Read Lashi APOEM AYANG: 40 Bible Online

APOEM AYANG: 40 - Lashi bible

APOEM AYANG: 40

¹Gyisho' amyang" ri Egutu khokham pho da" zabyid yhid: dei su: yo' moug bung: su: tang: gi khokham ri yooboo shoid.

²Khokham phoo gi moo" voin tang: ri nheig yo: lho:

³Zung" lhoug zoug: pho yhoem: mo Yoseb ri lhung to' da" dakhyi' jang: moo yhe: kaid to".

⁴Nyangnu" thung: moo: dayo, zoo: nyid uri thung: agyi phoo gi Yoseb da" lo, khyoo: dei zoo: yi yhang: ti" ab byid: to".

⁵Hau: thung: khoug: moo: damyen ri zabyid yhid: dei su: yo' moug bung: su: gi dang: kang: adu go" da" yhoebmo, dayug daja: mo, boem ago".

⁶Nab soin: ri Yoseb gi nyangnu" jhang ju" re" uri nya: tang: gi amyen akhyoid bue" nyid ziri yhe: myang.

⁷Nyang: gi nya: tang: ri «Akhid" nyid" ciwim yoomo re" tang: gi seing" kho" nyid go" lha"» ga: myid:.

⁸Nya: tang: gi «Nga" tang: gi yhoebmo, dayug daja: mo, wigi hau: yhoebmo, da" dang: kang: ri se' phuid: da" byu hid moo: dayug we' anyid» ga: lhoem: tid. «Yhoebmo, ri yo" phuid: wa su: gi Mangsoo nghoid- nanu" da" yhoebmo, ngoo ri tid kyoo" ge'» ga: Yoseb tid.

⁹Houg: yoomo zabyid yhid: dei su: gi «Nga" da" yhoebmo, moo zabyid danei gi nga" shidkhoin" moo nei jo, wigi

¹⁰houg: moo soem" ko' ko' zi nghoid. Houg: lang" jang: afu' toid lo wigi aboo" boo" ashi" zei: lo lho: ashi" myheing lo da:.

¹¹Ngoo gi khokham pho da" koem: zei: ci: lho: ngoo gi ashi" ri phyo' yu lho: koem: moo ayeing ri myheig jhoeb kaid wigi hau: ziri khokham phoo ri lo" byid:» ga: tid kyo".

¹²Yoseb gi «Hau: yhoebmo, da" dang: kang: gi hid: su" nghoid. Soem" ko' ein: zigi soem" nyid" nghoid.

¹³Soem" nyid" lang" khokham phoo gi nang ri loid byoin nhang: wigi yooboo khyoid pyam byid: lho: akhang: da" re" moo" moo doem zei: nhang: wa nghoid. Goonham' nang koid ziyo' dakhyoo" ti"- nang gi nya: koem: ci: lho: zabyid yhid: dei su: doem bui" wa nghoid.

¹⁴Nghoid loug jeju" mo nang nyid gi yab gi shau" da" bidnyid moo ngoo ri we' boin: we' lhe"- hau: lho: khokham phoo nheig khyeug shoo" myeing: sho' nga" khyoo: tid khyo" wigi he: thung: mo yo" khyoid yu sho' ngoo ri jen" pang" yu wa.

¹⁵Khasu" wim gari ngoo gi Hebre moug: mo atarha" khyo" re" oung" zoo: shoug" lho: Egutu moo re" ju" thang: ri we' ngoo gi thung: lung" moin: da" ci: yooboo we' ashoid zi za: thung: lung" nyid su: nghoid» ga: tid kyo".

¹⁶Zabyid yhid: jang su: da" yhoebmo, phuid: kyo" khyoo: gi gyoo: noug tung" nghoid ziri moug bung: su: shoug" gyoo: lang" nyang: gi Yoseb ri «Ngoo we' yhoebmo, daloem: myang. Ngoo gi moug zooyho' kyang soem" loem: ri nga" vhuloem tho' moo ke" vu ci: lo.

¹⁷Je atho' mo kyang moo gi khokham phoo shid re" moug zooyho' cang: joeb kaid to". Ngho' joem gi houg: dangain" ri zo: pyam byid:» ga: wigi tid.

¹⁸Houg: lang" Yoseb gi «Hau: da" dang: kang: gi hid: su" nghoid- kyang soem" loem: gi soem" nyid" nghoid.

¹⁹Soem" nyid" lang" khokham phoo gi nang ri khe: thu yu lho: re" vhuloem ri phyed pyam wa nghoid. Hau: lho: nyang: gi re" gung ri seiggam phyoo" moo lhang" to" wigi ngho' joem gi re" shoo" ri zo: pyam wa nghoid» ga: wigi tid phuid: kyo".

²⁰Soem" nyid" myang" thang: ri khokham phoo nya: da" co' phyed bidnyid moo nya: da" zoug: ludaid yiri zoo: shug zho" jhug. Nyang: gi nya: da" zabyid yhid: jang su: yo' moug zooyho' bung: su: tang: ri khe: thu yu lho: nya: zoug: ludaid yi jhang khyoo: shu" thu lo.

²¹Nyang: gi zabyid yhid: jang su: rigi xang: shi" mo nya: moo" moo doem zei: nhang:.

²²Nghoid loug moug zooyho' bung: su: rigi said pyam da:. Yoseb tid ziyo' dakhyoo" ti" dangain" bue" lo.

²³Nghoid loug zabyid yhid: jang su: gi Yoseb ri amyid boin:- nya: khyoo: ri dangain" to" myhed pyam da:.