Read Lashi APOEM AYANG: 17 Bible Online

APOEM AYANG: 17 - Lashi bible

APOEM AYANG: 17

¹Abram goug: xe: goug: zain nghoid ri ASEING gi nya: jhang re" lho: «Ngoo gi myhang: thang da" Mangsoo nghoid. Nga" dang: tam" gyo: lho: ge da" moo" khanham we' dazei: nyid we'.

²Ngoo gi nang yo' thang" cab dangsoo" ri to" too" wa nghoid lho: nang ri amyed ashen myoo" sho' byid: wa» ga: tid.

³Abram gi nya: myonhoo: myidjang moo tain" sho' goeb uri Mangsoo gi

⁴«Nang gi byumyu" myoo" sho' da" phoug" phyid" bue" loo wa ein: ngoo dangsoo" byid: to" khyoo: gi ngoo nang yo' to" to" da" nga" thang" cab nyang: nghoid bye:.

⁵Re" myeing gi Abram anghoid loo: Abraham danghoid lo:. Khasu" wim gari ngoo gi nang ri byumyu" myoo" sho' da" phoug" phyid" bue" nhang: too" bye:.

⁶Ngoo gi nang ri amyed ashen myoo" sho' byid: wa. Houg: lho: nyangnu" mo dayham" bang: gi khokham yi bue" lo boem wa. Nang gi amyed ashen joem myoo" sho' yoo" wa nghoid lho: byumyu" zeing bue" loo wa nghoid.

⁷ «Ngoo gi nang yo' re" amyed ashen yi da" ju" loo wa byunyid xiyam: moo ju" sho' apyaid atoo: mo thang" cab khyo" nga" dangsoo" ri zoem: nyid wa bye:. Ngoo gi re" da" Mangsoo we' re" amyed ashen yi da" Mangsoo we' nghoid nyid wa bye:.

⁸ Akhid" nang being" voo khyo" re" nyid nyid da" he: moug: ri ngoo gi nang yo' re" amyed ashen yiri byid: wa nghoid. Khanan damung" goin" ri re" amyed ashen yi apyaid atoo: seing: nyid wa nghoid lho: ngoo we' nyangnu" da" Mangsoo bue" nyid wa bye:».

⁹Mangsoo gi Abraham ri «Nang yo' ju" loo wa da" byunyid xiyam: re" amyed ashen yi we' ngoo yo' myid veing" da" thang" cab too" ca" wa nghoid.

¹⁰ Nang yo' re" amyed ashen yigi yuggi zoo: yi dangain" bang: shooyid thang: yham" ca" wa nghoid.

¹¹Akhid" nang mo ayang: shed" lho: shed nyid" byeung" bye: da" yuggi zoo: yi dangain" shooyid thang: yham" ca". Re" yhoem: moo co' phyed da" join yiri we' tungbau jang" mo qei yu to" da" join yiri we' hougsu" koid byid: ca". He: zigi nanu" yo' nga" agyoo: moo to" da" thang" cab bue" nyid wa nghoid.

¹³Yugkhang" moo" shooyid thang: yham" ca" boem wa. He: zigi nanu" yo' ngoo to" da" thang" cab gi apyaid atoo: dajo, jo, nyid khyoo: ri toin" shed nyid da" gung shoo" mo alhoo: bue" nyid wa nghoid.

¹⁴Athang: ayham" da" yuggi zoo: hang" ri nghoid loug we' nga" byumyu" dayug khyo" soin: yu zi ashoug" wa nghoid. Khasu" wim gari nyang: gi ngoo yo' to" da" thang" cab ri acang» ga: tid.

¹⁵Mangsoo gi Abraham ri «Nang gi re" da" yhoem: seing: myhi' ri Sarai ein: ayo" myheing loo wa akhid" mo nya: myeing gi Sara danghoid lo:.

¹⁶Ngoo gi nyang: ri mainkaid byid: wa. Houg: lho: ngoo gi nyang: khyo" wigi nang ri yuggi zoo: dayug byid: wa. Ngoo gi nyang: ri mainkaid byid: wa nghoid wigi nyang: gi byumyu" da" nya: myhi' bue" loo wa. Nya: amyed ashen bang: da" akhoug: mo khokham yi nyid thu loo wa nghoid» ga: tid.

¹⁷Abraham gi nya: myonhoo: ri myidjang tain" sho' goeb khyo' kaid. Nghoid loug we' nyang: gi «Apyaid dashoo: ju" bye: su: gi zooshang: ge yoo" shi" wa la". Sara gi apyaid goug: xi: moo zooshang: ge yoo" loo: wa la"» ga: shoug" soin: wigi yi kaid.

¹⁸Nyang: gi Mangsoo ri «Ce: gang mo Ismaela ri nga" mid seing: zooshang: abui" nhang: lha"» ga: myid: bye:.

¹⁹Nghoid loug we' Mangsoo gi «Ayo" bui" nhang:. Re" yhoem: seing: myhi' Sara gi re" shid re" yuggi zoo: khu: byid: wigi nang gi nyang: ri Isag ein: myeing myheing wa nghoid. Ngoo gi nga" thang" cab ri nyang: yo' we' nya: amyed ashen yi yo' we' apyaid atoo: to" too" wa nghoid. Hau: zigi apyaid atoo: thang" cab nghoid bye:.

²⁰Ngoo gi Isamaela shid re" re" da" mho' sang: dang: ri shoug" gyoo: bye: yoomo nyang: ri ngoo mainkaid jeju" byid: wa. Zoo: du myoo" sho' yo' amyed ashen myoo" sho' ngoo nyang: ri byid: wa. Nyang: gi khokham zoo: daxe: eig yug da" nya: phoo bue" lo wigi ngoo gi nya: amyed ashen yiri byumyu" zeing bui" nhang: wa nghoid.

²¹Nghoid loug we' ngoo gi nga" thang" cab rigi sang: nheig he: ayo, koo: moo Sara khu: wa da" re" zoo: Isag yo' dato" too" wa» ga: tid.

²²Mangsoo gi Abraham ri tid ca" zi bain tid lang" nyang: gi doem loo" khari" bye:.

²³Hau: bidnyid mo Abraham gi Mangso dang: ri tam" gyo: wigi nya: zoo: Isamaela ri we' nya: yhoem: moo co' phyed da" join yi yo' qei to" da" join yiri we' nya: yhoem: mo yuggi dangain" bang: ri shooyid thang: yham" byid: bye:.

²⁴Abraham gi nyang: shooyid thang: yham" uri goug: xe: goug: zain nghoid lho:

²⁵Nya: zoo: Isamaela gi daxe: soem" zain nghoid bye:.

²⁶Nyangnu" gi danyid" dam moo za:

²⁷Abraham da" join yi dangain" bang: yo' dage" shooyid thang: yham" boem ago".