Read Lashi APOEM AYANG: 16 Bible Online

APOEM AYANG: 16 - Lashi bible

APOEM AYANG: 16

¹Abram da" yhoem: seing: myhi' Sarai gi zooshang: ayoo". Nghoid loug we' nyang: gi Hagara ga: da" Egutu join myhi' dayug yo" to".

²Houg: yoomo nyang: Abram ri «ASEING gi ngoo ri zooshang: ayoo" wa khyo" koid to". Houg: yoomo nga" join myhi' yo' nang yhoeb we'. Nyang: gi nga" shid re" zooshang: yo" yoo" byid: wa nghoid» ga: tid. Abram gi Sarai tid da" dang: ri myid bo veing" bye:.

³Abram gi Khanan mung" moo zain loem: daxi: zain nyid nyid thang: ri Sarai gi Hagara ri Abram da" yhoem: seing: myhi' khyo" byam nyid nhang: bye:.

⁴Abram gi Hagara yo' nyid lho: Hagara gi zoonu" gung bue" loo bye:. Nyang: moo zoonu" gung bue" jo, ziri si lang" nyang: gi nghoid boin: lho: Sarai ri aphoug" akhyoid koid.

⁵Houg: lang" Sarai gi Abram ri «Hagara ngoo ri aphoug" akhyoid koid khyoo: gi Abram re" da" shoid vhang: khyoo: nghoid. Ngoo nyang: ri nang moo ab byid: lho: nyang: gi zoonu" gung nghoid ziri si lang" nyang: ngoo ri aphoug" akhyoid koid nyid bye:. Nang yo' ngoo nyha" thang: kha: yug deingmain" ziri ASEING dang: phyed byid: loo baja"» ga: tid.

⁶Abram gi «Nghoid bye: nyang: gi re" join myhi' nghoid lho: re" amyeing" vhoo: moo nyid su: nghoid. Nang gi nyang: ri koid nau khyo" koid we'» ga: phug tid. Houg: lang" Sarai gi Hagara ri shen" yhen yoomo Hagara phang: khari" bye:.

⁷ASEING da" moug: lagyoo: gi Shura khyoo: yhe: lo" da" dain" pyoid khyoo: mo gyid boug nam moo Hagara ri myang lho:

⁸«Sarai da" join Hagara we"- khakhyoo: re" lho: khakhyoo: yhe: lo" nyid la"» ga: myid: da. Nyang: gi «Ngoo gi nga" join seing: myhi' jang" mo phang: thu lo zi nghoid» ga: phug tid da:.

⁹Moug: lagyoo: gi «Nya: jhang doem tau" lo" lho: nya: join dakoid nyid we'» ga: tid.

¹⁰Xo' tid zigi «Ngoo gi nang ri hang" we' ayo" oung: nghab sho' amyed ashen myoo" sho' myo: tham: nhang: wa.

¹¹Nang gi yuggi zoo: khu: wa nghoid lho: nang gi nya: myeing ri Ishmaela ein: myheing wa nghoid. Khasu" wim gari ASEING gi re" ngougmyeing" thui: ri shoug" gyoo: byid: bye:.

¹²Nghoid loug we' zooshang: gi kyang: da" loo zei: yhang: ti" nghoid loo wa. Nyang: gi byu yugkhang" moo" ri gyi koid lho: yugkhang" moo" we' nyang: ri gyi koid boem wa nghoid. Nya: amang: anhung" yi yo' ngheing" goo" nyid wa nghoid» ga: tid abye:.

¹³Hagara nya: gung nyang: myid: yu" zigi «Ngoo gi dei nyid lho: hidsu" dang: tid da" Mangsoo ri deing deing nyang: myang bye: nhung» ga: lho: nyang: gi nyang: ri dang: ji da" ASEING ri «Ngoo ri myang da" Mangsoo» ga: tid.

¹⁴Hau: gang mo mung" byu yigi Kadesha yo' Bared agyoo: mo gyid thung" ri «Ngoo ri myang nyid wigi dei nyid su: da" gyid thung"» ga: tid boem.

¹⁵ Hagara gi Abram ri yuggi zoo: dayug khu: byid: lho: Abram gi hau: zooshang: ri Ishmaela ga: myeing myheing.

¹⁶Abram gi hau: uri shed xe: khyug zain nghoid bye:.