Read Lashi APOEM AYANG: 22 Bible Online

APOEM AYANG: 22 - Lashi bible

APOEM AYANG: 22

¹ Hau: thang: khamyhang amyang" ri Mangsoo gi Abraham ri jham" yu" bye:. Mangsoo gi nyang: ri «Abraham we"» ga: khi: lang" Abraham we' «Nyid- ngoo hid: moo nyid» ga: tu" kaid.

²Mangsoo gi «Nang gye" jheddab da" zooti" zoo: Isag ri shu" ci: lho: Moria joyoo khyoo: yhi: we'. Houg: mo ngoo nang ri toin' shid wa da" boem daloem: da" atho' moo nyang: ri xoin" du: khyo" ngoo ri ngei" byid: we'» ga: doem tid.

³Thang: nab soin: no' ri Abraham gi xoin" yhe: ngei" wa thang" doem: phyed wigi nya: loo zei ri yoovoin soin' lho: Isag yo' nya: dei zoo: eig yug shu" yhe: lo". Nyangnu" gi Mangsoo nyang: ri tid da" joyoo khyoo: so" yhe: lo" boem bye:.

⁴Soem" nyid" ein: da" nyid" ri Abraham gi shang" yen" zoo: ve: da" jang moo joyoo ri myang kaid.

⁵Hau: thang: nya: dei zoo: tang: ri hid moo loo zei: yo' nyid lang" ge'. Nga" phatang: gi xo' do, yhe: lho: xoin" ngei" wa. Hau: thang: ri nga" phatang: doem tau" gyo" loo wa» ga: tid.

⁶Abraham gi Isag ri xoin" ngei" wa da" thang" ri vu, nhang: lho: nyang: gi shamcoin" yo' myi: ri ci: nya: phatang: dage" do, lo" nyid da" uri.

⁷Isag gi «Nga" pho we"» ga: yoid. Nyang: gi «Nga" zoo: we"» ga: doem tu" bye:. Isag gi «Thang" yo' myi: ci: ziri gi ngoo myang bye:- nghoid loug xoin" ngei" wa yang gi khayoo: nyid lha"» ga: myid: bye:.

⁸Abraham gi «Hau: xoin" du: ri Mangsoo nyang: nyheing byid: wa bye:» ga: tid lho: nya: phatang: gi dage" xo' do, lo" boem.

⁹Mangsoo tid da" hau: joyoo moo nya phatang: ju" lang" Abraham gi phoin: daloem: ri zhoug lho: houg: moo thang" zang zang bye:. Nyang: gi nya: zoo: ri myheig tei" lho: nyang: ri phoin: mo da" thang" zang tho' moo ke" kaid bye:.

¹⁰Hau: thang: nya: zoo: ri said wa shid re" shamcoin" ri tu: yeung too" bye:.

¹¹Nghoid loug ASEING da" moug: lagyoo: gi mougkhung: khyo" nyang: ri «Abraham- Abraham» ga: yoid kaid. Nyang: gi «Nghoid ngoo hid moo nyid» ga: doem phug tid kaid.

¹²«Zooshang: ri azang" thung"- nyang: ri ci: we' akoid» ga: tid thu lo lho: «Nang gi Mangsoo ri gyoug phau" myang nyid su: nghoid ziri akhid" ngoo si' bye:. Khasu" wim gari nang gi re" zooti" zoo: ri ngoo ri byid: wa ci: vhoo" abyed nghoid da:» ga: tid.

¹³Abraham gi aqei: ayam khyoo: yu" kaid ri yang loo: dadu: mhain" gyoem" moo nya: khyoug: yo' ye" myi" nyid ziri myang kaid. Nyang: gi hau: yang ri yhe: she: yu lho: nya: zo: da" gungthid xoin" ngei" byid: bye:.

¹⁴Abraham gi hau: joyoo ri «ASEING nyheing byid:» ga: myeing myheing bye:. Akhid" nyid" ju" sho' lhang" byu yigi «ASEING da" boem tho' moo nyang: nyheing too" byid: bye:» ga: tid nyid boem.

¹⁵ASEING da" moug: lagyoo: gi Abraham ri eig lheing: khyo" mougkhung: mo doem khe: zigi

¹⁶ «Ngoo gi ngoo nya: myeing khyo" thang" cab too" bye:. Nang ri ngoo athang agoin mainkaid byid: wa ga: ASEING gi tid nyid. Khasu" wim ga: ri nang gi re" zooti" zoo: ri ngoo ri byid: wa ci: vhoo" abyed nghoid da:.

¹⁷ Mougkhung: mo kyi: joem yhang: ti"- panglai: gyid yam mo midcoo: yhang: ti" myo: da" amyed ashen myoo" sho' ri ngoo nang ri byid: wa ein: ngoo dangsoo" byid: bye:. Re" da" amyed ashen yigi nyangnu" da" gyivoo joem ri oung: pyam wa nghoid.

¹⁸ Ngoo gi re" amyed ashen yiri mainkaid byid: yhang: ti" byumyu" bain sho' bang: we' nyangnu" ri mainkaid byid: wa shid re" ngoo ri mho' loo wa nghoid. Khasu" wim gari nang gi dang: ri tam" gyoo: yoomo nghoid bye:» ga: tid.

¹⁹Abraham gi nya: dei zoo: tang: jhang tau" gyoo" lo" lho: nyangnu" gi Abraham nyid da" joyoo Berasheba khyoo: dage" lo boem bye:.

²⁰Hau: thang: amyang" ri Abraham gi nya: nhung" Nahora da" yhoem: seing: myhi' Mikha gi zooshang: shid yug khu: khyoo: ri se' yu da:.

²¹Houg: bang: gi zooshid" yug Uza yo' mang: laid yug gi Buza- Aram da" nya: phoo Kemuela-

²²Khesed- Hazo- Piledasha- Yidlab yo' Bethuela bang: nghoid lho:

²³Bethuela gi Rebekha da" nya: phoo nghoid. Mikha gi Abraham da" nya: nung" Nahora shid re" hid: bang: shid yug ri khu: byid: bye:.

²⁴Nahora da" dangcang: myhi' Reuma we' Teba- Gaham- Thahasha yo' Makha bi" ri khu: byid: bye:.