Read Lashi APOEM AYANG: 32 Bible Online

APOEM AYANG: 32 - Lashi bible

APOEM AYANG: 32

¹Yaku gi nya: khyoo: xo' so" lo" ri moug: lagyoo: dayham" gi nyang: ri lhoem: shoug" bye:.

²Nyang: gi nyangnu" ri myang lang" «He: zigi Mangso dab nghoid» ga: tid. Houg: yoomo hau: joyoo ri Mahanaim ga: myeing myheing.

³Yaku gi nya: shid vhu" khyoo: nya: mang: Eso nyid da" Edom moug: khyoo: lagyoo: yiri nhang: kaid.

⁴Nyang: gi nyangnu" ri «Re" da" dang: tam" gyoo: wa da" dei zoo: ngoo Yaku gi nga" yhoem: seing: Eso jhang lu dang: de" kaid zigi ngoo gi Laban yo' dage" yhe: nyid nyid lho: ngoo doem tau" loo wa khyoo: akhid" ju" sho' dane" nyid shi".

⁵Ngoo gi nu: joem myang: joem yang joem coidbaid joem ri yo" loo bye:. Yhoem: seing: we"- ngoo gi re" da" nheig khyeug shoo" gyo: yu wa ziri nheig byu ziyo' dang: pyeung: kaid» ga: wigi tid nhang: kaid.

⁶Lagyoo: yigi Yaku jhang doem tau" ju" lo ri nyangnu" gi «Ngoonu" gi re" mang: Eso jhang yhi: bye:- houg: lho: nyang: gi nang ri tau yu wa shid re" lang" nyid bye:. Nyang: gi nyang: yo' dage" byu myid: shoo: yug nyid» ga: wigi tid kyo" boem.

⁷Yaku gi gyo: dain wigi gyoug nain" nyid bye:. Nyang: gi nya: byu yiri eig phung: kho' lho: nya: da" yang joem coidbaid joem nu: joem yo' gola-ug joem ri we' eig phung: gam pyam.

⁸«Eso gi xang: shi" phung: ri lhoem: zain: lang" gootu: daphung: gi yo" phang: byoin baja"» ga: nyang: soin: da:.

⁹Hau: thang: Yaku akyu" mho' zigi «Nga" phoug" Abraham da" Mangsoo yo' nga" phoo Isag da" Mangsoo we"- ngoo ri tam" gyoo: byid: we'. ASEING we"- nang gi ngoo ri nga" da" moug: yo' nga" bidnoem yi jhang khyoo: tau" loo" nhang: lho: nang gi nga" shid re" nga" gyung: khyoo: ri yug yoo za: bui" nhang: wa ga: tid abye:.

¹⁰Re" dei zoo: phoo ngoo gi nang ngoo ri toin" shed wa da" nheig khyeug shoo" gyo: khyoo: yo' nheigloem: zung" khyoo: dangain" ri kham moin: su: ngoo anghoid loo:. Ngoo gi Yodan gyid lang ri gu: byed loo kho' uri lhamdung: daloem: yo' gung koem: danghoid. Nghoid loug akhid" ngoo gi hid: su" eig phung: kho' lho: doem tau" lo nyid bye:.

¹¹Ngoo ri nga" mang: Eso jang" mo khyoid yu we' ngoo mho' nyid. Ngoo gyoug nyid. Nyang: gi ngoonu" ri re" zain: lho: myiyi: yo' zooshang: yiri we' ngoonu" dangain" ri said pyam loo wa ziri gyoug nyid o".

¹²Nga" shid re" ja: khang" moo" ri ge loo" nhang: lho: ngoo ri panglai: midcoo: cab' joem su" nghab loo: aoung: sho' nga" amyed ashen ri myo: tham: nhang: wa ga: ngoo ri byid: to" da" re" dangsoo" khoin" ri myid boin: byid: we» ga: wigi akyu" mho'.

¹³Hau: myen- houg: moo yhoeb lho: Yaku gi nya: mang: Eso shid re" jhungshug khyo" wigi nya: gougnyhoug joem khoug: mo coidbaid myhi' eig shoo: du: yo' aloo: eig xi: du:- yang moo" eig shoo: du: yo' aloo: eig xi: du:- anu" yo' dage" noug" jhug nyid da" gola-ug soem" xi: du:- nu: zeing myid: xi: yo' aloo: daxi: du:- loo zei: amyhi' eig xi: yo' aloo: daxi: khyen: yu.

¹⁶Nyang: gi gougnyhoug joem ri nya: kyung nyang: kho' lho: kyung khang" moo" moo nya: join dayug yug kaid kaid. Nyang: gi nyangnu" ri Daphung: yo' daphung: kyo: kyo: koid lho: «Nga" shid vhu" khyoo: yhe: loo" ge'» ga: tid kaid.

¹⁷Nyang: gi dei zoo: xang: shi" mo yug ri «Nga" mang: Eso gi nang yo' shoug" go" lho: nang ri ‹Re" yhoem: seing: hang" nghoid. Khakhyoo: yhe: loo" mo, nghoid- re" shidkhoin" mo gougnyhoug joem hang" re" nghoid› ga: wigi myid: lang"

¹⁸‹Hid: bang: gi re" da" dei zoo: phoo Yaku da" zi nghoid. Nyang: gi yhoem: seing: Eso jhang jhungshug khyo" byid: kaid zi nghoid. Yaku nyang: nyang: we' ngoonu" da" thang: moo lo nyid bye:› ein: phug tid we'» ga: tid kaid.

¹⁹Nyang: gi eig yug ein: wa yug ri soem" yug ein: wa yug ri we' houg: lho: gougnyhoug phung: khang" moo" mo bo da" gootu: dangain" bang: ri we' dakhyoo" ti" za: tid kaid. He: zigi Eso yo' shoug" goo" lang" tid wa da" dang: nghoid.

²⁰«Nghoid ‹Re" da" dei zoo: Yaku gi ngoonu" da" thang: moo cang lo nyid›- ein: tid ge'» ga: wigi tid kaid. Yaku gi nyang: ri jhungshug joem yo' yo" zoem" yu lho: nyang: yo' shoug" goo" uri nyang: gi ngoo ri yooboo khyoid byid: abe» ga: wigi soin: nyid.

²¹Nyang: gi jhungshug joem ri nya: shid vhu" khyoo: de" kaid lho: hau: myen houg: moo theing: nyid kho'.

²²Hau: myen moo nyang:- Yaku gi nya: yhoem: seing: myhi' tang: dangcang: myhi' tang: yo' nya: zoo: yi daxe: dayug ri shu" lho: Yabug gyid lang ri gu: khoo' bye:.

²³Hau: thang: nyang: gi nyangnu" ri gu: phyed loo" nhang: lho: nyang: yoo" mooyoo" dangain" ri we' gu: phyed loo" nhang: bye:.

²⁴Nghoid loug we' nyang: gi nyang: kyeing" nyid gyoo" kho'. Hau: thang: yuggi phoo dayug gi re" lho: nyang: yo' moug: boo" yid ju" sho' dab nheig go" da:.

²⁵Yuggi phoo gi nyang: ayo" oung: lo: ziri si' lang" nyang: gi Yaku da" tang" boug" moo thoin: byid: wigi tang" boug" shooyoug: thang: beig loo" khari" bye:.

²⁶Yuggi phoo gi «Ngoo loo" loo ba- moug: bo" lo nyid bye:» ga: tid. «Nang ngoo ri main akaid byid: byid: gi ngoo ayo" nhang: kaid» ga: wigi Yaku doem tid.

²⁷Yuggi phoo gi «Re" myeing khasu" ga: zi nghoid» ga: wigi myid: lang" «Yaku» ga: nyang: phug tid.

²⁸Yuggi phoo gi «Re" myeing Yaku anghoid loo wa. Nang gi Mangsoo yo' we' byu yo' we' thougtheung loo bye: wigi nang oung: abye:. Houg: yoomo re" myeing gi Israela nghoid bye:» ga: tid.

²⁹Yaku gi «Akhid" re" myeing ngoo ri tid khoo' we'» ga: tid. Nghoid loug we' nyang: gi «Ce: gang mo nang nga" myeing si nau lha"» ga: phug tid thang: ri nyang: gi Yaku ri mainkaid dang: tid byid: bye:.

³⁰Yaku gi «Ngoo gi Mangsoo ri myojid" yo' nyang: myang bye:- houg: loug ngoo gi akhid" ju" sho' dadei nyid shi"» ga: wigi tid. Houg: yoomo nyang: gi hau: joyoo ri Pheniela ga: wigi myeing myheing bye:.

³¹Yaku gi Pheniela mo so" thu lo ri bid xain" ri" bye:. Nyang: gi nya: tang" boug" noo yoomo kaleig kaleig koid wigi so" nyid.

³²Israela da" amyed ashen yigi akhid" nyid" ju" sho' lang" tang" boug" jhoin: shoo" gyi: ri azo: boem. Khasu" wim gari hau: zigi Yaku thoin: byid: shau" da" jang" mo shoo" gyi: nghoid yoomo nghoid.