Read Lampung Api WAHYU 3 Bible Online

WAHYU 3 - Lampung Api bible

WAHYU 3

¹“Untuk malaikat jemaah di Sardis, tulisdo injuk reji: Injido luhot jak Ia sai ngedok kepitu ruh jak Allah rik kepitu bintang udi. Nyak pandai api sai keti lakuko. Cawani keti hurik, padahal keti mati!

²Ulihni seno minjakdo, rik lakukodo api sai masih wat jama keti semakkung udi mati sama sekali. Mani Nyak ngehalu bahwa api sai keti lakuko, makkung sai pun sai sempurna di hadap-Ni Allah.

³ Jadi, ingokdo luot api sai radu diajarko jama niku tumbai rik sai radu keti dengi. Jalankodo udi rik betubatdo jak dusa-dusamu. Kik keti mak minjak, Nyak haga ratong jama niku injuk pemaling; rik keti mak haga pandai kapan waktuni Nyak ratong.

⁴Kidang di tengah-tengah keti di Sardis masih wat jelma sai menjaga in kawaini tetap mekecah. Tian udi haga lapah jejama Nyak jama bekawai handak, mani tian layak untuk seno.

⁵ Untuk tian sai menang haga dipakaiko jubah handak. Gelar tian mak haga Kuhapusko jak Buku Jelma Hurik. Rik di hadap Bapa-Ku rik malaikat-malaikat-Ni. Nyak haga ngaku bahwa tian anodo kedau-Ku.

⁶Sapa gaoh sai dapok ngedengi, hagani ngeperhatiko api sai dicawako ulih Ruh-Ni Allah untuk jemaah-jemaah!”

⁷ “Untuk malaikat jemaah di Filadelpia, tulisdo injuk reji: Injido luhot jak Ia sai suci rik sejati. Iado sai nyating kunci sai dikedau ulihni Daud; kik Ia ngebukak, mak sai jelma pun dapok nyalokni, rik kik Ia nyalok, mak sai jelma pun dapok ngebukakni.

⁸Nyak pandai api sai keti lakuko. Nyak pandai bahwa keti mak sepira kuat; keti radu nutuk ajaran-Ku rik setia jama Nyak. Bagi keti radu Kubukakko sai rangok, sai mak dapok disalok ulih sapa pun juga.

⁹ Ingokdo inji: Jelma-jelma sai jadi umatni iblis udi, jelma-jelma sai ngebuhung sai ngaku dirini Yahudi padahal lain, haga Kusani sehingga tian ratong sujud di hadapmu. Rik tian haga pandai bahwa Nyak mengasihimu.

¹⁰Ulih sebab keti radu nutuk perintah-Ku in betekun, Nyak pun haga ngelindungimu jak masa kesusahan sai haga menimpa seluruh dunia. Hal udi haga tejadi untuk nyubai sunyin jelma di bumi.

¹¹Nyak geluk ratong! Jagado betik-betik api sai keti kedau, in mak sai jelma pun ngerampas hadiah kemenanganmu.

¹² Jelma sai menang, haga Kujadiko sebagai tihang delom Lamban Suci Allah-Ku, rik ia haga tinggal di rang udi selama-lamani. Gelar-Ni Allah-Ku rik gelar kota Allah-Ku — yakdo Yerusalem ampai sai haga regah jak surga, jak Allah-Ku — haga Kutulis jama diri ulun udi. Juga gelar-Ku sai ampai haga Kutulis jama dirini.

¹³Sapa gaoh sai dapok ngedengi, hagani ngeperhatiko api sai dicawako ulih Ruh-Ni Allah untuk jemaah-jemaah!”

¹⁴ “Untuk malaikat jemaah di Laodikia, tulisdo injuk reji: Injido luhot jak Sang Amin, Saksi sai setia rik benor, sumber sunyin hal sai diciptako ulih-Ni Allah.

¹⁵Nyak pandai api sai keti lakuko; Nyak pandai keti mak mengingi rik mak juga panas. Seharusni keti salah saini!

¹⁶Kidang keti panas-panas kuku; panas mawat, mengingi pun mawat. Udi sebabni keti haga Kumutahko luah jak delom banguk-Ku.

¹⁷Keti cawa, ‘Sekam mebatin rik serba cukup; sekam mak kekurangan api-api.’ Kidang keti mak pandai hara melarat rik hara menyedihko keadaanmu! Keti mejerih, riluk, rik buta.

¹⁸Ulihni seno Nyak ngeni petuah jama keti in keti ngebeli jak Nyak emas, yakdo emas sai murni, in keti jadi mebatin. Belido juga kawai handak jak Nyak in keti bekawai rik nyalok keadaan keti sai riluk rik ngeliamko. Rik belido muneh ubat untuk dioles di matamu in keti dapok ngeliak.

¹⁹ Jelma-jelma sai Kukasihi, tiando sai Kutegor rik Kulecut. Ulihni seno hagani keti besemangat, rik betubatdo jak dusa-dusamu.

²⁰Liak! Nyak cecok di hadap rangok rik ngetuk. Kik wat jelma sai ngedengi suara-Ku, rik ngebukak rangok, Nyak haga kuruk nungga ia; Nyak haga mengan jejama ia rik ia mengan jejama Nyak.

²¹Tian sai menang, haga Kuizinko mejong di takhta-Ku jejama Nyak, gegoh injuk Nyak tenggalan pun radu menang rik tano mejong jejama Bapa-Ku di takhta-Ni.

²²Sapa gaoh sai dapok ngedengi, hagani ngeperhatiko api sai dicawako ulih Ruh-Ni Allah jama jemaah-jemaah!”