Read Lashi APOEM AYANG: 30 Bible Online

APOEM AYANG: 30 - Lashi bible

APOEM AYANG: 30

¹Nghoid loug Rakhela gi Yaku ri zooshang: ayoo" byid: nghoid da:. Houg: yoomo nya: bi: ri nheigloem: no lho: Yaku ri «Ngoo ri zooshang: byid: we' anghoid lang" ngoo shid: loo: wa» ga: tid.

²Yaku gi Rakhela ri nheig yo: lho: «Ngoo gi Mangso joyoo yo" yu su: anghoid. Mangsoo gi nang zoo: yoo" wa zi toem' too" su: nghoid» ga: tid.

³Rakhela gi «Hid: the- nga" join myhi' Bila nyid nyang: yo' yhoeb we' nyang: gi nga" shid re" zooshang: yoo" byid: wa nghoid. Hougsu" lang" nya: gang mo ngoo gi myhi' zeing yo" bue" loo wa nghoid» ga: tid kaid.

⁴Houg: yoomo Rakhela gi Bila ri nya: yhoem: seing: pho jhang ab byid: wigi Yaku we' Bila yo' yhoeb bye:.

⁵Bila gi zooshang: gung bue" re" wigi Yaku shid re" yuggi zoo: dayug ri khu: byid: bye:.

⁶Rakhela gi «Mangsoo gi ngoo ri myonhoo: byid: bye:. Nga" akyu" mho' dang: ri gyoo: byid: lho: ngoo ri yuggi zoo: byid: bye:» ga: tid lho: hau: zooshang: ri Dan ga: myeing myheing byid: bye:.

⁷Bila gi zoonu" gung dalheing: doem bue" lo lho: Yaku shid re" yuggi zoo: eig yug ein: yug ri doem khu: byid: bye:.

⁸Rakhela gi «Ngoo gi nga" bi: ri yoem: kaid thougtheung lho: ngoo oung: bye:» ga: tid lho: hau: zooshang: ri Nabthali ga: myeing byid:.

⁹Lea gi nyang: zooshang: ayoo" lo: ziri si' lang" nya: join myhi' Zilpha ri Yaku jhang yhoem: seing: myhi' khyo" nyid nhang: bye:.

¹⁰Houg: lang" Zilpha gi Yaku shid re" yuggi zoo: dayug ri doem khu: bye:.

¹¹Lea gi «Ngoo zhafa: gi bye:» ga: tid lho: hau: zooshang: ri Gad ga: myheing bye:.

¹²Zilpha gi Yaku shid re" gootu: yuggi zoo: dayug ri doem khu: wigi

¹³Lea gi «Ngoo- atho' tid gau o". Akhid" gi myiyi: yigi ngoo ri gau su: ga: tid goo" wam bye:» ga: tid lho: hau: zooshang: ri Ashera ga: myeing myheing byid.

¹⁴Sungsoo: yoo yham" yo, ri Ruben gi dain" khyoo: thu yhe: lho: gyo, yen" shi" ri myang wigi hau: ziri nya: myhi' Lea jhang ci: lo. Rakhela gi Lea ri «Re" zoo: ci: lo da" gyo, yen" shi" ngoo ri we' dayham" gam zhoo" we'» ga: tid.

¹⁵Lea gi «Nga" yhoem: seing: phoo ri seing: pyam zi agi" shi" rhe". Akhid" nang gi nga" zoo: da" gyo, yen" shi" ri we' yu pyam wa dasoin' nyid shi" nhung: lha"» ga: tid. Rakhela gi «Re" zoo: da" gyo, yen" shi" ngoo ri byid: wa nghoid rigi Akhamyen Yaku yo' nang yhoeb we'» ga: tid.

¹⁶Myen" thang: ri Yaku dain" mo ju" lo lang" Lea gi nya: jhang thu yhe: lho: «Nang gi akhamyen ngoo yo' yhoeb zi nghoid. Ngoo gi nga" zo: da" gyo, yen" shi" yo' nang ri qei too" bye:» ga: yhe: tid. Houg: yoomo Yaku gi hau myen moo Lea yo' dage" yhoeb bye:.

¹⁷Mangsoo gi Lea da" akyu" mho' dang: ri tam" gyoo: byid: yoomo zooshang: gung bue" re" wigi Yaku shid re" wim: yug ein: da" yuggi zoo: ri doem khu: byid:.

¹⁸Lea gi «Ngoo gi nga" join myhi' ri nga" yhoem: seing: pho jhang ab byid: yoomo Mangsoo gi ngoo ri ngi shab jhungshug byid: bye:» ga: tid wigi hau: zooshang: ri Isakha ga: myeing byid: bye:.

¹⁹Lea gi zooshang: gung dalheing: doem bue" lo wigi Yaku shid re" khyug yug ein: wa yuggi zoo: dayug ri doem khu: bye:.

²⁰Nyang: gi «Mangsoo gi ngoo ri jhungshug zeing nyang: byid: bye:. Akhid" ngoo gi yuggi zoo: khyug yug nyang: khu: byid: bye: yoomo nga" yhoem: seing: phoo gi ngoo ri kham: yu wam bye:» ga: wigi hau: zooshang: ri Zebulun ga: myeing ri myheing byid: da:.

²¹Hau: thang: ri Lea gi myiyi: nu" dayug ri khu: lho: Dina ga: myeing myheing byid: da:.

²²Hau: thang: Mangsoo gi Rakhela ri myid boin: byid: wigi Mangsoo gi nya: da" akyu" mho' dang: ri gyoo: byid: lho: nyang: ri zooshang: doem ge yoo" da" akhang" byid: bye:.

²³Nyang: gi zooshang: gung bue" re" wigi yuggi zoo: dayug ri khu: bye:. Nyang: gi «Mangsoo gi nga" da" sho' phu" khyoo: ri ngoo ri yuggi nu" yoo" nhang: khyo" yu pyam byid: bye:.

²⁴ASEING gi ngoo ri gootu: yuggi nu" doem yoo" nhang: baja" o"» ga: tid lho: Yoseb ga: myeing myheing byid:.

²⁵Yoseb ri khu: thang: ri Yaku gi yugphoo' Laban ri «Ngoo gi nga" yhoem: khyoo: loo" loo ba- poin' kaid re.

²⁶Ngoo re" jang" mo zei kung: to" da" nga" yhoem: seing: myhi' tang: yo' zooshang: yi ngoo ri byid: re. Ngoo loo" loo ba. Ngoo gi nang ri khasu" moo" zei: byid: loo bye: ziri nang si' gu nghoid» ga: tid.

²⁷Laban nyang: ri «Ngoo hid su" tid ba. Ngoo gi re" da" gang mo ngoo ri ASEING mainkaid jeju" byid: bye: ziri ngoo boin: loo bye:.

²⁸Re" da" vhukung: phoug" soin: yu" we'. Houg: lang" nang ri ngoo byid: kaid wa» ga: tid.

²⁹Yaku gi «Ngoo gi re" shid re" khasu" zei: byid: lo ziyo' re" lo, khoug: moo re" gougnyhoug cisu" myo: je: loo bye: ziri nang si gu: nghoid bye:.

³⁰Ngoo ari" shi" ri nang dajhi' za: dayo". Akhid" gi myoo" sho' nyang: nghoid bye:. Ngoo kha: ju" kha: ASEING nang ri mainkaid jeju" byid: bye:. Akhid" gi ngoonya: shid re" zei: wa ayo, nghoid bye:» ga: tid.

³¹«Nang ri ngoo cisu" aphoug" shang" wa lha"» ga: Laban myid lang" Yaku gi «Ngoo ce: aphoug" we' avhoo:- ngoo hid su" ein: ziri nang myid veing" nghoid rigi re" da" gougnyhoug kyung ri ngoo xo' zoem: shi" wa.

³²Akhid" nyid"- re" da" gougnyhoug kyung khyo" ngoo so" lid: lo" lho: no, da" yang nu" joem dangain" yo' atug atuang wim da" coidbaid nu" joem dangain" ri ngoo yu wa. Hau: zigi ngoo vho: da" vhu" kung: phoug" nghoid bye:.

³³Ngoo nheigloem: aguid" ziri he: thang: nyid" moo nang goo" lhoo: za: myang wa nghoid. Nga" da" vhukung: phoug" joem ri nang re" yu" uri ngoo gi atug atuang awim da" coidbaid yo' ano, da" yang ngoo moo bo nghoid rigi khau" to" abye: da: ein: ziri nang- yu" si' wa nghoid» ga: wigi tid.

³⁴Laban gi «Nang tid ziyo' dakhyoo" ti" koid shang» ga: tid.

³⁵Nghoid loug Laban gi hau: nyid" ri atug atuang wim da" coidbaid loo: joem yo' coid zeing dangain" ri we' aphyu: atuang bue" ziri we' khyen: thu pyam wigi no, da" yang joem dangain" ri we' khyen: thu pyam lho: nya: zooshang: tang: yiri ab byid: pyam wigi

³⁶Hau: thang: ri Yaku ri soem" nyid" koo: yi: ca" da" joyoo moo deing da" gougnyhoug joem yo' yhi: nhang: kaid. Yaku gi hau: gu: ri yhe: zoem: nyid.

³⁷Yaku gi nyau da" popla gam- Lashab gam yo' Luza gam joem mo seig kung: ri yu lho: seig kug dayham" ri aphyu: atuang tuang bue" sho' shid pyam lho:

³⁸Hau: seig kung: joem ri gougnyhoug yi gyid lhoung lo shug shug wim da" jang" moo zhug to". Khasu" wim ga: ri gougnyhoug joem gi nyangnu" gyid lo shug uri ci" lhung lo cang go" da" joyoo nghoid yoomo houg: moo zhug to" zi nghoid.

³⁹Houg: yoomo coidbaid joem gi hau: nam moo ci" cang" go" lho: atug atuang wim da" coid nu" joem ri xang" boem ago".

⁴⁰Yaku gi yang joem ri coidbaid joem yo' kho' pyam lho: nyangnu" ri atuang tuang wim ziyo' no, no, wim da" Laban gougnyhoug joem shid khyoo: myonhoo: yeing too" nhang:. Hid: khyo" wigi nyang: gi Laban jang" mo nya: gougnyhoug kyung ri myo: loug je: be: loo nhang:.

⁴¹Yang" zain: da" gougnyhoug joem ci" cang go" boem uri hau: da" seig kung: joem nam moo cang so" boem sho' Yaku gi gyid shug jang: dangain" moo cang zhug to".

⁴²Nghoid loug yang" yang" awim da" gougnyhoug joem nam moo gi seig kung: joem ri azhug too" byid:. Khamyhang amyang" rigi Laban da" gougnyhoug joem gi yang" yang" awim wigi Yaku da" gougnyhoug joem dangain" gi yang" zi kyeing" bue" lo.

⁴³Hidsu" khyo" wigi Yaku gi gye" yo" loo bye:. Nyang: gi coid kyung yang kyung joem join joem gola-ug joem yo' loo zei: joem myoo" sho' yoo" bye:.