Read Lashi APOEM AYANG: 11 Bible Online

APOEM AYANG: 11 - Lashi bible

APOEM AYANG: 11

¹Xang: shi" ri moug: gyab goin" moo myeing" daja: za: kaid lho: dang: daja: kyeing" jo, boem.

²Nyangnu" gi bidthu shoid khyoo: nyid yhe: lo" boem ri Babelon jang: dam dakhyi' moo ju" lho: nyid nyid boem ago".

³Nyangnu" nyang: cang" tid sham: go" boem zigi «Ri" ge'- zhoothung" baid lho: thain: sho' phoid boem shang» ga: tid. Houg: yoomo nyangnu" gi yhoem: koid wa zhoothung" yo' zhoo" kyen' ri yo" too" bye:.

⁴Nyangnu" gi «Akhid" nyhang" moug: fu" lho: moug: gyab goin" abyo, sain" loo" wa shid re" mougkhung: moo thug sho' myang: da" pyuzung bo da" voomoo" daloem: ri zhug boem shang» ga: tid boem.

⁵Hau: thang: ASEING gi hau: byu yi koid nyid boem da" pyuzung yo' voomoo" ri yu" wa shid re" ju" gyoo" lo.

⁶Hau: lho: nyang: gi «Houg ri akhid" he: byu yi dangain" gi byu damyu" myeing" daja: za: nyangnu" kaid nyid boem. He: zigi nyangnu" zei: zo" lo" nyid da" moo" aseig dashid" lo" nyid ashi". Daso' lang" nyangnu" koid nau ziri yo" bain koid boem wa myang.

⁷Nyangnu" dayug yo' dayug myeing" azhung" go" sho' nyhang" gyoo" yhe: lho: nyangnu" da" myeing" ri lhu: nhung pyam byid: shang» ga: tid.

⁸Hougsu" wigi ASEING gi nyangnu" ri mougmyid gyab goin" khyoo: byo sain" loo" nhang: lho: nyangnu" voomoo" tam: da" khyoo: gi no: pyam boem bye:.

⁹Voomoo" da" myeing gi Babelon ga: zi nghoid. Khasu" wim gari hau: joyoo moo ASEING gi byu dangain" bang: da" myeing" ri lhu: nhung pyam byid: lho: hau: joyoo mo moug: gyab goin" khyoo: byo sain" loo" bye:.

¹⁰He: zigi Shem da" amyed ashen yi nghoid. Tigyid shi' thang: eig zain nghoid ri Shem apyaid 100 zain nghoid lho: yuggi zoo: Arphaza ri yoo" bye:.

¹¹Hau: thang: nyang: gi gootu: 500 zain doem xo' nyid lho: gootu: zooshang: yiri we' yoo" kho'.

¹²Arphaza gi 35 zain nghoid uri yuggi zoo: Shela ri yoo" bye:.

¹³Hau: thang: nyang: gi gootu: 403 zain doem xo' nyid lho: gootu: zooshang: yiri we' yoo" kho'.

¹⁴Shela 30 zain nghoid uri Ebera ga: da" yuggi zoo: dayug ri yoo" bye:.

¹⁵Hau: thang: nyang: gi gootu: 403 zain xo' nyid lho: zooshang: yi we' yoo" kho'.

¹⁶Ebera 34 zain nghoid uri Pheleg ga: da" yuggi zo: dayug ri yoo" bye:.

¹⁷Hau: thang: nyang: gi gootu: 430 zain xo' nyid lho: gootu: zooshang: yiri we' yoo" kho'.

¹⁸Pheleg 30 zain nghoid uri Reu ga: da" yuggi zoo: dayug ri yoo" bye:.

¹⁹Hau: thang: nyang: gi gootu: 209 zain xo' nyid lho: gootu: zooshang: ri we' yoo" kho'.

²⁰Reu 32 zain nghoid uri Serug ga: da" yuggi zoo: dayug ri yoo" bye:.

²¹Hau: thang: nyang: gi gootu: 207 zain xo' nyid lho: gootu: zooshang: yiri we' yoo" kho'.

²²Serug 30 zain nghoid uri Nahora ga: da" yuggi zoo: dayug ri yoo" bye:.

²³Hau: thang: nyang: gi gootu: 200 zain xo' nyid lho: gootu: zooshang: yiri we' yoo" kho'.

²⁴Nahora 29 zain nghoid uri Thera ga: da" yuggi zoo: dayug ri yoo" bye:.

²⁵Hau: thang: nyang: gi 119 zain xo' nyid lho: gootu: zooshang: yiri we' yoo" kho'.

²⁶Thera 70 zain nghoid uri nyang: gi Abram- Nahora yo' Haran bang: da" nya: phoo bue" loo bye:.

²⁷He: zigi Abram- Nahora yo' Haran bang: da" nya: phoo Thera da" amyed ashen yi nghoid. Haran gi Lod da" nya: phoo nghoid lho:

²⁸Nya: phoo lang" ashid: shi" ri Haran gi nya: co' phyed jang: Babelon mo Ura voo moo shid: bye:.

²⁹Abram gi Sarai ri lo, xo' yu lho: Nahora gi Haran da" nya: zoo: myiyi: nu" Mikha ri lo, xo' yu da:. Haran gi Iskha da" nya: phoo we' nghoid.

³⁰Sarai gi zooshang: we' ase' yoo".

³¹Thera gi nya: zoo: Abram yo' nya: dumoo" Sarai ri we' Haran da" nya: zoo: Lod ri we' shu" ci: lho: Babelon moug: Ura voomoo" mo Khanan mung" khyoo: thu yhe: lo" boem. Nyangnu" gi Haran mo ju" sho' yhe: wigi houg: moo yhe: nyid boem.

³²Thera gi hau: joyoo moo nya: apyaid eig sho: wim: zain moo shid: byug bye:.