Read Lampung Api WAHYU 6 Bible Online

WAHYU 6 - Lampung Api bible

WAHYU 6

¹Radu jak seno nyak ngeliak Anak Biri-biri udi mecohko segel mula-mula di hantara kepitu segel udi. Raduni nyak ngedengi sai jak keepak makhluk udi cawa, “Ija!” Bunyi suarani udi injuk bunyi guntor.

² Maka nyak ngeliak, raduni keliakan sai kuda handak. Jelma sai nunggangni nyating sai busur, rik jama ia dikeni sai mahkota. Ia maju sebagai jelma sai menang sai mik ngerebut kemenangan.

³Kak raduni Anak Biri-biri udi mecohko segel sai kerua, rik nyak ngedengi makhluk sai kerua cawa, “Ija!”

⁴ Raduni sai kuda sai bareh luah luot. Kuda udi suluh warnani. Jelma sai nunggangni dikeni kuasa ngelenyapko keadaan damai jak muka bumi, in manusia saling ngebunuh. Maka ia dikeni sai pedang sai kejung.

⁵ Raduni Anak Biri-biri udi mecohko segel sai ketelu. Rik nyak ngedengi makhluk ketelu cawa, “Ija!” Nyak ngeliak, maka keliakan sai kuda halom. Jelma sai nunggangni nyating sepasang timbangan di culukni.

⁶Rik nyak ngedengi sai hal sai kedengian injuk suara sai beseru jak tengah-tengah keepak makhluk udi. Suara udi cawa, “Seliter gandum sai betik gegoh rega upah serani, rik telu liter gandum jenis bareh gegoh upah rega serani juga. Kidang dang nyadangko batang-batang zaitun rik kebun anggor!”

⁷Kak raduni Anak Biri-biri mecohko segel sai keepak. Rik nyak ngedengi makhluk sai keepak cawa, “Ija!”

⁸ Nyak ngeliak, raduni keliakan sai kuda pucek. Jelma sai nunggangni gelarni Maut. Jak kudan, ia ditutuki redik-redik ulih Alam Maut. Kekuasaan atas seperepak bumi inji diserahko jama tian, in tian dapok ngebunuh liwat peperangan, liwat masa kebetohan, liwat wabah penyakik rik liwat binatang-binatang buas.

⁹Radu jak seno Anak Biri-biri udi mecohko segel sai kelima. Maka nyak ngeliyak di debah mezbah wat jiwa-jiwa jelma sai mati tebunuh mani tian nguatko luhot jak Allah liwat kesaksian tian.

¹⁰Tian mekik jama suara sai keras, “Ya Tuhan Mahakuasa, sai suci rik benor! Pira saka lagi ampai Niku ngadili penduduk bumi rik ngehukum tian mani ngebunuh sekam?”

¹¹Tian masing-masing dikeni jubah sai handak. Raduni tian dikayun istirahat serebok lagi, sampai radu lengkap jumlah kantik-kantik seperjuangan rik puari-puari tian sai haga dibunuh injuk tian.

¹² Raduni nyak ngeliyak Anak Biri-biri udi mecohko segel keenam. Tejadido kukuk sai hibat. Matarani jadi halom injuk kain halom sai kasar, rik bulan jadi suluh injuk rah.

¹³ Bintang-bintang begugoran jak langit mik atas bumi injuk uah ara sai makkung mesak gugor jak batangni waktu diguncang angin keras.

¹⁴ Langit lebon injuk kertas digulung, rik sunyin gunung rik pulau digiserko jak rangni.

¹⁵ Raduni raja-raja dunia, jelma-jelma pembesar, penglima-penglima, jelma-jelma batin rik jelma-jelma bekuasa, rik jelma-jelma barehni, baik jelma sai ngebantu maupun jelma sai bebas, sunyinni nyegokko diri di delom guha-guha rik di celah-celah batu gunung.

¹⁶ Jama gunung-gunung rik batu-batu udi, tian mekik, “Timpado sekam! Segokko sekam jak pengliakan Ia sai mejong di atas takhta, rik jak butong-Ni Anak Biri-biri udi.

¹⁷ Rani dasyat radu ratong, tano tian ngeluahko butongni tian, rik mak sai jelma pun sanggup betahan di hadap tian!”