Read Lampung Api WAHYU 22 Bible Online

WAHYU 22 - Lampung Api bible

WAHYU 22

¹ Malaikat udi juga nunjukko jama nyak way sai wayni ngeni hurik. Way udi gemerlapan injuk kristal rik ngaler jak takhtani Allah rik Anak Biri-biri udi,

² di tengah-tengah renglaya di kota udi. Di pingger way udi, di sebelah-menyebelahni wat batang sumber hurik, sai bebuah rua belas kali setahun, yakdo sekali sebulan. Bulungni dipakai untuk ngunyaiko bangsa-bangsa.

³ Di delom kota udi mak didapok sai hal pun sai kena kutuk-Ni Allah. Takhtani Allah rik Anak Biri-biri udi haga wat di delom kota. Jelma-jelma sai ngebantu-Ni haga bebakti jama Ia,

⁴rik ngeliak pudak-Ni. Gelar-Ni haga ditulis di tagak tian.

⁵ Tian mak haga memerluko lampu atau cahaya matarani, mani bingi mak ngedok lagi, rik Tuhan Allah tenggalan haga nerangi tian. Maka tian haga memerintah sebagai raja untuk selama-lamani.

⁶Raduni malaikat udi cawa jama nyak, “Cawa-cawa inji benor rik dapok dipercaya. Tuhan Allah sai ngeniko Ruh-Ni jama nabi-nabi, radu ngutus malaikat-Ni untuk nunjukko jama jelma-jelma sai ngebantu-Ni api sai geluk haga tejadi.”

⁷“Perhatikodo inji!” Cawa Isa, “Nyak haga geluk ratong. Bebahagiado jelma sai mentaati cawa-cawa nubuat delom buku inji.”

⁸Nyak, Yohanes, radu ngedengi rik ngeliak sunyinni inji. Radu jak nyak selesai ngedengi rik ngeliakni nyak tesungkor di hadap malaikat sai radu nunjukko sunyinni ano jama nyak, rik nyak haga nyumbah ia,

⁹kidang ia cawa jama nyak, “Dang! Dang nyumbah nyak! Sumbahdo Allah! Mani nyak pun jelma sai ngebantu injuk niku, rik injuk puari-puarimu para nabi rik sunyin jelma sai mentaati luhot-luhot delom buku inji!”

¹⁰Raduni ia cawa lagi, “Dangdo ngerahasiako cawa-cawa nubuat delom buku inji, mani radu redik waktuni sunyinni inji haga tejadi.

¹¹ Jelma sai jahat, tagando terus ngelakuko sai jahat, jelma sai ngejijikko, tagando ngejijikko dirini; jelma sai nutuk kehaga-Ni Allah, tagando terus nutuk kehaga-Ni Allah, rik jelma sai hurik khusus untuk Allah, tagando terus hurik untuk Allah.”

¹² “Perhatikodo inji!” ani Isa, “Mak mesaka lagi Nyak haga ratong jama ngusung upah untuk ngebalos unggal jelma nutuk api sai radu dilakukoni.

¹³ Nyakdo sai mula-mula rik sai paling akher; Nyakdo Tuhan jak Mula-mula sampai Akher.”

¹⁴ Bebahagiado jelma sai mepoh jubahni sampai mekecah sehingga tian berhak nganik uah jak batang kehurikan rik kuruk rik mik delom kota udi liwat gerbangni.

¹⁵Kidang jelma-jelma sai ngelakuko hal-hal sai keji, sai memakai ilmu-ilmu gaib, jelma-jelma sai ngelakuko perbuatan-perbuatan sai hajor, sai ngebunuh, sai nyumbah berhala rik jelma-jelma sai bebuhung, baik jama cawa-cawa ataupun jama perbuatan, sunyin jelma udi rangni di luah kota udi.

¹⁶ “Nyak, Isa, radu ngirim malaikat-Ku jama keti in ia ngeni pandai hal-hal inji untuk kepentingan jemaah-jemaah. Nyak inji keturunan Daud; Nyakdo bintang timur sai terang udi.”

¹⁷ Ruh-Ni Allah rik Kebayan cawa, “Ijado!” Unggal jelma sai ngedengi inji harus juga cawa, “Ijado!” Sapa sai mahu, hagani ia ratong! Rik sapa sai ngemirakko, hagani ia ngakuk way sai ngeni kehurikan udi jama cuma-cuma.

¹⁸ Untuk unggal jelma sai ngedengi cawa-cawa nubuat delom buku inji, nyak, Yohanes, ngeni peringatan inji: kik jelma nambahko sai hal di cawa-cawa nubuat inji, maka Allah haga nambahko hukuman jelma udi jama bencana-bencana sai dilukisko delom buku inji.

¹⁹Rik kik jelma ngurangi sai hal jak cawa-cawa nubuat inji, maka Allah juga haga ngurangi bagianni sai dilukisko delom buku inji — yakdo bagian jak batang kehurikan rik jak kota suci udi.

²⁰Ia sai nyampaiko sunyin kabar inji cawa, “Benor, Nyak haga geluk ratong!” Amin! Ratongdo, ya Tuhan Isa!

²¹Semoga Tuhan Isa ngeni berkat-Ni jama sunyin umat-Ni Allah!