Read Lashi APOEM AYANG: 35 Bible Online

APOEM AYANG: 35 - Lashi bible

APOEM AYANG: 35

¹Mangsoo gi Yaku ri «Akhid" nyang: Bethela khyoo: yhe: lho: houg: moo yhe: nyid we'. Nang gi re" mang: Eso jang" mo phang: lo" uri re" shidkhoin" moo Mangsoo thu shug da" hau: joyoo moo nga" shid re" phoin: daloem: zhug we'» ga: re" tid.

²Houg: yoomo Yaku gi nya: yhoem: byu yi yo' nya: da" byu yi dangain" bang: ri «Nanu" loem nyid da" yu phara" dangain" ri she: pyam loo ge'. Nanu" gung nanu" cid" yung" cid" lho' pyam lho: young" gyeing" da" byimi ri void we'.

³Nyhang" hid: mo thu lo" lho: ngoo yau: khi" shoug" nyid ayo, moo ngoo ri pang" thoug lho: ngoo yhe: lo" da" khyi' khang" moo" moo dage" nyid nyid da" Mangsoo ri ngei" xoin" to' wa shid re" phoin: ri zhug wa yhe: loo" shang» ga: tid.

⁴Houg: yoomo nyangnu" gi nyangnu" ci: da" tungbau yu phara" dangain" Yaku ri byid: pyam lho: nyangnu" xei" ci: da" noo: khuang ri we' ab byid: ago". Nyang: gi houg: ziri Shekhem nam mo Shookhi" gam nam moo du: myhoeb pyam kho'.

⁵Yaku yo' nya: zoo: tang: yi byung: thu lo" boem uri aqei: ayam voomoo" mo mung" byu yigi gyi" sho' gyoug boem wigi cang khaid myheig khyoo: ci: we' akoid boem.

⁶Yaku yo' nya: byu yi dangain" gi Khanan mung" mo Bethela ga: da" joyoo Luza joyoo khyoo: ju" ri" bye:.

⁷Nyang: gi houg: moo phoin: daloem: ri zhug lho: thang: rigi hau: joyoo ri Bethela mo Mangsoo ga: myeing myheing bye:. Khasu" wim ga: ri nyang: nya: mang: jang" mo phang: thu lo" uri Mangsoo nyang: ri thu shug da" joyoo nghoid.

⁸Rebekha da" zooshu" su: Debora shid: wigi Bethela da" mougzhung: shoid mo Shookhi" gam yang: moo myhoeb to". Houg: yoomo hau: joyoo ri «Ngau da" Shookhi" gam» ga: myheing boem ago".

⁹Yaku gi Mesopotamia mo doem tau" lo uri Mangsoo gi nyang: moo doem thu shug lho: mainkaid byid: bye:.

¹⁰Mangsoo nyang: ri «Re" myeing gi Yaku nghoid loug akhid" mo gi Israela danghoid loo: wa» ga: tid. Houg: yoomo Mangsoo gi nyang: ri Israela ga: myheing byid:.

¹¹Houg: lho: Mangsoo nyang: ri «Ngoo gi myhang: thang da" Mangsoo nghoid. Zooshang: myoo" sho' yo' byumyu" zeing gi nang mo nyid je: re" wa nghoid lho: nang gi khokham yi da" phoug" phyid" bue" loo wa.

¹²Ngoo gi Abraham yo' Isag ri byid: da" he: mougmyid nang ri byid: wa nghoid lho: re" thang: moo gi re" da" amyed ashen yiri we' doem xo' byid: wa nghoid» ga: wigi tid.

¹³Hau: thang: ri Mangsoo gi nya: jang" mo loo" khare" bye:.

¹⁴Mangsoo nyang: ri dang: re" ji da" joyoo houg: moo Yaku gi xang: yoeb ladoo" lugzeing zhug lho: hau: adang moo zhainloin: xu: yo' zabyid yhid: foid gyoin: shug bye:.

¹⁵Nyang: gi hau: joyoo ri Bethela ga: myheing bye:.

¹⁶Yaku yo' nya: yhoem: byu yigi Bethela mo thu lo" lho: nyangnu" gi Ephrad khyoo: ade: yo" ju" shi" moo nyid nyid uri Rakhela gi zooshang: co' phyed bidnyid ju" wigi gyi: sho' nyang: no nyid bye:.

¹⁷Nya: da" zookhu: noo gi soo" soo" no nyid uri zooshang: bo pang" khu: nyid su: gi «Rakhela we"- aci' noo"- yuggi nu" dayug doem nghoid bye:» ga: tid.

¹⁸Nghoid loug Rakhela gi mo, lo" nyid bye: wigi nyang: so' she: thang yid ri nya: zoo: ri Benoni ga: myeing myheing byid: khare". Nghoid loug nya: phoo gi nyang: ri Benyamin ga: myheing byid:.

¹⁹Rakhela shid: byug lang" Nyang: ri akhid" Bedlehem ga: da" joyoo Ephrad khyoo: yhe: lo" da" khyoo: nam moo myhoeb pyam bye:.

²⁰Yaku gi hau: jang" moo xang: yoeb ladoo" lugzeing zhug lho: hau: joyoo ri akhid" nyid" ju" sho' Rakhela da" loeb ga: xoem" to" boem ago".

²¹Yaku gi xo' byung: yhe: lo" wigi Edera pyuzung mo lid lo" jang moo yhe: nyid nyid.

²²Yaku gi houg: moo nyid nyid uri Ruben gi nya: pho da" dangcang: myhi' Bila yo' avoid avhoo: koid. Yaku gi hau: khyoo: shau" gyo: wigi nheig khoo" yoo: bye:. Yaku gi zooshang: yuggi zoo: daxe: eig yug yoo" bye:.

²³Lea da" nya: zoo: tang: yigi Ruben (Yaku da" zooshid" yug) Simun- Levi- Yuda- Ishakha- yo' Zebulun bang: nghoid.

²⁴Rakhela da" zooshang: tang: gi Yoseb yo' Benyamin nghoid.

²⁵Rakhela da" join myhi' Bila da" zooshang: tang: gi Dan yo' Napthali nghoid.

²⁶Lea da" join myhi' Zipha da" zooshang: tang: gi Gad yo' Ashera nghoid. He: da" zooshang: tang: yigi Mesopotamia moo co' phyed bang: nghoid.

²⁷Yaku gi nya: phoo Isag nyid da" Abraham yo' Isag nyid lo da" joyoo- Hebron nam mo Mamre khyoo: yhe: loo" bye:.

²⁸Isag gi dasho: shid xi: zain ju" sho' nyid nyid

²⁹lho: apyaid gyi: wigi mang: shid: bye:. Houg: lho: nya: zoo: tang: Eso yo' Yaku gi nyang: ri myhoeb shoung: bye:.