Read Lashi APOEM AYANG: 13 Bible Online

APOEM AYANG: 13 - Lashi bible

APOEM AYANG: 13

¹Abram gi Egutu da" mougzhung: shoid- Khanan meing da" mougpyi: du shoid khyoo: nya: yhoem: seing: myhi'- nyang: yoo" mooyoo" yo' thu loo" khare" lang" Lod we' nyang: yo' bo cang thu lo".

²Abram gi yang kyung coid kyung yo' nu: kyung- ngei sheing: jonu" gye yoo" su: dayug nghoid.

³Hau: thang: nyang: gi houg: mo thu khare" lho: joyoo daloem: mo daloem: Bethela shoid khyoo: nyid shu" yhe: lo". Shid ri nyang: nyid kho' da" Bethela yo' Ai agyoo: moo ju" yhi: bye:.

⁴Houg: lho: xoin" ngei" phoin: daloem: ri zhug lho: houg: moo nyang: gi ASEING ri noku bye:.

⁵Lod we' coid kyung- yang kyung- nu: kyung yo' ikoin deungkhu: daloem: khyo" join joem ri we' yoo" su: nghoid.

⁶Hougsu" yoomo houg moo nya: eig yug dage" nyid wa shid re" joyoo atham: jo, loo. Khasu" wim gari nyangnu" da" gougnyhoug joem gye" myo: boem.

⁷Houg: yoomo Abram da" gougnyhoug zoem: mo, yo' Lod da" gougnyhoug zoem: mo, agyoo: moo atheing: theing: myeing" myo: byo, go" boem. (Hau: ayo, ri Khanan byumyu" yo' Perizi byumyu" yi gi hau: moug: moo nyid nyid gu nghoid bye:.)

⁸Houg: lang" Abram gi Lod ri «Nyha" phatang: gi dayhoem: mo byu za: nghoid wigi re" byu yi yo' nga" byu yi abyo, go" ri dagi wa.

⁹Houg: yoomo joyoo kho' gam goo" shang- nang yu" vho: da" mougmyid kha: du ri nghoid nghoid khyen: we'. Nang dashoid khyoo: loo" we' ngoo gi goo" shoid khyoo: yhi: wa» ga: tid.

¹⁰ Lod gi ayam aqei: khyoo: yu" kaid lho: Yodan pa: dam goin" Zora joyoo gyid myoo: sho' yo" da" ASEING da" khyam: yhang: ti" Egutu mung" yhang: ti" da" joyoo ri yu" myang kaid bye:. (He: zigi ASEING aphyo' shoin' pyam shi" re da" Sodom yo' Gomora voomoo" nghoid.)

¹¹Houg: yoomo Lod gi Yodan pa: dam dakhung" goin" ri nya: shid re" khyen: yu lho: bidthu shoid khyoo: nyid shu" yhe: loo" bye:. He: zigi nya: eig yug khasu" gang: go" lho" khyoo: nghoid.

¹²Abram gi Khanan mung" moo nyid nyid lho: Lod gi pa: dam khoug: moo jo, da" voomoo" joem moo yhe: theing: lho: Sodom nam moo yhe: ju" nyid.

¹³Hau: voo mo byu yigi akhyeing" ziyo' ASEING ri thougtheung yooboo koid nyid mo, nghoid.

¹⁴Lod thu loo" khare" thang: ri Abram ri ASEING gi «Nang nyid nyid jang" mo ashoid shoid khyoo: jhug jhug yu" we'.

¹⁵ Nang myang da" zi dangain" gi re" amyed ashen yi yo' nanya: shid re" ngoo byid: wa bye:. Hau: zigi apyaid atoo: moo nanu" da" zi nghoid wa.

¹⁶Hang" we' ayo" oung: nghab sho' amyed ashen myoo" sho' ngoo nang ri byid: wim bye:. Hau: zigi myidjang tho' mo myidzhoo" pheilhoug: ri nghab su" nyang: nghoid loo wa.

¹⁷Akhid" thu yhe: lho: moug: gyab goin" ri yu" yu" we'. Khasu" wim gari ngoo gi dangain" nang ri byid: wa bye:» ga: tid.

¹⁸Houg: yoomo Abram gi nya: zung jang: ri thoid shu" lho: Hebron mo Mamre ga: da" jang" mo gyeung" shang: seiggam nam moo yhe: no: theing: lho: wigi houg: moo nyang: gi ASEING shid re" xoin" ngei" phoin: daloem: ri koid bye:.