Read Lampung Api WAHYU 20 Bible Online

WAHYU 20 - Lampung Api bible

WAHYU 20

¹Radu jak seno nyak ngeliak sai malaikat regah jak surga. Di culukni ia nyating kunci rulah maut rik sai pengikok sai balak.

² Raduni ia nangkok ulai naga udi, si ulai tuha, — yakdo iblis atau Ruh Jahat udi — rik ngikok untuk seribu tahun sakani.

³Kak raduni malaikat udi ngetokko ulai naga udi mik delom rulah maut, raduni ngunci rulah udi rik nyegelni, in ulai naga udi mak lagi dapok nipu bangsa-bangsa semakkung waktu seribu tahun udi bela. Radu jak seno ia dilepasko untuk waktu sai singkat.

⁴ Raduni nyak ngeliak takhta-takhta, rik jelma-jelma sai mejong di takhta-takhta udi dikeni kuasa untuk mutusko hukuman. Nyak ngeliak juga jiwa-jiwa jelma-jelma sai radu dipelok uluni mani tian ngeni kesaksian tentang Isa, rik nyebarko luhot jak Allah. Jelma-jelma udi mak nyumbah binatang, ataupun patungni. Tian pun mak pernah menerima tanda binatang udi di tagak atau culuk tian. Maka tian hurik luot rik memerintah sebagai raja jejama Almasih selama seribu tahun.

⁵Injido tahap mula-mula jelma-jelma mati dibangkitko luot. (Kidang jelma-jelma mati barehni mak dihurikko luot selama waktu seribu tahun udi.)

⁶Bebahagiado jelma-jelma sai nutuk dibangkitko luot pada tahap mula-mula udi. Tian layak jadi kedau-Ni Allah. Kematian tahap kerua mak bekuasa atas tian. Tian haga jadi imam-imam-Ni Allah rik imam-imam-Ni Almasih; rik tian haga memerintah jejama Ia seribu tahun sakani.

⁷Radu bela waktu seribu tahun udi, iblis haga dilepasko jak penjarani,

⁸ rik ia haga mik nipu bangsa-bangsa sai tesebar di seluruh dunia, yakdo Gog rik Magog. Iblis ngumpulko tian untuk beperang, suatu jumlah sai balak nihan, selamon heni di laok.

⁹Maka tian pun bepencar mik seluruh dunia, raduni ngepung perkemahan umat-Ni Allah rik kota sai dikasihi Allah. Kidang apui gugor jak langit rik memusnahko tian.

¹⁰Kak raduni iblis sai nipu tian udi, ditayarko mik delom laok apui rik belerang. Di dudido rangni binatang rik nabi palsu udi ditokko lebih mena. Tian haga disiksa di rani di bingi untuk selama-lamani.

¹¹ Radu jak seno nyak ngeliak sai takhta handak sai balak rik Ia sai mejong di atasni. Langit rik bumi lebon jak hadap-Ni, sehingga mak keliakan lagi.

¹²Rik nyak ngeliak jelma-jelma mati, balak lunik, cecok di hadap takhta udi. Maka buku-buku pun dibukakko. Raduni sai buku sai bareh dibukak, yakdo Buku Jelma Hurik. Kak raduni hukuman dikeniko mik atas ulun mati, setimpal jama perbuatan tian nutuk sai tecatat di delom buku-buku udi.

¹³Raduni laok nyerahko jelma-jelma mati sai wat di delomni. Maut rik Alam Maut pun nyerahko ulun-ulun mati sai wat jama ia. Rik ulun-ulun mati udi sunyinni dikeni hukuman setimpal jama perbuatan tian.

¹⁴Kak raduni Maut rik Alam Maut ditayarko mik delom laok apui. (Laok apui inji iado kematian tahap kerua.)

¹⁵Jelma-jelma sai mak tetulis gelarni di delom Buku Jelma Hurik, ditokko mik delom laok apui.