Read Lampung Api WAHYU 8 Bible Online

WAHYU 8 - Lampung Api bible

WAHYU 8

¹Waktu Anak Biri-biri udi mecohko segel sai kepitu, surga jadi mangi sakani kira-kira setengah jam.

²Raduni nyak ngeliak kepitu malaikat sai cecok di hadap Allah, rik tian dikeni pitu biji trumpet.

³ Sai malaikat bareh, sai ngusung sai pedupaan emas, ratong rik cecok di hadap mezbah. Jama ia dikeni lamon nihan kemiyan untuk ditaborko pada dua-dua sunyin umat-Ni Allah rik untuk dipersembahko di mezbah emas sai wat di hadap takhta.

⁴Jejama jama dua-dua para umat-Ni Allah, hasok dupa sai sedang menyala udi mengepul cakak jak culuk malaikat sai cecok di hadap-Ni Allah udi.

⁵ Kak raduni malaikat udi ngakuk pedupaan udi, rik ngisini jama apui jak mezbah, raduni nayarkoni mik atas bumi. Maka guntor pun bebunyi rik kilat sabung-menyabung, rik tejadi kukuk.

⁶Radu jak seno, pitu malaikat sai nyating pitu trumpet udi besiap-siap untuk nyebu.

⁷ Malaikat mula-mula nyebu trumpetni, maka labung es rik apui becampor rah gugor jama kedokni mik atas bumi. Sepertelu bumi bela tesuah; injuk reno juga sepertelu jak batang-batang, rik unggal jukuk sai hujau.

⁸Raduni malaikat kerua nyebu trumpetni, maka sai hal sai balak nihan sai keliakan injuk gunung sai menyala-nyala ditayarko mik delom laok. Sepertelu laok berubah jadi rah,

⁹rik matido sepertelu sunyin makhluk di laok; injuk reno muneh musnahdo juga sepertelu jak kapal-kapal.

¹⁰ Kak raduni malaikat ketelu nyebu trumpetni, maka sai bintang sai balak, sai menyala-nyala injuk suluh, gugor jak langit, raduni nimpa sepertelu jak way-way rik mata-mata way.

¹¹ (Gelar bintang udi “Pahik”.) Maka sepertelu jak way jadi pahik, rik matido lamon jelma mani nginum way sai radu jadi pahik udi.

¹² Raduni malaikat keepak nyebu trumpetni. Maka tetampardo sepertelu jak matarani, sepertelu jak bulan, rik sepertelu jak bintang-bintang sehingga lebondo sepertelu jak kekuatan cahaya tian. Juga sepertelu jak dawah mak terang rik reno juga sepertelu jak di bingi.

¹³Raduni nyak ngeliak, maka nyak ngedengi sai burung rajawali sai sedang hambor langgar di udara, beseru, “Celaka! Celaka! Celakado sunyin jelma di bumi kik kedengian ketelu malaikat barehni nyebu trumpetni kanah!”