Read Lampung Api WAHYU 9 Bible Online

WAHYU 9 - Lampung Api bible

WAHYU 9

¹Raduni malaikat kelima nyebu trumpetni, rik nyak ngeliak sai bintang gugor jak langit mik atas bumi. Bintang udi dikeni kunci rulah maut.

² Maka bintang udi ngebukak rulah maut udi, raduni hasok luah jak delomni injuk hasok jak tungku sai balak. Matarani rik angkasa jadi kelam ulih hasok jak rulah udi.

³ Raduni jak delom hasok udi luahdo belalang-belalang sai regah mik bumi. Belalang-belalang udi dikeni kuasa sai gegoh injuk sai dikeni jama kala.

⁴ Tian dilarang nyadangko jukuk, atau batang-batang, atau tanoman-tanoman barehni. Tian angkah ngasi nyerang jelma-jelma sai ditagakni mak ngedok tanda segel jak Allah.

⁵Belalang-belalang udi mak diizinko ngebunuh jelma-jelma udi, melainko angkah nyiksa tian selama lima bulan. Sakik sai diakibatko ulih siksaan belalang-belalang udi gegoh injuk sakik sai diakibatko ulih santit kala.

⁶ Selama lima bulan udi, jelma-jelma udi berusaha in mati, kidang tian mak dapok mati; tian mirak mati, kidang maut jaoh jak tian.

⁷ Rupa belalang udi injuk kuda sai siap untuk beperang. Di ulu tian wat sai hal sai keliakan injuk mahkota emas. Pudak tian injuk pudak manusia.

⁸ Buok tian injuk buok bebai, rik ipon tian injuk ipon singa.

⁹ Dada tian disalok jama sai hal sai mirip kawai besi. Suara kepi tian injuk suara sekumpulan lamon kereta-kereta kuda sai sedang nyerbu delom peperangan.

¹⁰Tian ngedok gundang rik santit injuk kala. Rik di delom gundang tian udido wat kekuatan tian untuk nyiksa manusia selama lima bulan.

¹¹Tian ngedok raja sai memerintah tian, rik raja udi iado malaikat sai betanggung jawab atas rulah maut. Gelarni di delom bahasa Ibrani iado Abadon; rik di delom bahasa Yunani Apolion (sai retini “Penyadang”).

¹²Celaka sai mula-mula radu liwat. Radu jak seno wat rua celaka lagi sai haga ratong.

¹³ Kak raduni malaikat sai keenam nyebu trumpetni. Maka nyak ngedengi suara ratong jak keepak uncuk mezbah emas sai wat di hadap-Ni Allah.

¹⁴Suara udi cawa jama malaikat keenam udi, “Lepaskodo keepak malaikat sai teikok di Way Efrat udi!”

¹⁵Keepak malaikat udi pun dilepasko. Tian radu disiapko khusus bagi jam, rani, bulan rik tahun udi untuk ngebunuh sepertelu jak sunyin manusia.

¹⁶Nyak dikeni pandai bahwa jumlah pasukan-pasukan bekuda udi yakdo selamon rua ratus juta.

¹⁷Rik delom pengliakan, nyak ngeliak kuda-kuda udi rik jelma-jelma sai nunggangni. Jelma-jelma sai nunggangni makai kawai besi sai bewarna suluh terang, biru injuk batu nilam, rik kuning belerang. Ulu kuda-kuda udi injuk ulu singa, rik jak bangukni luah apui, hasok, rik belerang.

¹⁸Sepertelu jak manusia tebunuh ulih telu bencana udi; yakdo apui, hasok, rik belerang sai luah jak banguk kuda-kuda udi.

¹⁹Kekuatan kuda-kuda udi wat dibangukni rik juga di gundangni. Gundang-gundangni injuk ulai wat ulu. Jama gundangni udi, kuda-kuda udi nyiksa manusia.

²⁰ Kidang sisa jak manusia sai mak tebunuh ulih bencana-bencana udi pun, mak muneh ninggalko perbuatan culuk tian tenggalan. Tian mak taru nyumbah ruh-ruh jahat rik berhala-berhala emas, perak, tembaga, batu rik kayu sai mak dapok ngeliak atau ngedengi, ataupun lapah.

²¹Tian mak muneh ninggalko perbuatan-perbuatan tian sai jahat, yakdo pembunuhan, ilmu-ilmu gaib, perbuatan hajor rik maling.