Read Lashi APOEM AYANG: 38 Bible Online

APOEM AYANG: 38 - Lashi bible

APOEM AYANG: 38

¹Hau: ayo, moo Yuda gi nya: mang: nhung" yi jang" mo thu lo" lho: Adulam voo mo re" nyid da" Hira ga: su: jhang yhe: nyid nyid.

²Hau: joyoo moo Yuda gi Shua ga: su: da" nya: zoo: Khanan myiyi: myhi' dayug yo' shoug" doem go" wigi hau: yug ri lo, xo' yu bye:.

³Hau myiyi: gi nyang: ri Era ga: da" yuggi zoo: dayug ri khu: byid: bye:.

⁴Zooshang: gung dalheing: doem bue" re" lho: yuggi zoo: dayug doem khu: byid: wigi hau: yug ri Onan ga: myeing myheing.

⁵Yuggi nu" dayug doem yo" lho: nyang: ri Shela ga: myheing byid:. Hau: zooshang: co' phyed da" yo, ri Yuda gi Akhezib moo nyid nyid.

⁶Nya: zoo: mang: zeing Era shid re" Yuda gi Thama ga: su: myiyi: dayug ri byid: bye:.

⁷Era da" avoid gi akhyeing" wigi ASEING ri shoid pyam yoomo ASEING gi nyang: ri said pyam bye:.

⁸Hau: thang: Yuda gi Era da" nya: nung" Onan ri «Re" mang: da" coug" ri yhe: koid: we' yhe: vang yhoeb we'. Re" mang: da" byukung: yo" xo' byid: sho' re" mang: nyang: yo' zoem" khau: yhang: ti" nang khyo" nyang: ri yoovoin yu we'» ga: tid.

⁹Nghoid loug Onan gi yo" loo wa da" zooshang: gi nya: zoo: khyo" myeing ashau" myheing wa ziri si' yoomo nya: mang: shid re" zooshang: ayo" yoo" wa shid re" nya: mang: da" cougmoo" yo' yhoeb khang" moo" nya: da" myoug: shi" yeing ri myid khyoo: kyeing" khyo' pyam.

¹⁰Nyang: hougsu" koid" khyo" ASEING ri shoid pyam yoomo ASEING gi nyang: ri we' said pyam bye:.

¹¹Hau: thang: Yuda gi nya: dumoo" Thama ri «Nga" zoo: Shela gyi: lo da" ayo, moo ju" sho' re" phoo da" yhoem: khyoo: tau" lo" lho: cougmoo" myhi' khyo" da nyid nyid we'» ga: tid. Nyang: hid: su" ga: tid zigi nya: mang: tang: ri ti" Shela said shoug" wa ziri ci' yoomo tid zi nghoid. Houg: yoomo Thama gi yhoem: khyoo: tau" loo" bye:.

¹²Shang" yhen" zoo: myang" thang: ri Yuda da" yhoem: seing: myhi' shid: bye:. Nyang: gi koug khyoo: bei: byug lang" nya: bidnoem Adulam byumyu" Hira yo' nya: yang zoem: su: ri yang moug" yham" nyid da" joyoo Timna khyoo: do, loo" bye:.

¹³Dayug su: gi Thama ri «Re" vang gi yang moug" yham" wa shid re" Timna khyoo: yhi: khari" bye:» ga: lhoem: tid kyo".

¹⁴Houg: yoomo Thama gi nyang: void ci: da" cougmoo" myhi' byimi ri thid pyam lho: myo, nghoeb za: pain" yo' nya: myonhoo: ri nghoeb go ci: wigi Timna khyoo: lo" da" khyoo: Enaim voomoo" khoem" duang: moo yhe: zhung: jo,. Yuda da" nya: zoothang Shela gi gyi: bye: nghoid loug we' nyang: ri coug" akoid: nhang: ziri nyang: goo" lhoo: za: se' too" da:.

¹⁵Yuda gi hau: myiyi: ri myang lang" nyang: gi hau: yug ri shava myhi' yu" jho:. Khasu" wim ga: ri nyang: gi nya: myonhoo: nghoeb ci: da:.

¹⁶Nyang: gi khyoo: yam mo hau: myiyi: myhi' jhang khyoo: yhe: lho: «Nghoid bye:- gu gi khasu" yu» ga: yhe: tid (Hau: myiyi: myhi' gi nya: dumoo" nghoid ziri asi' nghoid da) Myiyi: myhi' gi «Nang ngoo ri cibyid: wa» ga: myid:.

¹⁷Nyang: gi «Nga" coidbaid kyung mo, coid bam: zoo: dadu: ngoo nang ri byid: wa» ga: lang" myiyi: myhi' gi «Gi bye:- houg: lang" ge bue" rigi nang coidbaid re" di" byid: sho' kookham: khyo" daja: ja: byid: we» ga: tid.

¹⁸«Kookham: khyo" ngoo ce: ja: byid: too" ca" wa lha"» ga: doem myid: kaid. Myiyi: myhi' gi «Re" da" dazid thoung" yo' houg: mo tei" yo' nang ci: yen" da" lhamdung: byid: we» ga: tid. Yuda gi myiyi: myhi' ri hau: zi joem byid: wigi zoem" yhoeb pyam bye:. Houg: lho: myiyi: myhi' gi zoonu" gung bue" loo bye:.

¹⁹Thama gi nya: myo, nghoeb za: pain" shid pyam lho: nya: cougmoo" myhi' byimi doem void ci: wigi yhoem: khyoo: loo" bye:.

²⁰Yuda gi nya: bidnoem Hira ri coidbaid she: lho: myiyi: myhi' jang" mo kookham: zi yhe: yu loo wa shid re" nhang: kaid. Nghoid loug Hira gi hau: myiyi: myhi' ri ayhe: shoug" shoo:.

²¹Nyang: gi Enaim mo yuggi yi dayham" ri «He: da" khyoo: yam mo shava myhi' koid nyid su: gi khayoo: loo" bye:» ga: yhe: myid:. Nyangnu" gi «He: da" jang" mo khanham we' shava myhi' anyid yu"» ga: tid boem ago".

²²Nyang: gi doem tau" lo" lho: Yuda ri «Ngoo hau: myiyi: ri ashau" shoo:. Houg: mo yuggi yigi hid: moo khanham we' shava myhi' anyid yu" ga: lhoem: tid ago"» ga: wigi lo" tid.

²³Yuda gi «Hau zi joem ri nyang: ci: too" baja". Ngoonu" ri byu yi juang" yi wa ziri ngoonu" avhoo:.Ngoo gi nyang: ri aphoug" byid: wa ein: coid nu" dadu: ri byid: bye: nghoid loug nang gi nyang: ri ashau" shoo» ga: wigi tid.

²⁴Lhammoo" soem" khyab myang" thang: ri subi" dayug Yuda ri «Re" dumoo" Thama gi shava myhi' te" koid bye: wigi akhid" zoonu" gung bue" jo, bye:» ga: tid kyo" boem ago". Yuda gi «Nyang: ri shu" thu yu lho: myi: yo' nghe' said pyam ge'» ga: amyeing" byid: kaid.

²⁵Hougsu" myheig shu" thu lo uri nyang: gi nya: vang ri dang: pyeung: kaid zigi «Ngoo gi he: jonu" seing: su: jang" mo zoonu" gung bue" lo zi nghoid. Hau: ziri yu" lho: hang" zi nghoid ziri yu" yu" ge'. hau: da" zi joem gi he: da" dazid thoung" we' tei" we' lhamdung: we' nghoid» ga: tid.

²⁶Yuda gi hau: ziri se' yu" lho: «Nyang: gi koid eung: ziri koid bye:. Nya: tho' moo ngoo gi nga" zoo: Shela yo' nyang: ri zhoem" byid: ca" da" nga" yoovoin ri azei: nhung:» ga: tid lho: Yuda gi nyang: yo' khanham we' adoem zoem" yhoeb loo.

²⁷Nya: zoo: khu: wa bidnyid ayo, lo" ju" ri nyang: gi zoo: zoem khu: wa nghoid ziri se' yu bye:.

²⁸Nyang: zoonu" co' phyed nyid uri zoonu" dayug su: gi lo shi" ze thu lo wigi zoonu" pang" khu: su: gi zoonu" da" lo, moo khyeing: ni tei" byid: lho: he: yug shi" xang: shi" khu: zi nghoid» ga: tid.

²⁹Nghoid loug nyang: gi lo, doem she: fang yu wigi goo" yug su: shi" nyid thu lo. Houg: lang" zooshang: bo khu: su: gi «Nang gi re" khyoo: hid: su" phang wigi ri" nhung: lha"- hougsu" nyang: bue" loo baja"» ga: tid wigi nya: myeing ri Pereza ga: myeing myheing bye:.

³⁰Hau: thang: lo, moo khyeing: ni tei" ci: su: khu: thu lo lho: nyang: ri Zera ga: myeing myheing byid: bye:.