Read Lashi APOEM AYANG: 1 Bible Online

APOEM AYANG: 1 - Lashi bible

APOEM AYANG: 1

¹Xang: shi" moo Mangsoo gi mougkhung: yo' myidjang ri phain" so: to".

²Mougmyid gi alhoo: agung ajo, ziyo' dili cen: nghoid nyid. Jo, moojo, ri zeing" lhoung to" da" Nammugdara gyid gi moug: coid wigi thoeb zeing" to" lho: Mangso Venyi: gi gyid tho' moo dei loeb nyid.

³ Mangsoo gi «Boo" bang bui" we'» ga: lang" boo" bang bue" lo.

⁴Mangsoo gi nyang: yu" myang khyoo: yoomo nheugshid: nyid bye:. Houg: lho: nyang: gi boo" bang ri moug: coid mo kho' pyam lho:

⁵nyang: gi boo" bang ri «Nyid"» ga: lho: moug: coid ri «Myen"» ga: myeing myheing. Myen" thang: ayo, lid: lho: nab soin: ju" ri hau: zigi xang: shi" nyid" nghoid bye:.

⁶ Hau: thang: Mangsoo gi «Gyid phung: gung moo moug: laid kyoodoem: bue" lo lho: gyid gi eig gang bue" loo" we'» ga: amyeing" byid: lang" hau: zi hougsu" bue" loo bye:. Mangsoo gi moug: laid kyoodoem: ri koid too" bye: yoomo hau: kyoodoem: khoug: moo jo, da" gyid yo' kyoodoem: tho' moo jo, da" gyid bui" nhang: ziyo' dakhyoo" ti" bue" lo bye:.

⁸Nyang: gi moug: laid kyoodoem: ri «mougkhung:» ga: myeing byid: bye:. Myen" thang: ayo, lid: khare" lho: nab soin: ju" ri eig nyid" nyid" nghoid bye:.

⁹Hau: thang: Mangsoo gi «Myidjang thu' myang loo baja"- mougkhung: vhoo: mo gyid gi dakhyi' jang: moo: zeing: loo" ge'» ga: tid ziyo' dakhyoo" ti" hau: zi bue" loo bye:.

¹⁰Nyang: gi myidjang ri «Mougmyid» ga: lho: dakhyi' jang: moo za: zeing: khare" da" gyid ri «Panglai:» ga: myeing myheing bye:. Hau: lho: Mangsoo gi nyang: yu" myang khyoo: yoomo nheugshid: nheugdeug nyid bye:.

¹¹Hau: thang: nyang: gi «Mougmyid gi mhain" zoo: lung: lid ri we' myoug: bo shi" zei: da" gug zoo shivoo: gam ri we' ashi" zei: da" seiggam aja: ja: ri we' yug thu we'» ga: amyeing" byid: ziyo' dakhyoo" ti" hougsu" bue" loo bye:.

¹²Mougmyid gi mhain" zoo: lung: lid dangain" ri yug thu byid: yoomo Mangsoo gi nyang: yu" myang bye: khyoo: bue" yoomo nheugshid: nyid bye:.

¹³Myen" thang: ayo, lid: khare" lho: nab soin: ayo, ju" ri soem" nyid" nghoid bye:.

¹⁴Hau: thang: Mangsoo gi «Nyid" yo' myen" ri yo" kho' wa shid re" we' bidnyid, zain void yo' ayo, aboin: ri toin" shed wa shid re" we' boo" bang joem bui" loo nhang: bye:.

¹⁵Nyangnu" gi mougkhung: tho' mo myidjang tho' khyoo: thoin" pang nyid baja"» ga: amyeing" byid: ziyo' dakhyoo" ti" bui" loo bye:.

¹⁶Mangsoo gi je gyi: da" boo" bang zeing eig loem: ri koid to" lho: bid gi nyid" ri vhoebkhang" lho: myen" da" atho' moo vhoebkhang" wa shid re" lhammoo" ri phain" so: too" bye:. Nyang: gi kyi: joem ri we' phain" so: too" bye:.

¹⁷Mougkhung: tho' mo mougmyid tho' khyoo: thoin" pang byid: nyid wa shid re" we'

¹⁸Nyid" yo' myen" ri vhoebkhang" wa shid re" we' boo" bang yo' moug: coid ri kho' wa shid re" we' boo" bang joem ri to" to" abye: da:. Mangsoo gi nyang: yu" myang da" khyoo: yoomo nheugshid: nheugdeug nyid bye:.

¹⁹Myen" thang: ayo, lid: khare" lho: nab soin: ayo, ju" ri myid: nyid" nyid" nghoid bye:.

²⁰Hau: thang: Mangsoo gi «Dei loeb nyid yen" da" gougnyhoug aja: ja: gyid khoug: moo dei noem loeb noem nyid lo lho: ngho' joem we lid moo nyid loo we'» ga: amyeing" byid: bye:.

²¹Houg: yoomo Mangsoo gi panglai: mo gougnyhoug zeing joem gyid khoug: moo dei loeb nyid da" gougnyhoug aja: ja: dangain" yo' ngho' joem aja: ja: dangain" ri phain" so: too" bye:. Mangsoo gi nyang: yu" myang khyoo: yoomo nheugshid: bye:.

²²Nyang: gi nyangnu" ri mainkaid byid: lho: - «Gyid moo nyid da" dei loeb noem dangain" we' myo: lug je: loo ge'» ga: lho: nyang: gi ngho' joem ri we' «Myo: tham: je: be: loo" ge'» ga: tid.

²³Myen" thang: ayo, lid khare" lho: nab soin: ayo, ju" ri hau: zi wim: nyid" nyid" nghoid bye:.

²⁴Hau: thang: Mangsoo gi «Mougmyid mo yhoem: moo myhu: ja: yo' siyoo moo nyid ja:- gyi: ziyo' nge zi gougnyhoug aja: ja: cang: joeb ri nyid thu loo baja"» ga: amyeing" byid: ziyo' dakhyoo" ti" bue" loo bye:.

²⁵Mangsoo gi hau: zi dangain" ri phain" so: to" wigi nyang: gi yu" myang lho: nheugshid: nheugdeug nyid bye:.

²⁶ Hau: thang: Mangsoo gi «Houg: lho: akhid" nyang: gi nyhang" yo' alhoo: du avoid bo da" xangsu: byu ri phain" so: boem shang. Nyangnu" gi wimdo, yo' ngho' zoo: yen" zoo: yi tho' moo we' myhu: ja: yo' siyoo gougnyhoug lam" joem gyi: zi nge zi dangain" tho' moo we' yoem: so' yo' vhoeb nyid goo" baja"» ga: tid.

²⁷ Houg: yoomo Mangsoo gi nyang: yo' du da" xangsu: byu ri phain" myhu: bye:. Nyang: gi yuggi yo' myiyi: ri phain" so: lho:

²⁸mainkaid dang: «Re" tang: da" amyed ashen yigi moug: gyab goin" nyid byeung" lo" wigi dei mo dei nyid moo nyid ri vhoebkhang" seing: nyid wa shid re" zooshang: myoo" sho' nyid myoo: nyid je: lo" boem ge'. Ngoo gi nanu" ri wimdo, joem ngho' joem siyoo gougnyhoug dangain" ziri vhoebkhang" nhang: wa.

²⁹Nanu" zoo: wa shid re" gug zoo shivoo: dangain" yo' shi" aja: ja: dangain" ri ngoo nyheing soin' koid too" byid: bye:.

³⁰Nghoid loug kyang: da" siyoo gougnyhoug dangain" yo' ngho' zoo: yen" zoo: dangain" bang: zoo: wa shid re" vufu" myo, yo' gyi: cen' fu' toid mhain" zoo: joem ri ngoo phain" so: too" byid: bye:» ga: tid wigi houg bang: gi hougsu" nyang: bue" loo bye:.

³¹Mangsoo gi nyang: zei bue" too" bye: da" lo, moo" dangain" ri yu" lho: gye" nheig yu" shid: nyid bye:. Myen" thang: ayo, lid: khare" lho: nab soin: ayo, ju" lang" hau: zigi khyug nyid" nghoid bye:.