Read Lashi APOEM AYANG: 19 Bible Online

APOEM AYANG: 19 - Lashi bible

APOEM AYANG: 19

¹Moug: lagyoo: eig yug Sodom voomoo" khyoo: ju" re" lo da" hau: myen" thang: ayo, moo Lod gi voomoo" da" khoem" moo" duang: yang: moo zhung: jo. Hau: tang: ri myang yo' dage" nyang: gi to' lho: yhe: shoug" bye:. Nyang: gi nya: tang: da" shidkhoin" moo yhe: goeb pid lho:

²«Nheig bo ludaid tang: we"- ngoo gi re" tang: ri dei zhoo" wa shid re" nyid nyid zi nghoid. Jeju" mo nga" yhoem: khyoo: ri" we'. Re" tang: da" khyid: cid" lho: myen" ri nga" jang" moo yo" theing: wa bye:. Nab soin: ju" lang" no' to' lho: re" thang: da" gyung: khyoo: doem xo' ge'» ga: tid. Nghoid loug nya: tang: gi «Voomoo" khoug: hid: moo damyen goin" theing: wa zigi age bui"» ga: tid.

³Nyang: gi nya: tang: ri dalhung: nyid yoomo thang" thang moo gi nya: tang: gi nyang: yo' dage" nya: yhoem: khyoo: cang loo" bye:. Lod gi nya: dei zoo: yiri being" voo tang: shid re" zooyho' ri bung: nhang: lho: shoo" ri we' ngham" ngham" yhung nhang: bye:. Nyo, lang" nyangnu" gi zo: boem ago".

⁴Being" voo tang: ayhoeb shi" ri Sodom voo mo yuggi yigi yhoem: lheing khab' re" nyid boem. Davoo goin" mo yuggi yi gyi: zoo: nge zoo: dangain" houg: moo re" nyid nyid boem.

⁵ Nyangnu" gi Lod ri khe: thu yu lho: «Akhamyen re" yhoem: moo theing: da" yuggi eig yug gi khamoo: nyid lha". Nya: tang: ri ngoonu" jhang thu loo nhang: we"» ga: tid. Sodom mo yuggi yigi hau: tang: yo' gung shoo" zoem" nau nyid boem.

⁶Lod gi tunggung khyoo: thu yhe: lho: nya: nungthang khyo" khoem" ri myhid" to" lho:

⁷Nyangnu" ri «Mang: nhung" yi we"- houg: te" ashoeb mo" azei: goo"- ngoo nanu" ri mho' yoid.

⁸Yu" ge'. Ngoo myiyi: nu" eig yug yo". Nya: tang: gi zoomyi: gyeing" nyang: danghoid ashi". Ngoo gi nya: tang: ri nanu" jhang ri" nhang: wa. Nya: eig yug ri cikoid nau ri koid ge'. Nghoid loug we' he: being" voo tang: rigi ci: we' akoid goo". Nya: tang: gi nga" being" voo nghoid yoomo nya: tang: ri ngoo goem loem byid: ca"» ga: tid.

⁹Nghoid loug we' nyangnu" gi «Tungbau byu nang houg: moo akung" keig nyid. Nang gi ci te" su: nghoid wigi ngoonu" ri re" tid nyid la". Ngoonu" khyoo: moo anyid nyid. Nya: tang: ritho' nang ritoug: je" thain: sho' dam tab wa bye:» ga: tid lho: nyangnu" gi Lod ri doin: goin pyam lho: khoem" duang: ri doin: phoid pyam wa tain" lo boem.

¹⁰Nghoid loug yuggi eig yug gi akhoug: shoid khyo" thu re" lho: Lod ri yhoem: khoug: khyoo: she: fang yu wigi khoem" myhid" pyam.

¹¹ Hau: thang: nya: tang: gi tunggung shoid mo yuggi yi dangain" ri khoem" duang: ayo" myang sho' myo, jed nhang: pyam.

¹²Byu eig yug gi Lod ri «Hid moo nang yo' sen: da" byu- zooshang: yi anghoid lang" gootu: beig zoo: mang: nhung" yi he: voo moo nyid shi" nghoid rigi nyangnu" ri shu" ci: lho: hid: mo thu loo" we'.

¹³Khasu" wim gari nga" tang: he: voo ri phyo' shoin' pyam wa bye:. ASEING gi he: voo byu yi da" gyoug pho" yooboo foin: thui: ri shau" gyo: lho: Sodom ri phyo' shoin' pyam wa shid re" nga" tang: ri nhang: kaid bye:» ga: tid.

¹⁴Houg: lang" Lod gi nya: zoo: tang: ri yu wa zoo mo, tang: jhang yhe: lho: «Myab too' ge' hid: mo thu loo" loo shang. He: joyoo ri ASEING gi phyo' shoin' pyam wa bye:» ga: yhe: tid. Nghoid loug we' nyangnu" gi Lod ri zoozi" re" ze" nyid ga: jho: boem.

¹⁵Moug: boo" zoo" ri moug: lagyoo: tang: gi Lod ri myab myab koid wa shid re" doem tid. Nya tang: gi «Myab myab koid we' re" yhoem: seing: myhi'- re" zoo: myiyi: nu" tang: ri shu" ci: lho: voomoo" ri phyo' shoin' pyam uri nanu" da" kangso' aci: phyug baja" thu loo" loo ge'.

¹⁶ Lod gi nhe" nyid. Nghoid loug ASEING gi nyang: ri nheig khyeug yoomo yuggi tang: gi nyang: ri we' nya: yhoem: seing: myhi' ri we' houg: lho: nya: zoo: tang: ri we' lo, yo' she: lho: voomoo" tunggung khyoo: nyangnu" ri yhe: de" thu kaid.

¹⁷Hau: thang: moug: lagyoo: dayug su: gi «Nanu" kangso' shid re" gei phang: ge'. Atau" lheing: yu" goo". Pa: dam khoug: moo atheing: goo". Nanu" ashid: wa shid re" boem khyoo: gei ge'» ga: tid kaid.

¹⁸Nghoid loug Lod gi «Nheigboo ludaid we"- jeju" mo ngoonu" ri hougsu" gyeing" gi akoid nhang:.

¹⁹Nang gi nga" kang: byoin sho' ngoo ri ge khyo" koid abye:. Nghoid loug boem gi gye ve: ashi"- shid: gyoin gi ngoo ri zang" lho: ngoo gi hau: joyoo khyoo: aju" shi" ri shid: khari" wa bye:.

²⁰Voogung nu" ri nang myang la" hau: zigi ajhang khyeing". Nang myang da" voogung nu" zoo: khyoo: ngoo ri yhe: nhang: lho: ngoo ri loid byoin nhang: we'» ga: tid.

²¹Moug: lagyoo: gi «Gi bye:- ngoo hau: voo ri aphyo' pyam wa.

²²Myab myab gei phang: ge'. Nanu" hau: joyoo moo ju" sho' ngoo gi ci: we' yo" koid wa zi anghoid» ga: tid. Khasu" wim gari Lod gi hau: voo ri nge ga: tid yoomo hau: voogung ri Zora ga: myeing byid: bye:.

²³Lod gi Zora khyoo: ju" lo uri bid xain" loo bye:.

²⁴ ASEING gi nyeigdain tung" Sodom yo' Gomora tho' khyoo: fang myi: moug: vo khyo' kaid lho:

²⁵Voomoo" yo' pa: dam dangain" mo byu yi dangain" ri we' myid moo yug da" aja: ja: dangain" ri we' phyo' shoin' pyam bye:.

²⁶ Nghoid loug we' Lod da" yhoem: seing: myhi' gi lheing: yu" kaid wigi xoo" zeing bui" khari" bye:.

²⁷Thang: nab soin: no' ri Abraham gi ASEING yo' nyang: yab jo, da" joyoo khyoo: myab myab yhe: lho:

²⁸Nyang: gi Sodom yo' Gomora- Pa: dam dangain" khyoo: yu" kaid wigi myikhyoem' moo" mo myikhoug" yhang: ti" myidjang mo myikhoug" neing" do, nyid ziri myang kaid.

²⁹Nghoid loug Mangsoo gi Lod nyid nyid da" pa: dam voomoo" ri phyo' shoin' pyam uri nyang: gi Abraham ri boin: so" nyid yoomo Lod ri shid: wa jang" mo loid byoin loo" nhang: bye:.

³⁰Lod gi Zora moo nyid nyid wa gyoug ci yoomo nyang: gi nya: zoo: myiyi: nu" tang: yo' boem khyoo: xo' yhe: lo" lho: lug khyung: khoug: moo yhe: nyid nyid.

³¹Bi: zeing gi nya: nhung" ri «Nyha" phoo gi gye" mang: bye:. Houg: lho: nyha" tang: ri zooshang: yo" yoo" nhang: sho' lo, xo' yu wa da" yuggi yi moug: gyab goin" moo hang" anyid loo.

³²Nyha" phoo ri yhid: jhug yid nhang: to" wigi nyang: yo' vang yhoeb lho: zooshang: tab yu shang» ga: tid.

³³Hau: myen ri zabyid yhid: ri jhug lho: bi: zeing yug gi nya: phoo yo' gung shoo" zoem" bye:. Nghoid loug nya: phoo gi yhid: soung yid yoomo hau: khyoo: ri asi'.

³⁴Thang: nyid" moo bi: zeing yug gi «Ngoo gi nyang: yo' amain yhoeb yu bye:. Akhamyen we' yhid: yed sho' nyang: ri akhid" doem jhug shang. Houg: lho: nang doem vang yhoeb we'. Houg: lang" eig yug goin" nyha" pho jang" mo zooshang: yo" tab yu wa nghoid» ga: nya: nhung" yug ri tid.

³⁵Houg: yoomo hau: myen ri nya: tang: gi nya: phoo ri yhid: jhug lho: nhung" yug gi nya: pho yo' vang yhoeb. Hau: myen we' nyang: gi yhid: sung yid yoomo hau: khyoo: ri nyang: aboin:.

³⁶Hid: khyo" wigi Lod da" myiyi: zoo: tang: gi nya: pho jang" mo zoonu" gung bue" loo bye:.

³⁷Bi zeing yug gi yuggi nu" dayug ri khu: lho: nyang: ri Moba ga: myeing myheing bye:. Nyang: gi akhid" nyid" ayo, mo Moba byumyu" da" phoug" phyid" bue" loo bye:.

³⁸Bi laid yug we' yuggi nu" dayug ri co' phyed wigi nyang: ri Benammi ga: myeing myheing bye:. Nyang: gi akhid" ayo, mo Amon byumyu" da" phoug" phyid" bue" loo bye:.