Read Lashi APOEM AYANG: 26 Bible Online

APOEM AYANG: 26 - Lashi bible

APOEM AYANG: 26

¹Hau: joyoo moo Abraham da" pyaid moo bue" lo da" phang" khoug tho' hau: mung" moo gootu: phang" khoug doem bue" lo. Isag gi Gerara mo Philisti khokham Abimeleg jhang khyoo: yhe.

²ASEING gi Isag jhang re" lho: «Egutu khyoo: ayhi:- ngoo nang ri nyid nhang: to" da" he: moug: moo danyid nyid we'.

³ Hid: moo nyid we' ngoo gi nang yo' nyid lho: nang ri mainkaid byid: wa. Ngoo gi he: moug: he: dain" dangain" ri nang yo' re" amyed ashen yiri byid: wa. Re" phoo Abraham ri byid: to" da" dangsoo" ngoo nang ri doem xo' byid: wa.

⁴Ngoo gi re" amyed ashen yiri mougkhung: mo kyi: joem ri te" myo: tham: nhang: wigi he: moug: dangain" nyangnu" ri ngoo byid: wa. Byumyu" dangain" bang: gi re" da" amyed ashen yiri ngoo mainkaid byid: yhang: ti" nyangnu" ri we' mainkaid byid: wa shid re" ngoo ri mho' sang: lo boem wa nghoid.

⁵Ngoo gi nang ri mainkaid jeju" byid: wa. Khasu" wim ga: ri Abraham gi nga" dang: ri tam" gyo: wigi nga" tarha" yo' amyeing" dang: dangain" ri nyang: cang su: nghoid» ga: re" tid.

⁶Houg: yoomo Isag gi Gerara moo nyid nyid.

⁷ Houg: mo yuggi yigi nya: yhoem: seing: myhi' da" khyoo: ri re" cang myid: lang" nya: nhammoo" nghoid ga: tid kyo". Nyang: gi nya: yhoem: seing: myhi' nghoid ga: avoem" yhen: yu. Khasu" wim ga: ri houg: bang: nyang: ri said pyam lho: gye" yung" da" nya: yhoem: seing: myhi' Rebekha ri shu" yu pyam wa zi gyoug yoomo nghoid.

⁸Isag gi houg: moo dayo, zoo: yhe: nyid nyid bye: ri khokham Abimeleg gi nya: bangzoo: khoem" mo yu" kaid uri Isag yo' Rebekha tang: gi jheddab go' nyid ziri myang kaid.

⁹Abimeleg gi Isag jhang byu nhang: kaid lho: «Nyang: gi re" da" yhoem: seing: myhi' danghoid da:. Nyang: gi re" da" nhammoo" nghoid ein: ci: yoomo tid lha"» ga: re" tid. Nyang: gi «Nga" yhoem: seing: myhi' nghoid ein: tid nghoid rigi ngoo ri said pyam zi shoug" wa nghoid ein: ngoo jho:» ga: nyang: doem phug tid.

¹⁰«Nang ngoonu" ri cikoid lha"- nga" da" byu yi dayug yug re" yhoem: seing: myhi' yo' zang" yhoeb nghoid rigi ngoonu" da" youg: gi nang moo dajo, wa» ga: Abimeleg tid.

¹¹Abimeleg gi nya: mung" byu yi dangain" ri «He: yug yo' nya: yhoem: seing: myhi' ri dam tab su: hang" nghoid loug we' said pyam zi shoug" wa nghoid» ga: zid" nhang: too" bye:.

¹²Isag gi hau: mung" moo yoo koid wigi hau: zain moo azhang dashoo: yo" yham" zheing" yu bye:. Khasu" wim ga: ri ASEING gi nyang: ri mainkaid byid: bye:.

¹³Nyang: gi je" je yo" lo wigi yoo" zoo: yoo" shug su: bue" loo bye:.

¹⁴Nyang: gi yang kyung- nu: kyung myoo" sho' join yi myoo" sho' yoo" yoomo Philisti byu yigi nyang: ri yu" zo boem ago".

¹⁵Houg: yoomo nyangnu" gi nya: phoo Abraham ashid: shi" ri nya: pho da" join yi du: khare" da" gyid thung" dangain" ri du: boem" pyam byid: boem ago".

¹⁶Hau: thang: Abimeleg gi Isag ri «Ngoonu" mung" mo thu loo" we'. Nang gi ngoonu" tho' je yoem: bo lo abye:» ga: tid.

¹⁷Houg: yoomo Isag thu lo" lho: Gerara janggyoin: moo dayo, zoo: nyid nyid.

¹⁸Nyang: gi nya: phoo Abraham da" pyaid moo du: too" kho' lho: Abraham shid: thang: ri Philisti byu yi du boem" pyam byid: da" gyid thung" joem ri doem du: phang lho: nya: phoo myheing da" myeing yo' dakhyoo" ti" doem myheing bye:.

¹⁹Isag da" dei zoo: yigi janggyoin: moo gyid thung" daloem: du: wigi gyid shoug" du: thu boem ago".

²⁰Gerara mo yang zoem: mo, yo' Isag yang zoem: mo, gi myeing" myoo: go" lho: «He: gyid gi ngoonu" daseing:» ga: tid ago". Houg: yoomo Isag gi hau: gyid thung" ri «Myeing" myo:» ga: myeing myheing.

²¹Isag da" dei zoo: yigi gootu: gyid thung" daloem: doem du: lho: houg: moo we' myeing" myo: go" khyoo: doem bue" yoomo nyang: gi hau: gyid thung" ri «Ngheing"» ga: myeing myheing.

²²Nyang: gi houg: mo goo" khyoo: shu" lo" lho: gootu: gyid thung" daloem: doem du: bye:. Hau: jang" moo gi ce: myeing" myo: khyoo: ajo, yoomo «Loid, byoin bye:» ga: myeing myheing. Nyang: gi «Akhid"-ASEING gi ngoonu" ri he: mougmyid moo nyid wa shid re" loid byoin khyoo: byid: bye:. Nyhang" gi he: joyoo moo myo: loug je: be: loo wa bye: o"» ga: tid.

²³Isag gi hau: mo Berasheba khyoo: thoid shu" yhe: lo".

²⁴Hau: myen moo ASEING gi nya: jang" moo thu shug lho: «Ngoo gi re" phoo Abraham da" Mangsoo nghoid. Agyug nang yo' ngoo dage" nyid. Nga" dei zoo: Abraham moo ngoo byid: to" da" nga" dangsoo" yoomo ngoo gi nang ri mainkaid byid: lho: nang gi amyed ashen myoo" sho' byid: wa» ga: tid.

²⁵Isag gi hau: joyoo moo phoin: daloem: ri zhug lho: ASEING ri noku. Hau: thang: nyang: gi houg: moo nyid lho: nya: dei zoo: yi we' gootu: gyid thung" daloem: ri doem du: bye:.

²⁶ Abimeleg gi nya: phajhi" byid: nheigboo Ahuzad yo' nya: gyizoug: phoo Phikola tang: ri shu" ci: lho: Gerara mo wigi Isag ri re" shoug".

²⁷Houg: yoomo Isag gi «Goonham' nanu" ngoo ri anoug ashoo" koid wigi nanu" mung" mo ngoo ri khaid thu pyam lho: akhid" ci yoomo nanu" nga" jhang re" shoug" go" lha"» ga: lhoem: myid:.

²⁸Nyangnu" gi «Akhid"- ngoonu" gi ASEING nang yo' dage" nyid ziri si' bye:. Houg: lho: nyha" agyoo: moo geing: teing da" myid veing" khyoo: too" ca" wa myang ein: ngoonu" shoug" soin: yu bye:. Ngoonu" gi nang ri dangsoo" too" nhang: nau.

²⁹Ngoonu" nang ri dam atab' ti" nang we' ngoonu" ri dam atab'. Ngoonu" gi nang ri loem: khau ziyo' myen jham' za: thu loo" nhang: loo bye:. Akhid" he: zigi ASEING nang ri mainkaid byid: zi nyang: nghoid bye:» ga: tid.

³⁰Isag gi houg: bang: shid re" lazoo: lashug soin' byid: wigi nyangnu" gi zo: shug boem ago".

³¹Thang: nab soin: no' mo dayug yo' dayug dangsoo" byid: go" lho: thang" cab dazid baid bye:. Houg: lho: Isag we' nyangnu" ri vhu" kaid lho: nyangnu" gi jhed jhed kang: kang: lo" byug boem ago".

³²Hau: nyid" ri Isag da" dei zoo: yigi lo lho: nyangnu" du: to" da" gyid thung" da" khyoo: ri lo tid kyo" boem «Gyid myang bye:» ga: nyangnu" lo tid ago".

³³Houg: yoomo nyang: gi hau: gyid thung" ri «Thang" cab» ga: myeing byid:. He: zigi Berasheba voomoo" bue" lo khyoo: nghoid.

³⁴Eso gi apyaid myid: xi: zain nghoid ri nyang: gi Beri da" nya: zoo: Yudid yo' Elon da" nya: zoo: Basemad ga: da" Heti myiyi: eig yug ri lo, xo' yu.

³⁵Hau: thang: rigi Isag yo' Rebekha ri myid myoo: khyoo: koid bye:.