Read Lashi APOEM AYANG: 25 Bible Online

APOEM AYANG: 25 - Lashi bible

APOEM AYANG: 25

¹Abraham gi Ketura ga: da" yhoem: seing: myhi' gootu: doem yu.

²Hau: myiyi: myhi' gi nya: shid re" Zimran- Yokshan- Medan- Midian- Ishabag- Shua bang: ri khu: byid: bye:.

³Yokshan gi Sheba yo' Dedan da" nya: phoo nghoid lho: Dedan da" amyed ashen yigi Ashurim- Letushim yo' Leumim bang: nghoid.

⁴Midian da" zooshang: yigi Epha- Ephera- Hanug- Abida yo' Eleda bang: nghoid. Hid: bang: dangain" gi Ketura da" amyed ashen bang: nghoid.

⁵Abraham gi nyang: yoo" mooyoo" dangain" Isag ri byid: kho'.

⁶Nghoid loug nyang: ashid: shi" ri gootu: yhoem: seing: myhi' yi mo nyang: yo' yu da" zooshang: ri jhungshug byid:. Hau: thang: ri nyang: gi hau: da" zooshang: yiri nya: zoo: Isag yo' ve: da" bidthu shoid moug: khyoo: nhang: kaid.

⁷Abraham gi apyaid 175 zain ri shid: loo" khari" bye:.

⁹Nya: zoo: Isag yo' Ishamaela tang: gi nyang: ri Heti byu Zahura da" nya: zoo: Ephron da" moug: nghoid lho: Mamre da" bidthu shoid mo Mekphela lug khyung: khoug: moo myhoeb shoung: bye:.

¹⁰ Hau: da" joyoo gi Hiti byu yi jang" mo Abraham qei to" da" joyoo mougmyid nghoid. Hau: joyoo moo Abraham yo' nya: yhoem: seing: myhi' Sara eig yug goin" ri myhoeb too" bye:.

¹¹Abraham shid: byug thang: ri Mangsoo gi Nya: zoo: Isag ri mainkaid jeju" byid: wigi nyang: gi «Ngoo ri myang nyid dei nyid su: da" gyid thung"» nam moo nyid nyid.

¹²Egutu byumyu"- Sara da" join myhi' Hagara khyo" Abraham shid re" khu: byid: da" Ishmaela gi

¹³vhoo: moo azoo" tung" lhid" to" da" zooshang: yiri yoo" bye:. Houg: bang: gi Nebaiod- Kedara- Adebela- Mibsam-

¹⁴Mishma- Duma- Masa

¹⁵Hadada- Tema- Yetura- Naphisha yo' Kedema bang: nghoid.

¹⁶Hid: bang: gi daxe: eig kung: da" phoug" phyid" yi nghoid wigi nyang: nya: myeing" yo' nyangnu" nyid da" voogung joem yo' zung jang: ri myeing myheing boem bye:.

¹⁷Ishmaela gi apyaid dasho: soem" xe: nyhed zain ri shid: loo" bye:.

¹⁸Ishmaela da" amyed ashen yigi Egutu da" bidthu shoid Asuri khyoo: so" khyang lo" da" Hawa yo' Shura agyoo: mo mougmyid cang nyid nyid boem. Nyangnu" gi Abraham da" gootu: amyed ashen yi yo' kho' lho: nyid boem.

¹⁹He: zigi Abraham da" nya: zoo: Isag da" mhoomyid: nghoid.

²⁰Isag gi pyaid myid: xi: zain nghoid uri Laban da" nhammoo" (Mesopotamia mo Aramam byu) Bethuela da" nya: zoo: Rebekha ri lo, xo' yu bye:.

²¹Rebekha gi zooshang: adab yoomo Isag gi ASEING jhang nya: shid re" akyu" mho'. ASEING gi hau: akyu" mho' dang: ri gyoo: byid: yoomo Rebekha zooshang: gung bue" loo bye:.

²²Nyang: moo zoozoem zooshang: gung bue" wigi hau: zooshang: tang: gi akhu: ri" shi" mo nya: ung: khoug: moo dayug yo' dayug byo, go" nyid ago". Nyang: gi «Ce: gang mo ngoo moo hid" su" bue" nyid la"» ga: tid. Houg: yoomo nyang: gi ASEING ri yhe: myid: bye:.

²³ ASEING nyang: ri «Re" da" ung: khoug: moo byu eig myu" lung" jo,. Nang gi shi' goo" wa da" byu eig myu" ri khu: wa nghoid- dayug su: gi dayug su: tho' je yoem: boo wa nghoid je gyi: su: gi nge yug jang" moo dei zoobui" wa nghoid» ga: tid.

²⁴Ayo, bidnyid ju" ri nyang: gi yuggi nu" zoozoem ri khu: bye:.

²⁵Xang: shi" yug gi shoo" ne lho: nya: gung goin" shoo" moug" yug yoomo nyang: ri Eso ga: myeing myheing byid:.

²⁶Thang: yug gi Eso da" khanheig thung" thang: moo teing teing zei: ci: lho: khu: thu lo. Houg: yoomo nyang: ri Yaku ga: myeing myheing bye:. Hau: zooshang: tang: khu: uri Isag gi khyug xi: zain nghoid bye:.

²⁷Yuggi nu" tang: gi gyi: lo wigi Eso gi gye" jhang: da" shoo" khaid su: bue" lo lho: siyoo cang nyid yen" wa vhoo: boo su: nghoid. Nghoid loug Yaku gi yhoem: moo: sam: zoo: nyid noug su: dayug nghoid.

²⁸Isag gi Eso kuang lo da" shoo" ri zoo: noug yoomo Eso ri jheddab lho: Rebekha gi Yaku ri jheddab da:.

²⁹Danyid" ri Yaku gi shi" gyang: lapho' xug to" uri Eso gi shoo" kuang yen" jang mo ju" lo. Nyang: gi zooyoid yoomo

³⁰Yaku ri «Ngoo zooyoid kyi'- hau: shi" gyang: lapho' ni ngoo ri dajhi' gam zhoo" we'» ga: tid. (Houg: yoomo nyang: ri Edom ga: myeing myheing byid: bye:.)

³¹Yaku gi «Re" da" mang: moo" aya: ngoo ri nang byid: nghoid rigi ngoo nang ri gam zhoo" wa» ga: tid.

³²Houg: lang" Eso gi «Ge- ngoo bain shid: lo" nyid ri nga" mang: moo" aya: ce: akyu" boo wa la"» ga: tid.

³³ Yaku gi «Re" da" aya: ngoo ri byid: wa ein: dang: theing thang" cab too" we'» ga: tid. Eso we' dang: theing thang" cab to" lho: nya: zooshid" aya Yaku ri byid: bye:.

³⁴Houg: lang" Yaku gi Eso ri zooyho' dayham" yo' lapho' ri byid: zhoo" bye:. Eso gi zo: gyi: shug gyi: lho: doem thu loo" khare". He: zigi Eso gi nya: mang moo" aya: ri cishu: anhang: khyoo: nghoid.