Read Lashi APOEM AYANG: 42 Bible Online

APOEM AYANG: 42 - Lashi bible

APOEM AYANG: 42

¹Yaku gi Egutu mung" moo zoo: noem jo, khyoo: ri si lang" nyang: gi nya: zoo: tang: yiri «Nanu" ci akoid loo ciwim nyang: cang" nyang: yu" go" nyid go" lha".

²Egutu mung" moo zoo: noem jo, khyoo: ri ngoo shau" gyo:. Zooyoid wigi nyhang" ashid: wa shid re" houg khyoo: yhe: lho: zoo: noem yhe: qei loo ge'» ga: tid.

³Houg: yoomo Yoseb da" nya: mang bang: daxi: yug bang: ri Egutu mung" khyoo: gug zoo: qei nhang: kaid.

⁴Nghoid loug Yaku gi Yoseb da" nya: nhung" Benyamin rigi nyangnu" yo' anhang: kaid. Khasu" wim ga: ri nyang: daja: ja: yhe: bue" byug wa ci' yoomo nghoid.

⁵Yaku da" nya: zoo: yigi gug zoo: qei wa shid re" byencang" yi yo' re" lo. Khasu" wim ga: ri Khanan mung" moo phang: khoug bue" jo, bye:.

⁶Egutu mung" mo meing: vhoeb zoug: moo" Yoseb gi moug: gyab goin" mo mung" byu yiri gug zoo oung" byid: nyid. Houg: yoomo Yoseb da" nya: mang: yigi re" lho: nyangnu" da" myonhoo: ri myidjang khyoo: goeb khyo' lho: nya: shidkhoin" moo re" pid nyid boem.

⁷Nyang: gi nya: mang: nhung" bang: ri myang lang" nyang: gi nyangnu" ri se' yu" bye:. Nghoid loug nyang: gi nyangnu" ri ase' khyo" koid. Nyang: gi nyangnu" ri thain: thain: nyang: myid: zigi «Nanu" khakhyo" re" lo boem ago"» «Ngoonu" gi Khanan mung" mo zoo: noem qei wa shid re" ri" mo, nghoid» ga: nyangnu" tid boem.

⁸Yoseb gi nya: mang: bang: ri se' yu" bye:. Nghoid loug nyangnu" gi nyang: ri asi' shi".

⁹Nyang: gi nyangnu" da" khyoo: yhoebmo, mo, to" da" ziri boin: so" kaid lho: tid zigi «Nanu" gi jooyu" bang: nghoid- nanu" gi ngoonu" mung" da" yoem: neing: khyoo: ri yu" wa shid re" ri" mo, nghoid» ga: wigi tid.

¹⁰«Aseing: we"- hougsu" anghoid o". Ngoonu" gi re" da" join joem khyo" zoo: noem qei ri" mo, danghoid.

¹¹Ngoonu" gi datang: ho' yi za: danghoid. Aseing we"- ngoonu" gi jooyu" mo, anghoid- nga" tang: ho' yigi nheigloem: zung" mo, danghoid» ga: tid.

¹²Yoseb nyangnu" ri «Anghoid- nanu" gi ngoonu" mung" da" yoem: neing: khyoo: ri yu" wa shid re" ri" mo, nghoid» ga: tid.

¹³Nyangnu" gi «Nga" tang: ho' yigi dangain" daxe: eig yug nghoid. Aseing: we' Khanan mung" mo dapho' nya: zoo: yi za: nghoid. Nhung" dayug gi shid: bye:- houg: lho nge thang su: gi akhid" aba" yo' nyid kho'» ga: doem tid boem.

¹⁴«Ngoo tid bye: ziyo' dakhyoo" ti" nanu" gi jooyu" mo, nghoid» ga: wigi Yoseb doem tid.

¹⁵Xo' lho: «Nanu" ri hid: su" joeb wa Ngoo deing" deing tid zigi khokham da" voolang myeing khyo" jham' tang: wigi nanu" da" nge thang da" nhung" ri hid: moo ashu" re" rigi nanu" ayo" thu loo" wa nghoid.

¹⁶Nanu" mo dayug yug lo" lho: nyang: ri lo" shu" we'. Deing da" bang: nanu" gi lhoug zung" to" da" akhoug: moo nanu" tid da" dang: deing ziri shau" myang: yo, ju" sho' nyid nyid zi shoug" ca" goo" wa. Hougsu" anghoid lang" khokham dei nyid ziyo' dakhyoo" ti" nanu" gi jooyu" mo, nyang: nghoid» ga: tid.

¹⁷Hau: thang: nyang: gi nyangnu" ri thung: moo soem" nyid" lhung to" da:.

¹⁸Soem" nyid" ein: wa nyid" moo nyangnu" ri Yoseb gi «Ngoo gi Mangsoo ri gyoug phau" nyid su: dayug nghoid wigi ngoo gi nanu" da" kangso' ri dakhyoo" ti" khyam" sa: byid: wa bye:.

¹⁹Nanu" da" deingmain" khyoo: toin" shed wa shid re" nanu" ri nyhid: to" da" joyoo thung: moo nanu" mo dayug su: nyid khoo' ca" wa nghoid. Gootu: bang: gi lo" lho: zooyoid gyid shid shoug" nyid da" yhoem: byu yi jhang khyoo: nanu" qei ci: ca" gug zoo: joem ri ci: tau" loo" we'.

²⁰Hau: thang: nanu" gi nanu" da" nhung" nge thang su: ri nga" jhang khyoo: shu" ri" we'. He: zigi nanu" tid dang: deing khyoo: thang" cab bue" wa nghoid wigi ngoo gi nanu" ri said loo wa zi anghoid» ga: tid. Nyangnu" we' hau: ziri myid veing" lho:

²¹Dayug yo' dayug gi «Nyhang" gi nyha" nhung" ri koid kaid ziyo' dakhyoo" ti" akhid" nyhang" kyi" khyeug ziri thoung" shoug" nyid bye:. Nyhang" gi nyang: asho" ajhen: gyoug dain wigi pang" yu wa mho' uri nyhang" myang nghoid loug nyhang" atam" gyoo: byid:. Hau: gang mo nyhang" akhid" he: gyoug phoo" shoug" nyid bye:» ga: tid go" nyid boem.

²²Ruben gi «Ngoo gi nhung" ri dam adab' wa shid re" tid bye: nghoid loug nanu" atam" gyo: boem. Houg: lho: akhid" nyhang" gi hau: da" nya: shid: gyoin aphoug" doem thung" shoug" nyid boem bye:» ga: tid.

²³Yoseb gi nyangnu" citid go" nyid ziri se'- nghoid loug nyangnu" gi hau: ziri asi'. Khasu" wim ga: ri nyangnu" gi nyang: yo' dang: di" de" byid: su: dayug khyo" dang: dashau" ji boem yoomo nghoid.

²⁴Yoseb gi nyangnu" jang mo thu lo" lho: ngau nyid. Nyang: dang: doem yo" tid wa nghoid lang" nyang: doem re" lho: Simun ri khyen: thu yu lho: nyangnu" da" shidkhoin" moo Yoseb gi nyang: ri tei" nhang: bye:.

²⁵Yoseb gi nya: mang: bang: ri gug byid: kaid lho yugkhang" mo" da" ngei ri nyangnu" nya: da" thung: khoug: moo doem kaid byid: wigi nyangnu" ri khyoo: moo zoo: wa shid re" zoo: shug we' byid: kaid ge' ga: amyeing" byid: kaid. Hougsu" nyang: koid boem bye:.

²⁶Nya: mang: bang: gi nyangnu" da" loo zei: joem moo nyangnu" qei yu da" gug too: ri tho' lho: nyangnu" lo" boem bye:.

²⁷Nyangnu" yhoeb da" joyoo mo dayug su: gi nya: loo zei: ri zoo zhoo" wa shid re" thung: ri phang kaid ri thung: da" atho' moo nya: ngei ri myang bye:.

²⁸«Nga" ngei gi nga" jhang doem byid: tau" kaid da» ga: wigi nyang: gi nya: mang: nhung" yiri khe: kaid. «Hid: the' nga" thung: khoug: moo» ga: tid. Nyangnu" gi dain lho: gyoug zoo" re" nyang: cang" «Mangsoo gi nyhang" ri cikoid bye: lha"» ga: tid.

²⁹Nyangnu" gi Khanan mung" mo nya: phoo Yaku jhang ju" lo lho: nyangnu" gi nyangnu" moo bue" lo khyoo: dangain" nyang: ri tid kyoo" bye:.

³⁰«Egutu meing: vhoeb zoug: moo" gi ngoonu" ri thain: thain: tid lho: nya: moug: ri thougtheung wa jooyu" mo, khyo" ngoonu" ri yooboo zhug.

³¹‹Ngoonu" gi jooyu" mo, anghoid› ein: ngoonu" tid bye:. ‹Ngoonu" gi deingmain" mo, danghoid.

³²Ngoonu" gi dapho' nya: zoo: yi nghoid lho: mang: nhung" daxe: eig yug nghoid. Nhung" dayug su: gi shid: bye:- houg: lho: nge thang da" nhung" gi aba" yo' dage" Khanan moo nyid kho'› ein: tid lang"

³³zoug: phoo gi ‹Nanu" gi deingmain" mo, nghoid anghoid ziri si' wa shid re" hid: su" koid wa nghoid. Nanu" mo dayug su: ngoo yo' nyhid: kho' lho: gootu: yigi nanu" da" zooyoid shoug" nyid da" yhoem: byu yi jhang gug ci: lho: loo" ge'.

³⁴Nanu" da" nge thang da" nhung" ri nga" jhang shu" ri" ge'. Houg: lang" she' nanu" gi jooyu" mo, anghoid- byu gi yi danghoid ziri daloem" wa. Ngoo gi nanu" da" mang: nhung" phoo ri nanu" jhang doem tau" byid: lho: nanu" gi hid: moo yo" nyid wigi phaga: yo" koid boem wa nghoid» ga: tid kyo" da:.

³⁵Hau: thang: nyangnu" gi nyangnu" da" thung: joem ri foid kaid ri nyangnu" yugkhang" moo" gi nyang: nya: ngei thung: ri myang boem ago". Houg: lho: nyangnu" ngei ri myang lang" nyangnu" yo' nya: phoo Yaku gi gyoug bye:.

³⁶Nya: phoo nyangnu" ri «Nga" zoo: dangain" ri nanu" ci: phyug nhang: noug: go" la". Yoseb we' anyid loo. Simun we' anyid loo: houg: lho: akhid" nanu" gi Benyamin ri we' doem shu" yhe: nau boem abye:. Ngoo gi myid myoo: oung: lug shau" nyid bye:» ga: tid.

³⁷Ruben gi nya: phoo ri «Benyamin ri ngoo adoem shu" tau" lo nghoid rigi nang nga" zoo: tang: ri said pyam we'. Nyang: ri ngoo goo" lhoo: za: yu" coung: lho: ngoo nyang: ri doem shu" tau" loo wa» ga: tid.

³⁸Nghoid loug Yaku gi «Nga" zoo: ri re" thang: ayo" cang nhang: wa. Nya: mang: gi shid: bye:- nyang: khyeing" date: deing lo:. Gyung: khyoo: moo nyang: daja: ja: ge bue" da:. Ngoo gi mang: bye: houg: lho: nang ngoo ri koid byid: da" kougshu: khyoo: gi ngoo ri shid: loo" nhang: wa bye:» ga: doem tid.