Read Lashi APOEM AYANG: 2 Bible Online

APOEM AYANG: 2 - Lashi bible

APOEM AYANG: 2

¹Houg: khyo" wigi mougkhung: myidjang yo' jo, moojo, dangain" ri bain phain" so: too" bye:.

² Nyhed nyid" ein: wa da" bidnyid moo: Mangsoo gi zei: lo moo" dangain" bain zei: lho: moo" zoo" no: pyam bye:.

³Hau: bidnyid gi nya: phain" so: moo" bain lho: moo" zoo" no: pyam da" bidnyid nghoid yoomo nyang: gi nyhed nyid" ein: wa da" nyid" ri mainkaid byid: lho: gooki' lid da" bidnyid danyid" khyo" to" too" bye:.

⁴He: zigi mougkhung: myidjang ri khasu" phain" so: to" da" khyoo: nghoid. ASEING Mangsoo gi mougkhung: myidjang ri phain" so: uri

⁵Mougmyid tho' moo mhain" we' ayug shi" ziyo' amyoug: ashi" we' anyug abain toid shi"- khasu" wim ga: ri nyang: gi moug: avoo nhang: shi" ziyo' hau: ziri yu" coung: wa byu we' anyid.

⁶Nghoid loug we' gyid gi myid thi" mo thu lo wigi myidjang ri deig jhu' nhang: loo bye:.

⁷Hau: thang: ASEING Mangsoo gi myidjang mo myidzhoo" dajhi' ri yu lho: hau: ziyo' byu dayug alhoo: koid- nyang: gi hau: yug da" nhoo: khyung: moo kangso' ri moid kaid byid: wigi hau: byu gi kang: dei loo bye:.

⁸Hau: thang: ASEING Mangsoo gi bidthu shoid Eden moo khyam: daloem: ri koid to" lho: houg: mo nyang: phain" so: to" da" byu ri nyhid: too" bye:.

⁹ Nyang: gi yu" yung" tung" da" seiggam joem aja: ja: dangain" ri houg: mo yug ri" nhang: lho: ge da" seigshi" vooshi" ri zei: nhang:. Khyam: da" agung moo kangso' shigam yo' ge ziyo' age ziri se' kho nhang: da" lasi laleug shigam yug jo,.

¹⁰Gyid dalang gi Eden moo yau lho: khyam: ri jhu' nhang:. Eden khyam: mo lid lang" hau: gyid lang gi gyid lang myid: lang bui" khari" bye:.

¹¹Xang: shi" da" gyid lang ri Pishun- Hau: gyid lang gi Havila mungdain: mo lheing khoem yau nyid. (

¹²Houg: moo sheing: gyeing" thu lho: yoo" yau: da" nam pyo: ja: yo' phoug" dab da" lug joem thu jang: nghoid.)

¹³Eig lang ein: wa da" gyid lang gi Gihon nghoid lho: Khusha mungdain: goem: sho' yau nyid.

¹⁴Soem" lang ein: wa da" gyid lang gi Tigri nghoid lho: Asuri da" bidthu shoid moo yau nyid wigi myid: lang ein: wa da" gyid lang gi Uphrad lang nghoid da:.

¹⁵Houg: lang" ASEING Mangsoo gi Eden khyam: ri yu" coung: lho: lhoug zung" wa shid re" houg: mo xangsu: yuggi ri nyhid: too" bye:.

¹⁶Mangsoo gi nyang: ri «Nang gi khyam: khoug: mo kha: gam mo shi" ri we' phyo' zoo: we'

¹⁷ge ziyo' age ziri se' kho' da" lasi laleug shigam mo ashi" ri za: azoo:. Nang gi hau: agam mo ashi" ri age zoo: wa. Nang zo: nghoid rigi hau: nyid" moo shid: loo" wa nghoid» ga: tid.

¹⁸Hau: thang: ASEING Mangsoo gi «yuggi gi nyang: dayug kyeing" za: nyid nyid wa agi. Nyang: ri pang" thoug wa shid re" du nyeing" da" byencang" dayug ri ngoo phain" so: wa» ga: tid.

¹⁹Houg: yoomo Mangsoo gi myidjang mo gougnyhoug joem dangain" yo' ngho' joem dangain" ri phain" so: too" bye:. Nyang: gi houg: bang: ri myeing myheing nhang: wa shid re" hau: byu jhang khyoo: shu" lo" lho: nyangnu" dangain" bang: ri" myeing lhoem: myheing byid: bye:.

²⁰Xangsu: yuggi gi ngho' joem dangain" yo' gougnyhoug joem dangain" ri myeing myheing byid: bye:. Nghoid loug hau: bang: mo kha: ja: we' nyang: ri pang" thoug wa byencang" gi abui" shi".

²¹Hau: thang: ASEING Mangsoo gi yuggi ri yhoeb moo" myi" nhang: lho: yhoeb nyid uri nam cam" youg: dakhaid ri she: yu wigi houg: moo: shoo" pyeing bye:.

²²Namcam" shooyoug: mo myiyi: dayug ri phain" so: lho: nya: jhang khyoo: shu" yhi: byid: bye:.

²³Houg: lang" xangsu: yuggi «Akhid"- he: zigi nga" shooyoug: mo shooyoug:- nga" shoo" mo shoo" nyang: nghoid bye:. Nya: myeing gi myiyi: nghoid- khasu" wim ga: ri nyang: gi yuggi mo she: thu too" su: nghoid» ga: tid.

²⁴ He: da" zigi ce: gang mo yuggi zoo: gi nya: phoo yo' nya: myhi' ri too" kho' wigi nya: yhoem: seing: myhi' yo' dage" nyid lho: nya: tang: gi dagung dashoo" za: bue" lo khyoo: nghoid.

²⁵Hau: yuggi yo' myiyi: gi eig yug goin" shoocen: doem: nghoid nyid boem ago"- nghoid loug we' gyoug sho' khyoo: ci: ajo.