, “Radu runtuh! Babel balak radu runtuh! Tano ia jadi rangni sitan-sitan rik ruh jahat. Di delomni hurik sunyin macam burung sai ngejijikko rik sai dinyuohko jelma.

³ Mani sunyin bangsa radu nginum anggor nafsu perbuatan hajor. Raja-raja dunia bebuat hajor jama ia, rik jelma-jelma sai bedagang di bumi jadi mebatin ulih nafsuni sai mak dapok dikendaliko udi.”

⁴ Raduni nyak ngedengi suara bareh jak surga cawa, “Luahdo, umat-Ku! Luahdo jak delomni! Dangdo keti nutuk dusa-dusani, rik nutuk nanggung hukumanni!

⁵ Mani dusani betumpuk-tumpuk sampai di langit, rik Allah ingok kejahatanni.

⁶ Perlakukodo ia injuk ia radu memperlakuko keti; balosdo ia rua kali lipat untuk sunyin sai radu dilakukoni. Isido cumbungni jama inuman sai rua kali lebih keras jak inuman sai disediakoni untuk keti.

⁷ Keniko jama ia penderitaan rik duka cita sai gegoh lamonni jama kebesaran rik kemewahan sai dikenikoni jama dirini tenggalan. Mani ia selalu gaoh cawa jama dirini, ‘Nyak inji ratu sai memerintah! Nyak lain randa; nyak mak haga ngalami kesedihan!’

⁸Ulihni hal udido, maka delom sai rani gaoh ia haga ditimpa bencana — penyakik, kesedihan, rik kebetohan. Rik ia haga dimutungko jama apui, mani bekuasado Tuhan Allah sai ngehakimi ia udi.”

⁹ Raja-raja dunia sai nutuk delom perbuatan-perbuatan hajorni rik nafsu bebai udi haga ngehiwangi rik ngebatui kota udi kik tian ngeliak hasok mengepul jak apui sai ngemutungkoni.

¹⁰Tian haga cecok jak jaoh mani tian tekena penderitaanni. Tian cawa, “Adui, bukan main celakani kota sai temasyhur inji — kota Babel sai kuat! Delom sejam gaoh hukumanmu radu dilaksanako!”

¹¹ Jelma-jelma sai bedagang di bumi pun miwang rik bekabung mani bebai udi, mani mak ngedok sai jelma pun lagi sai ngebeli barang-barang dagangan tian.

¹² Mak ngedok sai ngebeli emas, perak, permata, rik mutiara tian; juga kain linen, kain ungu, sutra, rik kain suluh tuha; sunyin macam kayu sai jarang didapok, barang-barang jak gading rik kayu sai mahal-mahal, jak tembaga, besi, rik pualam;

¹³bawak kayu manis, rempah-rempah, setanggi, mur, rik kemiyan; anggor rik minyak, tepung rik gandum, jawi rik biri-biri, kuda rik kereta, jelma-jelma sai ngebantu, bahkan nyawa manusia pun.

¹⁴Jelma-jelma sai bedagang cawa jama bebai udi, “Sunyin sai niku mirak kedau radu mak ngedok lagi, rik sunyin kemewahan rik kementerenganmu radu lebon. Niku mak haga ngehaluni lagi!”

¹⁵ Jelma-jelma sai bedagang sai radu jadi mebatin mani jelma sai bedagang di kota udi haga cecok jak jaoh, mani tian rabai tekena penderitaanni. Tian haga miwang rik bekabung,

¹⁶raduni cawa, “Adui, bukan main celakani kota sai temasyhur inji! Biasani ia makai kain linen, kain ungu rik kain suluh tuha; biasani ia latap jama perhiasan emas, permata, rik mutiara!

¹⁷ Kidang delom sejam gaoh, ia radu kelebonan sunyin kebatinanni udi!” Sunyin nakhoda, penumpang, rik awak kapal, rik sunyin jelma sai mata pencaharianni di laok, cecok jak jaoh.

¹⁸ Rik mekik waktu tian ngeliak hasok mengepul jak apui sai nyuah kota udi. Tian beseru, “Mak pernah wat kota bareh injuk kota sai balak inji!”

¹⁹ Maka tian ngehamborko hambua di ulu tian sebagai tanda tian bekabung, raduni miwang rik mekik-mekik, “Adui, bukan main celakani kota balak inji! Kebatinanni radu nyani sunyin jelma sai ngedok kapal-kapal di laok jadi mebatin! Kidang delom sejam gaoh, ia radu kelebonan sunyinni!”

²⁰ Hai surga, besukariado atas kehancoran kota udi! Hai umat-Ni Allah, rasul-rasul, rik nabi-nabi, besukariado! Mani Allah radu ngehukum ia sebagai pembalosan tehadap api sai dilakukoni jama keti!

²¹ Radu jak seno sai malaikat sai perkasa ngiwakko sai batu — sebalak batu gilingan sai balak — raduni nayarko mik delom laok rik cawa, “Injuk rejido carani kota Babel sai temasyhur udi haga keras ditayarko sehingga mak haga ditunggai lagi.

²² Bunyi musik jak jelma sai main kecapi, jak jelma sai nyanyi, jak jelma sai main suling rik jelma sai nyebu trumpet, mak haga kedengian lagi di delom niku! Mak haga betungga juga sai jelma buruh ahli pun di dudi, rik suara batu penggilingan pun mak haga kedengian lagi.

²³Jelma mak haga ngeliak cahaya lampu di delommu; rik mak haga kedengian muneh keramikan pesta perkawinan di dudi. Jelma-jelma sai bedagang jak niku iado jelma-jelma sai paling terkemuka di bumi, rik jama ilmu-ilmu gaibmu niku tipu sunyin bangsa di dunia!”

²⁴ Babel dihukum mani di delom kota udi radu kedapokan rah nabi-nabi, rah umat-Ni Allah — singkatni rah sunyin jelma sai radu dibunuh di atas bumi!