Read Lampung Api WAHYU 7 Bible Online

WAHYU 7 - Lampung Api bible

WAHYU 7

¹ Radu jak seno, nyak ngeliak epak malaikat cecok di keepak penjuru bumi. Tian nahan keepak angin rik di bumi dang wat angin sai betiup di darak atau di laok, atau di batang-batang.

²Raduni nyak ngeliak sai malaikat sai bareh muncul jak kebelah timur. Ia ngusung segel jak Allah sai hurik. Jama suara keras malaikat udi ngurau keepak malaikat sai radu mansa kuasa jak Allah untuk nyadangko darak rik laok.

³ Malaikat udi cawa, “Dang pai nyadangko darak atau laok, atau batang-batang kik sekam makkung ngeni tanda segel di tagak jelma-jelma sai ngebantu-Ni Allah ram.”

⁴Raduni nyak dikeni pandai bahwa wat selamon 144.000 jelma sai dikeni tanda segel jak Allah ditagak tian. Jelma-jelma udi diakuk jak kerua belas suku bangsa Israel;

⁵jak unggal suku 12.000 jelma. Yakdo jak suku: Yehuda, Ruben, Gad,

⁶Asyer, Naftali, Manasye,

⁷Simeon, Lewi, Isakhar,

⁸Zebulon, Yusuf, rik Benyamin.

⁹Radu jak seno nyak ngeliak luot, raduni keliakan laok manusia sai luar biasa lamonni — mak ngedok sai jelma pun sai dapok ngehitung lamonni. Tian anodo jelma-jelma jak unggal bangsa, suku, negara, rik bahasa. Jama bekawai jubah handak-handak rik nyating ranting-ranting batang palem di culuk, jelma-jelma lamon udi cecok ngehadap takhta rik ngehadap Anak Biri-biri udi.

¹⁰Raduni jama suara sai kuat tian beseru, “Keselamatan ram ratongni jak Allah ram, sai mejong di atas takhta, rik jak Anak Biri-biri udi!”

¹¹Sunyin malaikat cecok keliling takhta rik para jelma sai mimpin rik keepak makhluk udi. Malaikat-malaikat udi tesungkor dihadap takhta. Kak raduni nyumbah Allah.

¹²Tian beseru, “Amin! Terpujido Allah ram sai agung rik bijaksana. Ia patut dilimpahi ucapan-ucapan syukor rik penghormatan. Ia bekuasa rik kuat untuk selama-lamani! Amin.”

¹³Salah sai jak jelma-jelma sai mimpin udi betanya jama nyak, “Jelma-jelma sai bejubah handak inji, sapa tian rik jak ipa tian ratong?”

¹⁴ “Nyak mak pandai, Tuan. Tuan tenggalan sai pandai,” nyak ngejawab. Maka ia cawa jama nyak, “Injido jelma-jelma sai radu selamat liwat masa penganiayaan sai hibat. Tian radu mepoh jubah tian rik nyanini jadi handak jama rah Anak Biri-biri udi.

¹⁵Udido sebabni tian cecok di hadap takhta-Ni Allah, rik beibadah jama Ia di rani di bingi di delom Lamban Ibadah. Rik Ia sai mejong di atas takhta udi haga hadir jama tian untuk ngelindungi tian.

¹⁶ Tian mak haga lagi ngerasa mebetoh atau mahu; matarani ataupun panas terik mak haga lagi nyuah tian,

¹⁷ mani Anak Biri-biri sai mejong di tengah-tengah takhta haga jadi gembala tian. Ia haga nuntun tian mik sumber way sai ngeni kehurikan. Rik Allah haga ngehapus sunyin way mata jak mata tian.”