Read Lashi APOEM AYANG: 24 Bible Online

APOEM AYANG: 24 - Lashi bible

APOEM AYANG: 24

¹Abraham gi akhid" gye" mang: bye:. ASEING we' nyang: ri nyang: koid da" moo" zoo" khang" moo" moo mainkaid byid: nyid.

²Nyang: gi nya: da" gyi: thang dei zoo: nghoid da" nya: da" jonu" dangain" ri zoem: su: ri «Re" lo, nga" tang" boug" agyoo: moo kaid lho: dang: theing theing we'.

³Nga" zo: shid re" yhoem: seing: myhi' ri he: da" Khanan mung" moo nyid da" byu yi khoug: mo ngoo ashoo: wa ein: lho: mougkhung: myidjang da" ASEING Mangso myeing khyang" moo nang ri dang: theing nhang: nau.

⁴Nang gi nga" da" co' phyed moug: khyoo: tau" lo" lho: nga" bidnoem yi akhoug: mo za: nga" zoo: Isag shid re" yhoem: seing: myhi' lo" shu" we'» ga: tid.

⁵Nghoid loug we' dei zoo: gi «Myiyi: nu" gi yhoem: yo' ayo" gang: wigi ngoo yo' dage" hid: khyoo: acang lo nghoid rigi khasu" koid wa. Re" zoo: ri re" da" co' phyed moug: khyoo: lo" shu" di" wa la"» ga: myid: bye:.

⁶Abraham gi: «Goo" lhoo: xoem" too" we'- nga" zoo: ri houg: khyoo: alo" shu" di".

⁷Mougkhung: Mangsoo ASEING gi ngoo ri nga" da" myhi' phoo yhoem: mo we' nga" bidnoem yi da" moug: mo we' shu" thu lo lho: he: da" mougmyid nga" amyed ashen yiri nyang: byid: wa ga: nyang: gi ngoo ri geung: teing da" dangsoo" byid: too" bye:. Mangsoo gi nya: moug: lagyoo: ri re" shid khyoo: nhang: kaid wa. Houg: yoomo nang ri hau joyoo mo nga" zo: shid re" yhoem: seing: myhi' dayug shoug" yu wa zi nghoid.

⁸Myiyi: nu" gi nang yo' dage" anau cang lo nghoid rigi he: da" dang: theing mo nang loid wa bye:. Nghoid loug we' cite" sei: thu loug nga" zoo: ri houg: khyoo: age shu" tau" loo" wa» ga: tid.

⁹Houg: yoomo dei zoo: gi nya: lo, ri nya: aseing: Abraham da" tang" boug" agyoo: moo kaid lho: Abraham tid ziri cang koid wa shid re" dang: theing theing yu bye:.

¹⁰Abraham da" jonu" ziyoo ri zoem: da" dei zoo: gi nya: yhoem: seing: da" gola-ug daxi: du: ri she: ci: lho: Nahora nyid jang: Mesopotamia da" mougzhung: shoid mo voomoo" khyoo: yhe: loo" bye:.

¹¹Hau: voomoo" moo ju" lang" vooyam moo jo, da" gyid thung" nam moo gola-ug joem ri vhoeb nhang: lho: nyid nyid. Hau: ayo, gi myhi' mi" yi gyid lhung re" kham: da" myid" thang: zoo" ayo, nghoid bye:.

¹²Nyang: gi «Nga" yhoem: seing: Abraham da" ASEING Mangsoo we"- nga" yhoem: seing: ri byid: to" da" re" dangsoo" ri boin: soo" byid: lho: akhanyid" ngoo ri oung: doid khyoo: byid: we' o".

¹³Voomoo" mo zoomyi: yi gyid re" kham: wa da" joyoo gyid thung" hid: moo ngoo nyid nyid.

¹⁴Ngoo gi houg: bang: moo dayug su: ri ‹Jeju" mo re" gyid jhuang: khyo' lho: ngoo ri gyid dajhi' shug nhang: we› ein: tid wa. Houg: lang" ‹Shug shang- houg: lho: re" da" gola-ug joem ri we' ngoo gyid kham: jhug byid: ba› ga: lhoem: tid nghoid rigi hau: myiyi: gi re" dei zoo: Isag da" shid re" nang khyen: byid: da" yhoem: seing: myhi' nghoid baja". Hid su" bue" lo nghoid rigi nga" yhoem: seing: ri nang byid: to" da" dangsoo" ri nang boin: soo" byid: nyid abye: da: ein: ngoo se' yu wa nghoid» ga wigi akyu" mho'.

¹⁵Nyang: akyu" abain mho' shi" ri Rebekha gi nya: kootho' moo gyid jhuang: ri vu ci: lho: ju" re" loo bye:. Nyang: gi Abraham da" nya: nung" Nahora yo' nya: yhoem: seing: myhi' Milkha da" nya: myid: Bethuela da" nya: zoo: myiyi: nu" nghoid.

¹⁶Nyang: gi atho' tid young" wigi zoomyi: gyeing" nyang: danghoid ashi". Nyang: gi gyid thung" khyoo: gyoo" yhe: lho: nya: gyid jhuang: moo gyid kham: pyeing yu wigi doem tau" lo.

¹⁷Dei zoo: gi hau: yug jhang tang" yhe: lho: «Jeju" khyo" re" gyid jhuang: mo gyid ngoo ri dajhi' jhug la» ga: yhe: tid.

¹⁸Hau: myiyi: gi «Aseing: we"- shug shang» ga: tid lho: nya: kootho' mo gyid jhuang: myab khyo' wigi shug nhang:.

¹⁹Dei zoo: phoo gyid shug gyi: lang" myiyi: nu" gi «Ngoo re" da" gola-ug joem ri we' gyid gyi: sho' kham: jhug ba lhe"» ga: tid.

²⁰Nyang: gi gyid thung" lhang" moo nya: gyid jhuang: mo gyid ri myab foid kaid lho: gyid thung" mo gyid myoo: sho' kham: jhug bye:.

²¹ASEING wigi toin" shed byid: wa su: nghoid anghoid ziri si' wa shid re" hau: yuggi phoo gi nyang: ri sam: zoo: zung" yu" nyid.

²²Gyid bain kham: jhug lang" yuggi phoo gi gye" phoug" dab da" sheing: khuang ri myiyi: nu" da" nhoo: moo lo" yu xei" byid: lho: sheing: theing" dazoem" ri we' lo, moo zhung" byid: wigi

²³«Jeju" mo re" ba" hang" nghoid. Nya: yhoem: moo ngoonu" akhamyen re" theing: wa shid re" joyoo jo, la"» ga: myid: lang"

²⁴«Nga" phoo gi Nahora yo' Milkha da" nya: zoo: Bethuela ga: su: nghoid.

²⁵Gougnyhoug joem zoo: wa khoo" hoo: yo' mhain" kyug myoo" sho' jo,. Nanu" theing: wa da" joyoo we' jo,» ga: tid.

²⁶Houg: lang" yuggi phoo gi poid thug thug lho: ASEING ri coung" pid.

²⁷Nyang: gi «Nga" yhoem: seing: byid: too" bye: da" dangsoo" khoin" ri joeb byeung" nhang: bye: da" nga" yhoem: seing: Abraham ASEING Mangsoo ri coung" o". ASEING gi ngoo ri nga" yhoem: seing: da" bidnoem yi jhang khyoo: dain" za: vhu" shi: bye:»

²⁸Myiyi: nu" gi nya: myhi' yhoem: khyoo: tang" lo" lho: bue" khyoo: dangain" ri tid kyoo" bye:.

²⁹Akhid" Rebekha jang" moo Laban ga: da" nya: mung dayug nyid nyid da:. Nyang: gi Abraham deizoo: lo nyid da" gyid thung" khyoo: gei thu loo" khare".

³⁰Laban gi nya: nhammoo" nhoo: mo sheing: khuang yo' lo, moo sheing: theing" ri myang ziyo' yuggi phoo gi Rebekha ri citid ziri shoug" gyoo: bye:. Nyang: gi gyid thung" nam moo gola-ug yo' dage" yab jo, su: Abraham da" dei zoo: jhang yhe: lho:

³¹«Ngoo yo' dage" yhoem: khyoo: loo" shang nang gi ASEING wigi mainkaid byid: shoug" su: nghoid. Ci: yoomo hid: moo nyid nyid lha". Nga" yhoem: moo nanu" shid re" we' gola-ug shid re" we' joyoo jo,» ga: re" tid.

³²Houg: yoomo yuggi phoo gi yhoem: khoug: khyoo: vang lo" wigi Laban nghoid lang" we' gola-ug joem da" yoovoin joem ri khyo' lho: khoo" hoo: mhain" kyug zho" da:. Hau: thang: nyang: gi Abraham da" dei zoo: yo' nya: byu yi khyid: cid" wa shid re" gyid ci: lo.

³³Lazoo: lashug yu vang lo ri yuggi phoo gi «Ngoo tid ca" ziri atid shi" ri ngoo azoo: shi" wa» ga: tid. Houg: lang" Laban gi «Tid yu" we'» ga: tid kaid.

³⁴«Ngoo gi Abraham da" dei zoo nghoid» ga: dang: phang

³⁵«ASEING gi nga" yhoem: seing: ri gyi" sho' mainkaid byid: wigi nyid gi su: dayug bui" nhang: too" bye:. Nyang: ri yang kyung- coid kyung yo' nu: kyung- ngei- sheing: - join myhi'- join phoo gola-ug yo' loo zei: joem byid: to" abye:.

³⁶Nga" yhoem: seing: da" yhoem: seing: myhi' Sara gi apyaid gye" gyi: mang: thang: ri yuggi nu" dayug khu: byid: wigi nga" yhoem: seing: we' nyang: moo jo, moo jo, dangain" nyang: ri byid: too" bye:.

³⁷Nga" yhoem: seing: gi nya: amyeing" ri tam" gyoo: wa shid re" ngoo ri thang" cab daloem: yo' too" bye:. Nyang: tid zigi ‹Nga" zo: shid re" yhoem: seing: myhi' he: da" Khanan mung" mo myiyi: joem ri akhyen:

³⁸Hau: gungthid nga" pho byumyu"- nga" bidnoem yi jhang lo" wigi nya: shid re" yhoem: seing: myhi' khyen: byid: wa› ga: nyang: tid.

³⁹Houg: yoomo ngoo gi nga" yhoem: seing: ri ‹Myiyi: nu" gi ngoo yo' acang lo ri khasu" koid wa› ein: myid: lang"

⁴⁰Nyang: gi ‹Ngoo loem khau: tam" gyo: nyid da" ASEING gi nang yo' dage" moug: lagyoo: nhang: byid: wigi nang ri oung: doid khyoo: byid: wa nghoid. Nang gi ngoo nya: byumyu"- nga" pho yhoem: byu yi mo yhoem: seing: myhi' dayug ri nga" zo: shid re" yo" shu" loo wa nghoid.

⁴¹Nang gi nga" bidnoem yi jhang yhe: wigi lhoem: ngeug pyam nghoid rigi nang loid byoin wa. Houg: khyo" za: re" da" thang" cab' dang: theing mo yo" loid wa nghoid› ga: phug tid.

⁴²«Akhanyid" ngoo gyid thung" moo ju" uri ngoo gi ‹Nga" yhoem: seing: Abraham da" ASEING Mangsoo ri ngoo zei: wa da" moo" moo oung: doid khyoo: byid: we'.

⁴³He: jang" moo ngoo gi gyid thung" moo nyid nyid. Myiyi: nu" dayug gyid kham: re" loo lang" ngoo gi nya: gyid jhuang: mo gyid ri mho' shug wa.

⁴⁴Hau: yug gi tam" gyo: lho: nga" gola-ug joem ri we' gyid byid: jhug nghoid rigi nga" yhoem: seing: da" zooshang: shid re" khyen: byid: da" yhoem: seing: myhi' nghoid baja"› ein: akyu" mho'.

⁴⁵thui: athu loo nga" akyu" mho' khyoo: athang shi" ri Rebekha gi nya: kootho' moo gyid jhuang: vu, ci: lho: gyid kham: wa shid re" gyid thung" khyoo: gyoo" yhe:. Ngoo gi nyang: ri ‹Jeju" mo gyid dakhyung" byid: jhug we'› ein: yhe: tid.

⁴⁶Nyang: gi nya: kootho' mo gyid jhuang: ri myab myab khyo' lho: ‹Shug shang- re" da" gola-ug joem ri we' gyid jhug ba lhe"› ga: tid. Houg: yoomo ngoo we' gyid shug lho: nyang: gi gola-ug joem ri gyid kham: jhug da:.

⁴⁷Ngoo gi nyang: ri ‹Re" myhi' phoo gi hang" nghoid lha"› ein: myid lang" nyang: gi ‹Nga" myhi' phoo gi Nahora yo' Milkha da" nya: zoo: Bethuela nghoid› ga: tid kyo". Houg: lang" ngoo gi nya: nhoo: moo: nhoo: khuang xei" byid:- nya: lo, moo theing" ri foid byid: bye:.

⁴⁸Ngoo gi poid thug thug lho: ASEING ri coung" pid bye:. Nga" yhoem: seing: Abraham da" ASEING Mangsoo ri coung" nghei bye:. Ciwim ga: ri nyang: gi nga" yhoem: seing: da" mang: nhung" yi jhang dain: nyang: shu" ri" bye:. Hau: joyoo moo nga" yhoem: seing: da" zooshang: shid re" myiyi: myang bye:.

⁴⁹Akhid"- nang gi nga" yhoem: seing: ri jeju" koid lho: gyoo: byid: nau nghoid rigi ge bui" wa ein: tid we'. Age bui" lang" we' age bui" ein: tid we'. Houg: lang" ngoo ci: xo' zei: wa ziri yo" si' wa nghoid» ga: tid.

⁵⁰Laban yo' Bethuela gi «He: moo" gi ASEING nyheing lo da" moo" nghoid yoomo nga" phatang: moo citid cang aboo.

⁵¹He: yug gi Rebekha nghoid- nyang: ri shu" loo" ge'. ASEING nya: dang: khoin" yo' dakhyoo" ti" re" yhoem: seing: nya: zo: da" yhoem: seing: myhi' bui" baja"» ga: tid.

⁵²Abraham da" dei zoo: gi he: khyoo: shoug" gyoo: lang" nyang: gi ASEING ri goeb pid wigi noku bye:.

⁵³Hau: thang: nyang: gi byimi yo' phoug" dab da" ngei yo' sheing: zi joem ri she: lho: Rebekha ri byid:. Nyang: gi nya: myhi' yo' nya: mung ri we' phoug" tab da" phoug" jhungshug ri byid: bye:.

⁵⁴Hau: thang: Abraham da" dei zoo: yo' nya: byu yigi dage" lazoo: lashug zo: shug boem lho: houg: moo yhoeb theing: boem. Nyangnu" gi nab soin: yhoeb too' lang" nyang: gi «Ngoo ri nga" yhoem: seing: jhang doem tau" loo" wa akhang" byid: goo" la» ga: tid.

⁵⁵Nghoid loug Rebekha da" nya: mung yo' nya: myhi' gi «Myiyi: nu" ri ngoonu" yo' dage" nyhed nyid" anghoid lang" daxi: nyid" nyhid: khoo' shi" we' hau: thang: dayo" nhang: kaid wa» ga: tid.

⁵⁶Nghoid loug nyang: gi «Ngoonu" ri hid: moo axo' nyid nyid nhang:. ASEING gi ngoonu" gyung: khyoo: ri oung: doid khyoo: byid: bye: yoomo ngoo ri nga" yhoem: seing: jhang doem tau" loo" nhang: goo" la» ga: tid.

⁵⁷«Myiyi: nu" ri khe: yu lho: nyang: khasu" ga: wa la' myid: yu" shang» ga: nyangnu" doem phug tid boem.

⁵⁸Houg: yoomo nyangnu" gi Rebekha ri khe: yu" lho: «Nang hid: bang: yo' cang loo" nau la"» ga: myid: lang" «Cang loo" wa bye:» ga: phug tid.

⁵⁹Houg: yoomo Rebekha yo' nya: join yiri Abraham da" dei zoo: phoo phung: bang: yo' dage" cang loo" nhang: kaid.

⁶⁰Houg: lho: nyangnu" gi «Nhammoo" nang gi moin moin sen sen da" nya: myhi' bue" loo baja". Re" da" amyed ashen yigi gyivoo joem ri zain: oung: pyam mo, bue" loo baja"» ga: da" dang: yo' mainkaid dang: tid kaid byid: bye:.

⁶¹Hau: thang: ri Rebekha yo' nya: join myhi' yigi yoovoin soin' lho: gola-ug moo do, zhung: wigi Abraham da" dei zoo: yo' dage" nyangnu" dangain" byung: thu lo" boem bye:.

⁶²Isag gi «Ngoo ri myang nyid dei nyid su: da" gyid thung"» ga: da" dain" pyoid yoo khyoo: re" lho: Khanan mung" da" mougpyi: shoid du moo re" nyid nyid.

⁶³Nyang: gi myen" thang: zoo" moo dain" pa: khyoo:- khyoo: so" yen" ri gola-ug lo nyid ziri myang kaid bye:.

⁶⁴Rebekha gi Isag ri myang lang" nyang: gi gola-ug mo gyo" lho:

⁶⁵Abraham da" dei zoo: phoo ri «Dain" pa: moo nyha" jhang re" lo nyid su: gi hang" nghoid» ga: yhe: myid:. Houg: lang" nyang: gi «Nga" yhoem: seing: nghoid» ga: dei zoo: phoo phug tid kaid. Houg: yoomo nyang: gi nya: vhuthoeb yo' nya: myonhoo: ri nghoeb pyam.

⁶⁶Dei zoo: phoo gi nyang: zei: lo khyoo: dangain" Isag ri tid kyoo" bye:.

⁶⁷Hau: thang: ri Isag gi Rebekha ri nya: myhi' Sara nyid khare" da" zoem" khoug: khyoo: shu" fang yu wigi hau: myiyi: gi nya: yhoem: seing: myhi' bue" loo bye:. Isag gi Rebekha jheddab wigi nya: myhi' anyid byug nghoid loug gye" nyid pho: nyid bye:.