Read Lampung Api WAHYU 21 Bible Online

WAHYU 21 - Lampung Api bible

WAHYU 21

¹ Raduni nyak ngeliak langit sai ampai rik bumi sai ampai. Langit mula-mula rik bumi mula-mula pun lebon, rik laok lebon.

² Maka nyak ngeliak kota suci udi, yakdo Yerusalem sai ampai, regah jak surga jak Allah. Kota udi radu disiapko injuk sai kebayan didandani untuk nunggui kemantin.

³ Raduni nyak ngedengi suara jak takhta udi beseru keras, “Tano rang tinggal-Ni Allah yakdo jejama jama manusia! Ia haga hurik jama tian, rik tian haga jadi umat-Ni. Allah tenggalan haga wat jama tian rik jadi Allah tian.

⁴ Ia haga ngehapus sunyin way mata jak mata tian. Kematian haga mak ngedok lagi; kesedihan, hiwangan, atau kesakikan pun haga mawat muneh. Hal-hal sai saka radu lebon.”

⁵Raduni Ia sai mejong di atas takhta udi cawa, “Tano Nyak nyani sunyinni ampai!” Ia cawa juga jama nyak, “Tulisdo inji, mani cawa-cawa inji benor rik dapok dipercaya.”

⁶ Radu Ia cawa, “Radu selesai! Nyakdo sai mula-mula rik sai paling akher; Nyakdo Tuhan jak Mula-mula sampai Akher. Unggal jelma sai mahu, haga Kukeni nginum cuma-cuma jak sumber way sai ngeni hurik.

⁷ Jelma-jelma sai menang haga menerima hal-hal udi jak Nyak. Nyak haga jadi Allahni, rik ia jadi anak-Ku.

⁸Kidang jelma perabai, pengkhianat, jelma bejat, jelma sai ngebunuh, jelma hajor, jelma sai memakai ilmu-ilmu gaib, penyumbah berhala, rik sunyin pembuhung, haga ditokko mik delom laok apui rik belerang sai menyala-nyala, yakdo kematian tahap kerua.”

⁹Sai jak hantara kepitu malaikat sai radu nyating cumbung-cumbung sai latap jama kepitu bencana paling akher udi ratong jama nyak rik cawa, “Ija! Nyak haga nunjukko jama niku Pengantin, yakdo inggom Anak Biri-biri.”

¹⁰ Maka Ruh-Ni Allah nguasai nyak, rik malaikat udi ngusung nyak mik puncak gunung sai langgar nihan. Ia nunjukko jama nyak Yerusalem, kota suci udi, kota udi regah jak surga, jak Allah;

¹¹jama semarak rik keagungan-Ni Allah. Kota udi bekilauan injuk batu permata, injuk batu baiduri pandan sai bening injuk kristal.

¹² Sesai sekelilingni balak langgar, jama rua belas rangok gerbang, rik dijaga ulih rua belas malaikat. Di rangok-rangok gerbangni tetulis gelar-gelar kerua belas suku bangsa Israel.

¹³Wat telu rangok gerbang sai ngehadap mik unggal arah: telu di kebelah timur, telu di kebelah selatan, telu di kebelah utara, rik telu di kebelah barat.

¹⁴Sesai kota udi dibangun di atas rua belas batu pondasi. Pada batu-batu pondasi udi tetulis gelar-gelar kerua belas rasul-Ni Anak Biri-biri udi.

¹⁵ Malaikat sai cawa jama nyak udi ngedok tungkok pengukor jak emas, untuk ngukor kota udi, rangok-rangok gerbangni rik sesaini.

¹⁶Kota udi bebantuk persegi epak — kejung gegoh jama berakni. Maka malaikat udi ngukor kota udi jama tungkok pengukorni; ternyata kejungni 2.400 kilometer; berak rik langgarni gegoh injuk kejungni.

¹⁷Waktu malaikat udi ngukor sesaini, ternyata langgar sesai udi 60 meter. Ukoran sai dipakai ulih malaikat udi iado ukoran sai dipakai ulihni manusia.

¹⁸ Sesai kota udi disani jak batu baiduri pandan, sedangko kotani tenggalan jak emas murni, bening injuk kaca.

¹⁹Batu-batu pondasi kota udi dihias jama sunyin macam batu permata. Batu pondasi sai mula-mula disani jak batu baiduri pandan, sai kerua jak batu nilam, ketelu jak batu yakut, keepak jak batu zamrud,

²⁰kelima jak batu baiduri sepah, keenam jak batu delima, kepitu jak batu ratna cempaka, kewalu jak batu pirus, kesiwa jak batu topas, kepuluh jak batu krisopras, kesebelas jak batu lazuardi, rik sai kerua belas jak batu kecubung.

²¹Kerua belas rangok gerbangni jak kerua belas mutiara, masing-masing rangok disani jak sai mutiara. Renglaya di kota udi disani jak emas murni, bening injuk kaca sai mengkilap.

²²Nyak mak ngeliak Lamban Ibadah di delom kota udi, mani Lamban Ibadahni iado Tuhan tenggalan, Allah Sai Mahakuasa, rik Anak Biri-biri udi.

²³ Kota udi mak perlu disinari matarani atau bulan, mani keagungan-Ni Allah nyinarini, rik Anak Biri-biri udi yakdo lampuni.

²⁴ Bangsa-bangsa di dunia haga lapah di delom cahayani, rik raja-raja pun haga ngusung kebatinan tian mik delom kota udi.

²⁵ Rangok-rangok gerbang kota udi haga tebukak sepanjang rani; mak haga disalok, mani mak ngedok bingi di dudi.

²⁶Kebesaran rik kebatinan bangsa-bangsa haga diusung mik delom kota udi.

²⁷ Kidang jelma-jelma sai ngelakuko hal-hal sai ngejijikko, atau jelma-jelma sai bebuhung — singkatni api pun sai ngejijikko, sekali-kali mak haga kuruk delomni. Sai haga kuruk angkah jelma sai gelarni tetulis delom Buku Jelma Hurik, buku Anak Biri-biri udi.