Read Lashi APOEM AYANG: 18 Bible Online

APOEM AYANG: 18 - Lashi bible

APOEM AYANG: 18

¹ASEING gi Mamre mo gyeung" shang: seiggam moo Abraham jhang re" lo. Abraham nghoid lang" we' bid gye" lung da" ayo, nghoid yoomo nya: zoem" mo khoem" duang: yang: moo zhung: nyid.

² Nyang: gi nghang yu" kaid ri yuggi soem" yug houg: moo yab jo, ziri myang kaid lho: houg: jang: nyang: gi nyangnu" jhang gei yhe: lho: yhe: shau" wigi nya: myonhoo: myidjang moo tain" sho' yhe: goeb pid.

³Houg: lho: nyang: gi «Nheigboo ludaid yi we"- jeju" mo nga" yhoem: moo atheing: loo: za: gi alid loo" goo". Ngoo gi hid: moo nanu" ri zhoo" nau jhug nau.

⁴Nanu" da" khyid: cid" wa shid re" ngoo gyid lo" ci: ri" ba. Nanu" gi he: seiggam yang: moo nyid nyid shi" we'.

⁵Nanu" da" gyung: khyoo: xo' so" jang" moo yoem: yoo" nhang: wa da" zoo: noem dajhi' ri we' ngoo ci: loo wa. Nanu" gi nga" yhoem: moo re" khyo" ngoo ri goug nhang: goo" la- Ngoo gi nanu" ri zoo: shug dei zhoo" ba» ga: tid. Nyangnu" gi «Gaja bye: o". Ngoonu" khab yu wa bye:» ga: tid.

⁶Abraham gi nya: zoem" khoug: khyoo: myab myab lo" lho: Sara ri «Myab myab koid we' re" da" ge thang cen: moin" thung: dathung: lo" yu lho: zooyho' bung: we'» ga: lho:

⁷Nyang: gi nu: khyung khyoo: yhe: lho: gye gyi: xu: yung" da" nubam: zoo: dadu: ri yu lho: nya: dei zoo: dayug ri myab myab said yhung nhang: kaid.

⁸Nyang: gi nyangnu" ri thobaid- nunoug"- shoo" yo' zoo: noem byid: zho". Seiggam yang: moo nyangnu" ri nyang: nyang: yhe: di" zho" wigi nyangnu" we' zo: boem ago".

⁹Hau: thang: nyangnu" gi nyang: ri «Re" yhoem: seing: myhi' Sara the'» ga: myid: lang" «Nyang: gi zoem" khoug: moo nyid» ga: nyang: doem phug tid.

¹⁰ Nyangnu" mo dayug su: gi «Akhid" mo lhammoo" goug: khyab nghoid lang" ngoo doem tau" loo wa. Re" yhoem: seing myhi' Sara gi yuggi zoo: dayug yoo" wa nghoid» ga: tid. Sara gi hougsu" tid su: nungthang mo zoem" khoem" duang: moo tam" gyo: nyid.

¹¹Abraham yo' Sara gi gye" mang: bye:. Sara gi lhammoo" khyab khang" moo" moo re" da" mi ci: ayo, we' thang bye:.

¹² Houg: yoomo Sara gi nya: gung: nyang: yi lho: «Akhid"- ngoo gi mang: bye:- abui" loo- gung shoo" zoem" khau: noug shi" wa lha"- hau: tho' agoo" nga" yhoem: seing: phoo we' mang: bye:» ga: tid.

¹³Houg: lang" ASEING gi Abraham ri myid: zigi «Ce: gang mo Sara gi ‹ngoo gi bain mang: bye: ri zooshang: gi" gi nyang: ge yoo" shi" wa lha"› ga: yi lho: tid la".

¹⁴ ASEING moo age bue" zi ci: jo, lha"- ngoo deing" deing tid zigi akhid" mo lhammoo" goug: khyab lang" ngoo doem tau" ri" wa. Sara gi yuggi zoo: dayug ri yoo" wa nghoid» ga: tid.

¹⁵Sara gi gyoug yoomo houg: ziri ngeig bye:. «Ngoo gi ayi o"» ga: tid. «Nghoid wa bye:. Nang gi yi abye: da» ga: nyang: phug tid.

¹⁶Hau: thang: houg: bang: gi Sodom voogung ri yo" byu myang: wa da" joyoo daloem: khyoo: yhe: lo" boem. Houg: lho: Abraham we' nyangnu" yo' dage" yhe: lho: cang de" kaid.

¹⁷Houg: lho: ASEING gi nya: gung nyang: «Ngoo ci yhe: koid wa khyoo: Abraham ri anau zau" too".

¹⁸Nya: amyed ashen yigi byumyu" zeing- yoem: bo da" byumyu" bue" loo wa nghoid. Nyang: khyo" wigi ngoo gi byumyu" dangain" bang: ri mainkaid byid: wa.

¹⁹Nyang: gi nya: zoo: yi yo' amyed ashen yigi ngoo ri phau" myang: lho: jo da" khyoo: yo' deing byeung" da" moo" zei: wa shid re" tid wa su: khyo" ngoo gi nyang: ri khyen: too" bye:. Nyangnu" tam" gyo: boem nghoid rigi ngoo we' nya: shid re" dangain" koid byid: wa ein: ngoo dangsoo" byid: too" bye:» ga: tid.

²⁰Hau: thang: ASEING Abraham ri «Sodom yo' Gomora da" gyoug pho" yooboo foin: dang: yo' nyangnu" da" yooboo gi gye" gyi: nyid bye:.

²¹Ngoo shau" gyo: da" yooboo foin: nyho: yoid dang: thui: gi deing adeing ziri yhe: myang wa shid re" ngoo gyoo" yhi: wa» ga: tid.

²²Hau: thang: yuggi phoo eig yug gi Sodom shoid khyoo: yhe: loo" khare" boem. Nghoid loug we' ASEING gi Abraham yo' dage" nyid gyoo" kho'.

²³Abraham gi ASEING jhang tain" yhe: lho: «Nang gi yooboo ayoo" mo, ri yooboo yoo" mo, yo' dage" deing" deing phyo' shoin pyam wa bye: la".

²⁴Hau: voomoo" moo yooboo ayoo" mo, wim: xi: yug nyid ri nang gi voomoo" davoo goin" ri phyo' pyam wa la". Hau: wim: xi: yug da" gang mo khyam" sa: ayoo" wa la".

²⁵Nang gi deing" deing nyang: yooboo ayoo" mo, ri yooboo yoo" mo, yo' dage" said pyam wa su: anghoid. Nang gi hougsu" koid wa su: anghoid. Nang to' koid nghoid rigi yooboo ayoo" mo, gi yooboo yoo" mo, yo' dage" shen" yhen shau" boem wa nghoid. Hougsu" gi koid wa anghoid. Moug: gyab goin" mo tarha" agyi gi deing byeung" khyo" koid wa zi nghoid» ga: tid.

²⁶ASEING gi «Sodom voomoo" moo yooboo ayoo" mo, wim: xi: yug nyid nghoid rigi hau: bang: da" gang mo davoo goin" ri khyam" sa: byid: wa» ga: tid.

²⁷Abraham doem xo' wigi «ASEING we" jeju" mo doem xo' lho: voem" tid nyid khyoo: ri yooboo abyid:. Ngoo gi xangsu: byu nghoid wigi ce: dang: dakhoin" lang" tid moin: su: anghoid.

²⁸Nghoid loug we' houg: moo yooboo ayoo" mo, wim: xi: anghoid loo za: myid: xe: wim: yug nyid rigi davoo goin" ri phyo' pyam shi" wa lha". Khasu" wim gari wim: yug za: date" yoem" the» ga: tid. ASEING gi «Yooboo ayoo" mo, myid: xe: wim: yug nyid rigi ngoo gi voomoo" ri aphyo' pyam wa» ga: phug tid.

²⁹Abraham gi «Houg: moo myid: xi: yug za: gi to' nyid abe» ga: doem tid. ASEING gi «Myid xi: yug nyid rigi ngoo gi voomoo" ri aphyo' pyam wa» ga: phoug tid.

³⁰Abraham gi «ASEING we"- nheig ayoo: lhe"- ngoo doem tid shi" wa. Soem" xi: yug kyeing" za: nyid rigi khasu"» ga: tid lang" ASEING gi «Soem" xi: yug nyid rigi ngoo aphyo' shoin wa» ga: tid.

³¹Abraham gi «ASEING we"- doem xo' lho: voem" tid khyoo: ri yooboo khyoid byid: la. Tid shi" ba. Eig xi: yug ri za: myang rigi khasu"» ga: doem tid. ASEING gi «Eig xi: yug ri shau" myang nghoid rigi ngoo gi voomoo" ri aphyo' pyam wa» ga: tid.

³²Abraham gi ASEING we"- nheig gi ayoo: lhe"- ngoo dalheing: za: datid loo wa. Daxi: yug ri kyeing" za: shau" myang rigi khasu"» ga: tid lang" ASEING gi «Houg: moo daxi: yug nyid rigi hau: voomoo" ri ngoo apyo' pyam wa» ga: tid.

³³Nyang: gi Abraham yo' dang: bain tid thang: ri ASEING loo" khare" lho: Abraham gi yhoem: khyoo: tau" lo.