Read Lashi APOEM AYANG: 20 Bible Online

APOEM AYANG: 20 - Lashi bible

APOEM AYANG: 20

¹Abraham gi Mamre mo Khanan da" mougpyi: shoid du khyoo: byung: khare" lho: Kadesha yo' Shura agyoo: moo yhe: nyid. Hau: thang: Gerara moo doem yhe: nyid nyid uri

² nyang: gi nya: yhoem: seing: myhi' Sara ri nya: nhammoo" nghoid ga: tid. Houg: yoomo Gerara mo khokham Abimeleg gi Sara ri lhoem: shu" yu.

³Damyen rigi Mangsoo Abimeleg jhang yhoebmo, moo re" wigi «Nang gi he: myiyi: myhi' ri shu" yu yoomo nang shid: wa bye:. Nyang: gi yhoem: yoo" bye: su: danghoid» ga: re" tid.

⁴Nghoid loug we' Abimeleg gi hau: myiyi: myhi' nam moo lang" atain" shi" zi nghoid yoomo nyang: gi «ASEING we" ngoo ce: yooboo ayoo". Nang gi ngoo yo' nga" byumyu" yiri said pyam wa la".

⁵Abraham nyang: Sara ri nya: nhammoo" nghoid ga: tid lho: Sara nyang: we' dakhyoo" ti" tid ago". Ngoo gi he: khyoo: ri nheigloem: yung" yung" dazei: wigi ngoo gi ci: shoid khyoo: we' ajo, shi"» ga: tid.

⁶Mangsoo gi yhoebmo, moo doem tid zigi «Nghoid- nang gi nheigloem: yung" ziyo' khasu" koid ziri ngoo se'. Houg: yoomo nang yooboo azang" koid wa shid re" ngoo gi nang ri goem loem yu bye: zi nghoid. Nyang: ri nang zang" thung" wa amyeing" akhang" abyid:.

⁷Myiyi: myhi' ri nya: yhoem: seing: pho jhang akhid" nyang: doem tau" byid: re. Nyang: gi lapi: nghoid. Nyang: gi nang ri ashid: loo sho" re" shid re" akyu" yo" mho' byid: wa nghoid. Nghoid loug we' nang adoem toug" byid: nghoid rigi nang gi shid: wa. Nang yo' re" mung" byu yi dangain" gi shid: wa nghoid ein: ziri ngoo nang ri tid poin" bye:».

⁸Thang: nab soin: no' re Abimeleg gi nya: moo" voin mo, dangain" ri khe: yu lho: bue" loo bye: da" khyoo: ri tid kyo" wigi nyangnu" gyoug: nyid boem.

⁹Hau: thang: Abimeleg gi Abraham ri khe: yu lho: «Nang gi ngoonu" ri cikoid lha". Nang gi ngoo yo' nga" mungdain: atho' moo he: shid: gyoin, ri ci: vang re" sho' ngoo gi nang ri ci ze" shoid bye: lha"- nang ngoo ri koid ti" hang" age koid.

¹⁰Nang ci: yoomo hid: su" koid la"» ga: myid:.

¹¹Abraham doem phug tid zigi «He: joyoo moo Mangsoo ri gyoug phau" myang mo, hang" we' anyid wigi nyangnu" gi ngoo ri said pyam lho: nga" yhoem: seing: myhi' ri seing: yu boem goo" wa nghoid ein: ngoo jho:.

¹²Nyang: gi gyeing" nyang: nga" nhammoo" nghoid- Nyang: gi nga" phoo nya: zoo: nghoid. Nghoid loug we' nga" myhi' mo anghoid wigi ngoo nyang: ri yu to" zi nghoid bye:.

¹³Houg: yoomo nga" pho yhoem: mo tungbau moug: khyoo: Mangsoo ngoo ri nhang: kaid uri ngoo nyang: ri ‹Ngoo gi re" mang: nghoid khyoo: yugkhang" moo" ri tid kyo" wigi nang ngoo ri gye" phau" myang: khyoo: ci: shug ca" wa zi nghoid›» ein: tid.

¹⁴Hau: thang: Abimeleg gi Sara ri Abraham jhang doem toug" byid: lho: houg: jang: nyang: ri yang kyung- nu: kyung yo' join joem ri we' byid: kaid.

¹⁵Nyang: gi Abraham ri «He: zigi nga" mougmyid nghoid- nang nyid nau da" joyoo khamoo: nghoid loug nyid we'» ga: tid.

¹⁶Sara ri we' «Nang gi ce: yooboo ayo" khyoo: re" byu yi dangain" shidkhoin" moo sagse: khyo" ngoo gi re" mang: ri ngei pyi" dakhyeing" byid: bye:. Nang gi ci: akoid shoid khyoo: ri yugkhang" moo" si' baja"» ga: tid.

¹⁷Abraham da" yhoem: seing: myhi' Sara bue" loo bye: da" moo" zoo" yoomo ASEING gi Abimeleg da" khoo" khoug: mo myiyi: hang" ri we' zooshang: age yoo" sho' koid to". Houg: yoomo Abraham gi Abimeleg shid re" akyu" mho' byid: wigi Mangsoo gi nyang: ri byang" gi byid: bye:. Mangsoo gi Abimeleg da" yhoem: seing: myhi' ri we' join myhi' joem ri we' byang" gi byid: bye:. Houg: yoomo nyangnu" zoo: doem ge yoo" bye:.