Read Lashi APOEM AYANG: 33 Bible Online

APOEM AYANG: 33 - Lashi bible

APOEM AYANG: 33

¹Eso gi nya: byu myid: shoo: yug yo' re" lo nyid ziri Yaku myang yoomo nyang: gi nya: zooshang: yiri Lea- Rakhela yo' dangcang: myhi' tang: bang: jhang kho' gam byid: kaid.

²Nyang: gi dangcang: myhi' tang: yo' nya: zooshang: yiri shid khyoo: yhe: loo" nhang: lho: Hau: thang: Lea yo' nya: zooshang: yi houg: lho: thang" thang moo Rakhela yo' Yoseb mitang: ri soo" nhang:.

³Yaku nyang: gi nyangnu" da" shid vhu" khyoo: yhe: lho: myidjang moo nyhed lheing: yhe: goeb pid wigi nya: mang: jhang khyoo: tab yhe: lo".

⁴Nghoid loug Eso gi nya: jhang gei re" lho: nyang: ri nya: lo, yo' re" gab po: wigi babug bug. Nya: tang: eig yug goin" ngoug go" nyid.

⁵Eso gi ayam moo yu" yu" kaid lho: myiyi: joem yo' zooshang: joem ri myang lang" nyang: gi «Nang yo' lo da" hid: bang: hang" bi" nghoid» ga: wigi myid. «Yhoem: seing: we"- he: da" zooshang: yigi Mangsoo ngoo ri gam byid: da" bang: nghoid» ga: Yaku tid kyo".

⁶Hau: thang: dangcang: myhi' tang: gi nya: tang: da" zooshang: yi yo' dage" lo lho: lo goeb pid.

⁷Hau: thang: Lea yo' nya: zooshang: yi lo lho: dangain" da" thang" thang moo Yoseb yo' Rakhela lo lho: goeb pid.

⁸Eso gi «Ngoo shoug" goo" kho' da" phung: gi cite" zi nghoid. Houg: gi ce: dang: kang: nghoid» ga: wigi myid:. Yaku gi «Houg: bang: gi re" jang" mo myonhoo: yo" yu wa shid re" nghoid» ga: tid.

⁹Nghoid loug Eso gi «Nga" nhung" we"- ngoo we' myoo" sho' yoo" bye:- nang nyang: dadoem yu we'» ga: wigi tid.

¹⁰Yaku gi «Hougsu" anghoid wa. Ngoo ri nang myoo, nhoo: byid: nghoid rigi jeju" mo nga" jhungshug ri kham: yu byid: we'. Nang ri myang zigi Mangso myonhoo: shau" myang ti" nyang: nghoid bye:. Akhid" nang khyo" ngoo ri jhed jhed kang: kang: koid abye:.

¹¹Re" shid re" ngoo ci: re" da" nga" jhungshug ri jeju" mo jen" lhoem: yu byid: la. Mangsoo gi ngoo ri jhed kang: ziyo' ngoo ca" mooca" dangain" ngoo ri byid: too" bye:» ga: tid wigi Yaku gi Eso jhungshug ri kham: yu sho' tid bye:.

¹²Eso gi «Sa- lo" boem loo shang. Ngoo nanu" da" shid vhu" khyoo: soo" lang" loo ba» ga: wigi tid.

¹³Yaku gi «Nang myang ziyo' dakhyoo" ti" zooshang: yigi ayang" shi". Houg: lho: yang yo' gougnyhoug joem moo we' noug" shug da" anu" joem bo. Nyangnu" ri danyid" goin" shu" so" rigi gougnyhoug joem joem goin" shid: byug wa zi nghoid.

¹⁴Nang shi" shid khyoo: soo" lang" we' houg: lho: ngoo gi gougnyhoug joem yo' zooshang: yi yo' dage" zoo" zoo" mo Edom voo re" jhang khyoo: ju" sho' cang loo ba» ga: tid kaid.

¹⁵Eso we' «Houg rigi nga" byu dayham" ri nang yo' bo nyhid: khoo' ba» ga: doem tid. Nghoid loug Yaku gi «Aca" wa nghoid- ngoo gi re" da" myonhoo: byid: khyoo: ri kyeing" za: davho:» ga: wigi tid kaid.

¹⁶Houg: yoomo Eso gi hau: nyid" moo Edom khyoo: doem tau" loo" khari" bye:.

¹⁷Nghoid loug we' Yaku gi Sukhod ga: da" joyoo khyoo: ju" sho' yhe: lho: houg: moo nya: shid re" yhoem: koid wigi gougnyhoug joem nyid wa shid re" khoem: joem ri koid bye:. Hau: akhyoo" yoomo Sukhod ga: myeing yo" lo khyoo: nghoid.

¹⁸Mesopotamia mo doem tau" lo ri Yaku gi goem loem tung" Khanan mung" mo Shekhem voomoo" zeing moo ju" wigi hau: voo mo dain" pa: dakhyi' moo nyang: lo theing: bye:.

¹⁹Nyang: gi hau: dain" mo joyoo dayham" ri Shekhem da" nya: phoo Hamora da" amyed ashen yi jang" mo ngei dasho: pyi" yo' qei yu bye:.

²⁰Nyang: gi houg: moo phoin: daloem: zhug lho: hau: joyoo ri Israela da" Mangsoo El- ga: wigi myeing myheing bye:.