Read Lashi APOEM AYANG: 6 Bible Online

APOEM AYANG: 6 - Lashi bible

APOEM AYANG: 6

¹ Xangsu: byu yigi moug: gyab goin" moo nyid je: nyid byeung" lo" lho: myiyi: zoo: yiri khu: myhu: nyid boem ri

²Mougkhung: mougdi nu" yi dayham" gi myiyi: nu" yi yung" ziri myang yoomo yu" ngei yug ri yhoem: seing: myhi' khyo" khyen: yu boem ago".

³Houg: lang" ASEING gi «Ngoo gi byu yiri apyaid atoo: adei nyid nhang: loo: wa nyangnu" gi shid: wa byumyu" nghoid. Akhid" mo nyangnu" gi apyaid 120 zain tho' moo yo" dei jain" loo: wa anghoid» ga: tid.

⁴ Hau: pyaid moo we' hau: thang: moo we' xangsu: myiyi: yi yo' mougkhung: mougdi nu" yi mo nyid re" da" byugyi: byumyhang: yi mougmyid tho' moo nyid khare". Nyangnu" gi yoem: vhoo" gye" bo lho: goonham' mo myeing fu" mo, nghoid boem ago".

⁵ Mougmyid tho' mo byu yugkhang" moo" gi khanham we' gye" akhyeing" da" ziyo' gye" ashoeb da" nyangnu" myid soin: khyoo: ri ASEING myang uri

⁶Nyang: gi nyangnu" ri phain" so: to" lho: he: mougmyid tho' moo nyhid: to" ziri nheig koug nyid bye:. Nyang: gi nung myid yo" ziyo'

⁷Nyang: gi «Ngoo phain" so: to" da" he: da" byu yiri ngoo shoem" shoung: pyam loo wa. Houg: lho: gougnyhoug joem yo' ngho' joem ri we' shoem" shoung: pyam wa. Khasu" wim gari nyangnu" ri ngoo phain" so: to" zi gye" nheig koug bye:» ga: tid.

⁸Nghoid loug we' Noa gi ASEING da" nheig dab su: nghoid nyid.

⁹ He: zigi Noa da" mhoomyid: nghoid. Nyang: gi Shem- Ham yo' Yaphed ein: da" yuggi zoo: soem" yug yo". Noa gi shoid vhang: khyoo: ajo, wigi nya: pyaid moo nyang: kyeing" za: byugi nghoid. Nyang: gi Mangsoo yo' tab did" nyid.

¹¹Nghoid loug gootu: dangain" mo, gi Mangso shidkhoin" moo ashoeb mo, za: nghoid lho: pyi: joem: sho: moo" gi moug: gyab goin" byeung" jo, bye:.

¹²Mangsoo gi moug: gyab khyoo: yu" kaid lho: myang zigi byu yigi ashoeb khyo" za: nyid nyid boem yoomo akhyeing" ashoeb khyoo: ri za: yu" myang kaid.

¹³Mangsoo gi Noa ri «Ngoo gi xangsu: byu yi dangain" ri thang loo" nhang: wa myid phyed too" bye:. Ngoo gi nyangnu" ri jhoid phyo' shoin' pyam loo wa. Khasu" wim gari moug: gyab goin" gi nyangnu" da" pyi: joem: sho: moo" za: byeung" jo, bye:.

¹⁴Seig thi" gi yo' gyid lhid moo" zeing daloem: nanya: shid re" zhug we'. Hau: akhoug: moo ayab yab koid to" lho: athi" atho' dangain" moo seig gyid, joid too" we'.

¹⁵Hau: ziri sheing: khyoo: 450 pe:- lam khyoo: 75 pe:- myhang: khyoo: 45 pe: koid we'.

¹⁶Gyid Lhid moo" zeing moo moug: gau: we' koid nghoeb lho: voozoo, thang: gi pyiyam mo nghi: khyoo: 18 lo, shi" zi ca". Gain: jang" soem" zhang kaid wigi hkoem" daduang: phang we'.

¹⁷Dei moodei nyid moonyid ri phyo' shoin' pyam wa shid re" mougmyid tho' khyoo: ngoo gi tagyid shi' nhang: wa nghoid bye:. Mougmyid tho' moo nyid moonyid gi shid: byug wa nghoid.

¹⁸Nghoid loug ngoo gi nang yo' dang: thang" cab too" wa. Nang yo' re" yhoem: seing: myhi'- re" zoo: yi yo' re" du moo" yigi gyid lhid moo" zeing khau: khyoo: vang ge'.

¹⁹Nang yo' dage" gyid lhid moo" zeing khoug: khyoo: gougnyhoug acang: joeb, yo' ngho' zoo: yen" zoo: cang: joeb ri amyhi' yo' aphoo' dazoem" zoem" koid lho: kangso' loid byoin wa shid re" fang yu ge'.

²¹Nanu" shid re" we' gougnyhoug joem shid re" we' zoo: shug cang: joeb kaid too" ge'» ga: tid.

²² Noa gi Mangsoo tid ziyo' dakhyoo" ti" dangain" ri koid bye:.