Read Lashi APOEM AYANG: 27 Bible Online

APOEM AYANG: 27 - Lashi bible

APOEM AYANG: 27

¹Isag gi mang: bye: wigi myo, amyang loo. Nyang: gi nya: zoo: mang: zeing Eso ri «Nga" zoo: we'» ga: khe: yu. Eso we' «Nyid» ga: tu" kaid.

²Isag gi «Nang se' ziyo' dakhyoo" ti" ngoo gi mang: wigi shid: loo" zoo" nghoid bye:.

³Re" da" lid: yo' myoo: ri yu ci: lho: siyoo khyoo: yhe: wigi sho" beug loo we'.

⁴Hau: ziri ngoo vho: khyo" ngham" ngham" yhung lho: nga" jhang ci: loo we'. Ngoo hau: ziri bain zoo: lang" ngoo ashid: shi" ri ngoo gi nang ri nga" da" thang" thang mainkaid dang: byid: khoo' ba» ga: tid.

⁵Isag gi Eso ri houg: su: tid kyo" nyid uri Rebekha gi tam" gyo: nyid houg: yoomo Eso gi shoo" shoo: thu loo" khare" lang"

⁶Rebekha gi Yaku ri «Eso ri re" phoo tid da" dang: ngoo shoug" gyoo: bye:. Hau: dang: gi hid: su" ga: «

⁷Nga" shid re" shoo" dadu: yhe: beug lo lho: ngoo ri yhung byid: we'. Hau: ziri ngoo bain zoo: lang" ashid: loo" shi" ri ASEING da" shidkhoin" moo nga" da" mainkaid dang: nang ri ngoo byid: wa

⁸Nga" zoo: we"» ga: tid. Xo' lho: Rebekha gi «Akhid" ngoo tid dang: tam" gyo: lho: ngoo tid khyo" koid we'.

⁹Coidbaid kyung khyoo: yhe: lho: xu: yung" da" coid bam: zoo: eig du: ri yhe: myheig ci: loo we'. Hau: ziri re" phoo gye" vho: khyo" ngoo yhung ba.

¹⁰Nang gi hau: ziri re" phoo zoo: wa shid re" ci: loo" byid: we' houg: lang" nyang: gi nyang: ashid: shi" ri nya: mainkaid dang: nang ri byid: wa zi nghoid» ga: tid.

¹¹Nghoid loug Yaku gi nya: myhi' ri «Nang se' ziyo' dakhyoo" ti" Eso gi shoo" moug" yug su: nghoid- nghoid loug ngoo gi shoo" moug" ayug su: danghoid.

¹²Nga" phoo gi ngoo ri lhoem: soeb yu" wigi ngoo gi nyang: ri mhoug nyid ziri se' pyam wa zi nghoid. Houg: khyo" wigi mainkaid dang: da" gung khoo: nga" atho' moo nheing" khoin" zang" wa» ga: tid.

¹³Houg: lang" nya: myhi' gi «Nang ri tid da" ci: te" nheing" khoin" nghoid loug: ngoo moo dazang" baja"- nga" zoo: ngoo tid khyo" dakoid we'. Ngoo ri coidbaid dayhe: myheig byid: we'» ga: tid.

¹⁴Houg: yoomo Yaku gi coidbaid eig du: ri yhe: myheig yu lho: nya: myhi' jhang said ci: loo byid: bye:. Houg: lang" nya: myhi' Rebekha gi nya: phoo vho: khyo" xoin" yhung bye:.

¹⁵Hau: thang: Rebekha gi yhoem: moo nyang: shoung: to" da" Eso da" reung: thang byimi lo" yu re" lho: Yaku ri foid byid: bye:.

¹⁶Coid yid ri nya: zoo: Yaku da" lo, eig lo, moo yo' shoo" moug" ayug da" leung zeung: moo tab byid:.

¹⁷Rebekha gi Yaku ri gye" ngham" da" shoo" xoin" yo' dage" nyang: boung: to" da" zooyho' ri dang nhang:.

¹⁸Houg: lho: Yaku gi nya: phoo jhang vang lo" lho: «Nga" phoo we"» ga: lo" tid. «Nghoid bye:- nang nga" zoo: kha: yug nghoid» ga: loem: tid.

¹⁹Yaku gi «Ngoo gi re" zoo: mang: zeing yug Eso nghoid- nang ngoo ri tid ziyo' dakhyoo" ti" ngoo koid loo bye:. Re" da" mainkaid dang: ngoo ri yo" byid: wa shid re" ngoo re" jhang ci: lo da" shoo" xoin" ri zoo: we'» ga: tid.

²⁰Isag we' «Nga" zoo: we"- gye" myab sho' nang hau: ziri khasu" yhe: shoug" sho: lha"» ga: doem tid. Yaku gi «He: ziri shoug" shoo: sho' ASEING re" Mangsoo gi ngoo ri pang" byid: bye:» ga: tid.

²¹Isag gi Yaku ri «Ngoo nang ri zei: yu" wa shid re" nga" nam moo tain" lo yu" we'. Nang deing" deing Eso nghoid la"» ga: myid:.

²²Yaku gi nya: phoo nam khyoo: yu: tain" lo" lho: nya: phoo gi soeb yu" wigi «Re" thui: gi Yaku thui: yhang ti" nghoid loug we' re" lo, gi Eso lo, yo' du» ga: tid.

²³Yaku gi Eso yhang: ti" lo, moo shoomoug" yug yoomo nyang: gi Yaku nghoid ziri asi' nghoid da:.

²⁴Nghoid loug we' nyang: gi «Nang Eso gyeing" nyang: nghoid rhe"» ga: doem myid:. Nyang: gi «Ngoo nghoid» ga: doem tid.

²⁵Isag gi «Nga" shid re" shoo" ci: loo we' Ngoo hau: ziri zo: thang: ri ngoo nang ri mainkaid byid: wa zi nghoid» ga: tid. Yaku gi nya: shid re" hau: ziri ci: loo byid: ziyo' shug wa shid re" zabyid yhid: ri we' ci: loo byid: bye:.

²⁶Hau: thang: nya: phoo nyang: ri «Nga" zoo: we"- nga" jhang khyoo: yu: lo wigi ngoo ri babug bug we'» ga: tid.

²⁷ Yaku we' nyang: ri babug bug wa shid re" tab tab yhe: loo" uri Isag gi Yaku byimi ri nam yu" wigi nyang: ri mainkaid byid: bye:. Isag gi «Nga" zo: da" shoem: gi ASEING mainkaid byid: bye: da" yoothung" shoem: su" nam pyo: nyid.

²⁸Mangsoo gi mougkhung: mo nghain: jhu" khyoo' byid: wigi re" khyam: yoo yoothung" ri myid nu" nhang: baja". Nyang: gi nang ri shivoo: yo' zabyid yhid: myoo: sho' byid: baja".

²⁹ Byumyu" yigi re" jang moo dei zoo: yi koid wigi byumyu" yi dangain" re" shidkhoin" moo goeb pid loo goo" baja" o". Re" bidnoem yi dangain" ri nang yo" vhoebkhang" wigi re" myhi' da" amyed ashen yi dangain" re" shidkhoin" moo goeb pid loo baja" o". Nang ri nheing" bang: gi nheing" zi shoug" goo" baja". Nang ri mainkaid byid: bang: gi mainkaid byid: zi shoug" goo" baja"» ga: tid.

³⁰Isag mainkaid byid: bain thang: ri Yaku thu lho yo' dage" nya: mang: Eso shoo" shoo: yhe: jang" mo ju" vang lo da:.

³¹Nyang: gi ngham" da" zoo: noem dajhi' ri we' jhau' wigi hau: ziri nya: phoo jang khyoo: ci: lo" da:. Nyang: gi «Jeju" mo nga" phoo we"- nang ngoo ri main yo" kaid byid: wa shid re" ngoo re" shid re" ci: lo da" shoo" dajhi' ri to' zhung: wigi zoo: we'» ga: tid.

³²Isag gi «Nang hang" nghoid» ga: myid:- nyang: gi «Re" zooshid" Eso nghoid» ga: tid.

³³Isag gi mau" ziyo' nain" ziyo' nyang: myid: zigi «Akhang: shoo" said wigi nga" jang" khyoo: ci: lo zigi hang" nghoid la". Re" shidkhoin" moo za: ngoo hau: ziri zoo: bye:. Ngoo nyang: ri nga" thang: thang da" main ri kaid byid: bye: yoomo hau: zigi nya: shid re" apyaid atoo: nghoid bye:» ga: tid.

³⁴Eso gi hau: ziri shoug" gyoo: lang" nheig khoo" oung: khoo" sho' nyho: ngau lho: tid zigi «Ngoo ri we' re" mainkaid byid: we' nga" phoo we"» ga: tid.

³⁵Isag gi «Re" nhung" wigi ngoo ri re" mhoug bye:. Re" shid re" mainkaid jeju" gi yu loo" bye:.

³⁶ Eso gi «He: zigi nyang: ngoo ri mhoug zi eig lheing: ein: lheing: nghoid bye:. Nya: myeing Yaku ga: ziri moug" cang aboo. Nyang: gi nga" zooshid" aya: ri yu pyam wigi akhid" nga" shid re" mainkaid jeju" ri nyang: yu pyam bye:. Nang nga" shid re" mainkaid jeju" daja: khyalang" ateing too" loo: rhe"» ga: tid.

³⁷Isag gi «Nyang: nanu" ri vhoeb zoo: wa shid re" ngoo bain koid too" bye:. Nya: bidnoem seing" cang" yi dangain" nya: join bue" wa shid re" ngoo nyang: ri koid too" bye:. Ngoo nyang: ri shivoo: shiloem yo' zabyid yhid: byid: bye:. Nga" zoo: we" akhid" nang ri ngoo yo" koid byid: wa zi ci: ajo, loo:» ga: tid.

³⁸ Eso gi nya: phoo ri xo' lho: doem mho' yoid zigi «Nga" phoo we" re" jang moo mainkaid jeju" daja: khyalang" ajo, loo: re". Phoo we" ngoo ri we' mainkaid byid: we'» ga: wigi ngau nyid da:.

³⁹ Hau: thang: Isag nyang: ri «Re" shid re" mougkhung: mo nghain: jhu" agyoo" loo: wa re" shid re" myid nu" da" khyam: yoo yoothung" ajo, loo wa.

⁴⁰ Nang gi re" sham: yo' dage" kangso' dei ca" wa. Nghoid loug we' nang gi re" nhung" da" join nang koid ca" wa. Nang gyi koid lang" nya: lo, khoug: mo nang yo" loid loo" wa» ga: tid.

⁴¹Eso gi Yaku ri ngheing" nyid da:- ciwim gari nya: phoo gi Yaku ri mainkaid jeju" byid: bye: yoomo nghoid. Eso gi «Nga" phoo shid: wigi kougshu: wa da" ayo, gi jhang lo nyid bye:. Hau: thang: ngoo Yaku ri said pyam wa» ga: myid nyid da:.

⁴²Nghoid loug we' Rebekha gi Eso da" myid soin: nyid khyoo: ri shoug" gyoo: yoomo nyang: gi Yaku ri khe: yu wigi «Tam" gyoo: we' re" mang: Eso gi nang yo' sen: wigi nang ri said pyam wa shid re" myid soin' nyid bye:.

⁴³Nga" zoo: we"- Akhid" ngoo tid khyo" koid we'. Haran moo nyid da" nga" mang: Laban jang khyoo: akhid" nyang: yhe: we'.

⁴⁴Re" mang: nheig yo: zi theing: da" ayo, ju" sho' lo" nyid we'.

⁴⁵Nang nya: adang moo koid bye: da" ziri to" myid da" ayo, ju" sho' houg: moo nyang: yo' yhe: nyid we'. Hau: thang: nang ri doem re" khi: wa shid re" ngoo byu dayug yug ri nhang: kaid wa. Danyid" dam ri kyeing" nga" zoo: eig tang: goin" ri ngoo ci: wim se' yo" soem" wa la"» ga: tid.

⁴⁶Rebekha gi Isag ri «Ngoo gi Eso da" tungbau yhoem: seing myhi' yi yoomo nheig moo myung: dau: nyid. Yaku ri Hiti myiyi: yo' lo, xo' byid: nghoid rigi ngoo shid: pyoo: bye:» ga: tid.