Read Lashi APOEM AYANG: 31 Bible Online

APOEM AYANG: 31 - Lashi bible

APOEM AYANG: 31

¹«Yaku gi nyhang" seing: da" ziyoo dangain" ri yu pyam byid: bye:. Nya: da" jonu" dangain" gi nyha" pho jang" mo kyeing" nghoid» ga: Laban da" nya: zoo: bang: tid da" dang: ri Yaku shau" gyo:.

²Laban gi xang: shi" ri yhang: ti" noug noug awim bue" nyid da" ziri we' Yaku myang nyid.

³Hau: thang: ri ASEING gi Yaku ri «Re" phoug" phyid" yi yo' re" bidnoem yi da" moug: khyoo: doem tau" loo" re. Ngoo gi nang yo' dage" nyid nyid wa» ga: tid.

⁴Houg: yoomo Yaku gi nya: gougnyhoug joem nyid da" joyoo dain" moo nyang: ri re" shoug" wa shid re" Rakhela yo' Lea tang: jhang dang: pyeung: kaid.

⁵Nya: yhoem: seing: myhi' tang: ri «Re" tang: da" phoo gi nya: moo" zei: nyid uri yhang: ti" nga" atho' moo noug noug awim lo: ziri ngoo yu" se' nyid bye:. Nghoid loug nga" pho da" Mangsoo gi ngoo yo' dage" nyid.

⁶Nga" yoem: vhu" dangain" yo' re" tang: nya: phoo shid re" ngoo moo" zei: loo bye: ziri re" tang: we' si' gu: nghoid.

⁷Nghoid loug nyang: gi ngoo ri mhau' wigi nga" vhukung: phoug" ri daxi: lheing: thid bye:. Nghoid loug Mangsoo gi Laban wigi ngoo ri ce: dam ayo" dab nhang: nghoid da:.

⁸Laban ri «Atuang tuang da" coidbaid joem gi re" vhukung: phoug" nghoid baja"» ga: tid khang" moo"- atuang tuang wim da" zi xang" lo boem- «Akhyoo" khyoo" wim da" coidbaid joem gi re" vhukung: phoug" nghoid baja"» ga: lang" we' dangain" akhyoo" khyoo" wim da" gougnyhoug joem kyeing" daxang" lo.

⁹Mangsoo gi gougnyhoug kyung ri re" tang: nya: pho jang" mo she: thu yu lho: ngoo ri byid: bye:.

¹⁰Ci" cang yo, ri atug alhid" atuang" wim da" coid loo: joem gi ci" cang nyid boem ago" ein: da" yhoebmo, ri ngoo myang:.

¹¹Mangso moug: lagyoo: gi yoeb mo, moo nyang: ri «Yaku» ga: yoid lang" ngoo we' «o"» ein: phug tid kaid.

¹²Yu" we' ci" cang nyid da" coidbaid loo: dangain" gi atug alhid" atuang wim da" kyeing" nghoid bye:. Laban gi nang ri koid khyoo: dangain" ri ngoo myang bye: yoomo ngoo gi hid: su" bui" sho' koid byid: nyid zi nghoid.

¹³Ngoo gi nang ri thu shug wigi zhainloin: xu: foid gyoin: lho: xang: yoeb ladoo" lug zhug to" da" joyoo yo' nang ngoo ri dang: theing to" da" joyoo- Bethela mo Mangsoo nghoid. Akhid" gi nang co' phyed jang: re" moug: khyoo: tau" loo" wa soin' we' ga: tid» ga: wigi tid kyo".

¹⁴Rakhela yo' Lea tang: Yaku ri «Ngoonu" nya: phoo jang" moo nga" tang: yoo" eung: da" mid ci: we' ayoo" loo:.

¹⁵Nang gi nga" tang: ri tungbau byu yiri yhang: ti" koid da:. Nyang: nga" tang: ri oung" pyam lho: nga" tang: mo yo" thid yu da" ngei dangain" ri we' akhid" gi bain yhung: pyam abye:.

¹⁶Apho' jang" mo Mangsoo yu byid: da" he: jonu" dangain" gi nyhang" yo' nyha" zooshang: yi da" zi nghoid bye:. Mangsoo nang ri tid khyo" koid boem shang» ga: tid.

¹⁷Houg: yoomo Yaku gi Khanan mung" nya: pho jhang khyoo: tau" loo" wa shid re" soin' bye:. Nyang: gi nya: zooshang: yi yo' nya: yhoem: seing: myhi' tang: ri Gola-ug moo zhung: nhang: lho: Mesopotamia mo yo" yu da" yoo" mooyoo" dangain" yo' gougnyhoug joem dangain" ri nya: shid vhu" khyoo: koin" yhe: loo" nhang: kaid.

¹⁸

¹⁹Laban gi yang moug" yham" wa yhe: lo" uri nya: phoo abyam nyid gyoo: moo Rakhela gi nya: pho da" yhoem: zung" yu phara" joem ri khau" yu loo" bye:.

²⁰Yaku gi Laban ri thu loo" wa khyoo: ci: we' asi' nhang: loo: za: nyang: ri moug khari" bye:.

²¹Yaku gi nyang: yoo" mooyoo" dangain" ri ci: lho: myab myab thu loo" bye:. Nyang: gi Uphrad gyid lang ri gu: lho: Gilead boem khyoo: yhe: lo" nyid bye:.

²²Soem" nyid" kyo: lho: ri Laban ri Yaku phang: khari" bye: khyoo: tid kyo" boem ago".

²³Nyang: gi nya: byu yiri shu" lho: nyhed nyid" ju" sho' cang khaid ri Gilead boem moug: moo cang myhi: bye:.

²⁴Yhoebmo, moo hau: myen" ri Laban jhang Mangsoo re" lho: nyang: ri «Zid" we' Yaku ri ce: dam we' age tab wa» ga: tid.

²⁵Yaku gi boem daloem: moo theing: lho: Laban gi nya: byu yi yo' Gilead boem moug: moo theing: boem.

²⁶Laban gi Yaku ri «Nang gi ce: gang mo ngoo ri mhau' lho: nga" zoo: tang: ri meing: zain: jang mo myheig yu da" myiyi: joem ri yhang: ti" shu" thu lo" lha".

²⁷Ci: yoomo ngoo ri mhau' lho: ngoo ri ci: we' atid loo za: thu lo" lha". Nang ngoo ri tid nghoid rigi ngoo gi nang ri re" khyoo: moo goug goug yi yi pyoo: pyoo: koid zeing bain mang" thung" music thui: yo' nhang: kaid wa zi nghoid.

²⁸Nang gi nga" myid: zoo: yi yo' nga" zoo: tang: ri vhu" kaid da" babug lhang" abug nhang:. Hau: zigi koo" moo" danghoid.

²⁹Ngoo gi nang ri dam tab wa yoem: so' yo" nghoid loug amain re" pho da" Mangsoo gi nang ri ce: dam atab' wa shid re" ngoo ri zid" nhang: to".

³⁰Nang gi re" yhoem: loo" wa gye" so' kho' yoomo nang phang: khare" ziri gi ngoo se' gyo:. Nghoid loug nang gi ce: gang mo nga" yhoem: zung" yu phara" joem ri khau" lo" lha"» ga: yhe: tid.

³¹Yaku gi «Re" zoo: tang: ri nga" jang" mo kang" pyam byid: wa myid gyoug yoomo nghoid.

³²Nghoid loug we' hid: mo hang" jang" moo nghoid nghoid re" yu phara" shoug" sho: nghoid rigi hau: yug gi said shoug" baja". Hid the'- myang ziyo' dakhyoo" ti" nga" byu yi shid moo nang yo' sen: re" da" zi dangain" ri sho: yu" we'» ga: tid. Rakhela gi Laban da" yu phara" khau" ci: lo ziri Yaku asi' nghoid da:.

³³Laban gi yhe: lho: Yaku da" zoem" moo we' hau: thang: Lea da" zoem" yo' join myhi' eig yug da" zoem" moo we' sho: yu" nghoid loug nya: yu phara" amyang shoo:. Hau: thang: Rakhela da" zoem" khyoo: vang yhi: bye:.

³⁴Rakhela gi yhoem: zung" yu phara" ri yu to" lho: Gola-ug doo: athi" khoug: moo kaid to" wigi hau: atho' moo zhung: nhe" to". Laban gi zoem" joem dangain" moo sho: yu" ri we' ashau" shoo:.

³⁵Rakhela gi nya: phoo ri «Phoo we"- ngoo ri anheig yoo: lhe"- nghoid loug ngoo gi re" shidkhoin" moo age to' yab. Ngoo gi nga" da" mi ci: ayo, nghoid» ga: tid. Laban sho: yu" nghoid loug nya: yhoem: zung" yu phara" joem ri ashau" shoo:.

³⁶Houg: lang" Yaku gi nheig yo: wigi «Ngoo ce: yooboo shoid lha"» ga: nheig yoo: yoo: koid myid: kaid. «Ngoo gi ce: tarha" shoid yoomo nang- ngoo ri cang khaid lha".

³⁷Akhid" nga" da" yoo" mooyoo" dangain" goin" moo shoo: bye:. Nang yo' sen: da" ce" yhoem: voin ziyoo ri we' cishau" sho: myang lha". Hid: moo theing: pyam loo: ge'. Re" byu yi yo' nga" byu yigi hau: ziri myang boem wigi nyha" oug: tang: mo, kha: yug gi deing byeung" ziri myang goo" baja".

³⁸Ngoo gi nang yo' nyid lo zi akhid" zain loem eig xi: nghoid bye:. Re" da" yang joem yo' coidbaid joem gi axang" shoin' nhang: tho' ago" ngoo gi re" gougnyhoug kyung mo yang dadu: lang" asaid zo: yu".

³⁹Siyoo gougnyhoug lam" joem wigi yang ri ngaid zo: khang" moo" ngoo gi khanham we' nga" da" zi kyeing" dasoem" kham. Nyid" ri nghoid nghoid- myen" ri nghoid nghoid khau" pyam shoug" ziri lang" nang mho' ziyo' dakhyoo" ti" ngoo gi lhoung xab loo bye:.

⁴⁰Ngoo gi myoo" sho' lheing: nyang: gyo, shi" ngam" shi" phu" lho: nyid" ri lung zi myen" ri ngam" zi kham loo bye:. Ngoo gi yhoeb nyang: ashau" yhoeb.

⁴¹Hougsu" wigi zain loem: eig xi: zain goin" nang yo' dage" nyid loo bye:. Re" zoo: tang: ri yo" yu wa shid re" daxi: myid: zain moo" zei: lho: khyug zain gi re" gougnyhoug kyung shid re" zi: loo bye:. Hau: thang: rilang" nang gi nga" vhukung: phoug" ri daxi: lheing: nyang: thid pyam byid: abye:.

⁴²Nga" pho da" Mangsoo- Abraham yo' Isag da" Mangsoo gi ngoo yo' ato' nyid nghoid rigi nang gi ngoo ri gung koem: nhang: thu kaid wa zi nyang: nghoid abye:. Nghoid loug Mangsoo gi nga" da" yau: khe" khyoo: yo' nga" da" zei: lo" lo, moo" moo we' amain we' nyang: gi nang ri dang: phyed byid: abye:.

⁴³Laban gi Yaku ri «He: myiyi: nu" tang: gi nga" zoo: tang: nghoid. Nya: tang: da" zooshang: we' nga" byu nghoid lho: he: gougnyhoug dangain" nga" zi nghoid. Hid: moo myang moo myang dangain" gi ngoo yo' sen:. Nghoid loug we' nga" zoo: tang: yo' nga" myid: zoo: yiri ngoo gi ci: we' yo" koid wa zi anghoid.

⁴⁴Ngoo gi nang yo' myid veing" go" khyoo: koid wam bye:. Nyha" oug: tang: da" myid veing" khyoo: ri boin: nyid nhang: wa shid re" lug boem ladoo" zeing zhug too" shang» ga: tid.

⁴⁵Houg: yoomo Yaku gi ladoo" zeing khyo" lugzeing daloem: ri zhug too" bye:.

⁴⁶Nya: byu yiri lug go, koid: loo wa shid re" tid wigi lo" koid: boem to" ago". Hau: thang: ri nyangnu" gi lug go, boem nam moo zoo: shug zo: boem ago".

⁴⁷Hau: joyoo ri Laban gi Yegara Sahaduta ga myeing byid:. Houg: lang" Yaku gi houg: ri Galeda ga: myheing da:.

⁴⁸Laban gi Yaku ri «He: da" lug go, boem gi nyha" oug: tang: agyoo: mo sagse: bue" nyid wa bye:» ga: tid. Houg: yoomo he: joyoo ri Galeda ein: myheing bye:.

⁴⁹Laban doem xo' tid zigi «Nyha" tang: dayug yo' dayug gang: loo" nghoid loug ASEING gi nyha" oug: tang: ri gooloo goem nyid baja"» ga: tid. Houg: yoomo hau: joyoo ri Mizpa ga: we' myheing.

⁵⁰Laban gi xo' lho: «Nang gi nga" zoo: tang: ri anoug ashoo" koid ri we' gootu: myiyi: doem yu nghoid rigi ngoo hau: khyoo: ri asi' nghoid loug Mangsoo gi nyha" oug: tang: ri yu" nyid ziri boin: nyid we'.

⁵¹He: zigi nyha" tang: agyoo: moo lug go, boem to" lho: he: ziri ladoo" lugzeing khyo" nghoid bye:.

⁵²He: da" lug go, boem yo' he: da" ladoo" lug go, zeing gi sagse: nghoid bye:. Ngoo gi he: lug go, boem ri lid lho: nang ri gyi khanham we' akoid wa. Houg: lho: nang we' he: ziri lid lho: anghoid lang" he: ladoo" lugzeing ri lid lho: ngoo ri gyi are" koid.

⁵³Abraham da" Mangsoo yo' Nahora da" Mangsoo gi nya" tang: agyoo: moo dang: phyed byid: nyid baja"» ga: tid. Houg: lang" nya: phoo Isag noku da" Mangso myeing khyang" moo Yaku gi phau" myang: ziyo' he: da" dangsoo" khoin" ri zoem: ci: abye:.

⁵⁴Nyang: gi gougnyhoug dadu: ri said lho: hau: boem tho' moo xoin" to' lho: hau: shoo" ri zoo: wa shid re" nya: byu yiri khe: yu bye:. Nyangnu" bain zo: shug thang: ri nyangnu" gi hau: boem moo yhoeb ago".

⁵⁵Thang: nab soin: ri Laban gi nya: myid: zoo: yi yo' nya: zoo: tang: ri babug bug lho: vhu" too" kho' wigi yhoem: khyoo: tau" loo" bye:.