Read Lashi APOEM AYANG: 8 Bible Online

APOEM AYANG: 8 - Lashi bible

APOEM AYANG: 8

¹Mangsoo gi Noa yo' nyang: yo' dage" gyid lhid moo" zeing khoug: moo loung" nyid da" gougnyhoug dangain" ri boin: so" nyid yoomo nyang: gi lid ri hau' nhang: lho: gyid ri kain" loo" nhang: bye:.

²Mougmyid mo gyid thu duang: joem yo' mougkhung: gyid khoem" joem ri myhid" pyam bye:. Moug: nghain: lho:

³gyid gi dasho: wim: xi: nyid" ju" sho' yen yen kain" loo" bye:.

⁴Lhammoo" nyhed khyab ein: khyab daxe: nyhed nyid" nyid" moo gyid lhid moo" zeing gi Ararad boem tho' moo ki" khari" bye:.

⁵Gyid gi xo' xo' kain" lo" lho: daxi: khyab khyab xang: shi" nyid" moo boem phyoo" boem nyug joem ze thu lo.

⁶Hau: thang: myid: xi: nyid" ri Noa gi bangzoo: khoem" daloem: phang lho:

⁷Kano, dadu: ri nhang: thu kaid. Hau: ngho' gi adoem tau" loo looza: gyid bain kyug kain" da" ayo, moo ju" sho' dang: lam" lheing: yen" byoug da:.

⁸Hau: ayo, aboin: moo Noa gi gyid kain" bye: ziri si' wa shid re" pheing" kyoug" dadu: nhang: thu kaid.

⁹Nghoid loug mougmyid dangain" moo gyid dadeing nyid wigi pheing" kyoug" gi gyo" noo: wa jang: ashau" shoo: yoomo nyang: gi gyid lhid moo" zeing khyoo: doem dang: tau" lo wigi Noa gi lo, yhoin" kaid lho: akhoug: khyoo: lhoem: fang yu.

¹⁰Nyang: gi thang: nyhed nyid" doem lang" lho: pheing" kyoug" ri doem nhang: thu kaid.

¹¹Pheing" kyoug" gi myen" thang: zoo" moo zhainloin: fu' ajoem: dafu' thei" dang ci: lho: doem lo. Houg: yoomo Noa gi gyid bain kain" bye: ziri se' abye:.

¹²Hau: thang: nyang: gi nyhed nyid" doem myang" lang" pheing" kyoug" ri dalheing: doem nhang: thu kaid- he: lheing: moo gi adoem tau" loo loo:.

¹³Noa gi 601 zain byeung" da" xang: shi" khyab da" xang: shi" nyid" moo gyid gi bain kain" khari" bye:. Noa gi gyid lhid moo" zeing mo amyhid" ri phang pyam lho: ayam khyoo: yu" kaid ri myidjang dangain" kyug zo" loo" bye: ziri myang bye:.

¹⁴Eig khyab ein: wa da" eig xe: nyhed nyid" nghoid lang" myidjang gi goo" lhoo: za: kyug hei' bye:.

¹⁵Mangsoo gi Noa ri

¹⁶«Re" yhoem: seing: myhi'- re" zoo: yi re" dumoo" yi yo' dage" gyid lhid moo" zeing mo thu loo" we'.

¹⁷Ngho' joem yo' gougnyhoug joem dangain" gi moug: gyab goin" moo doem nyid je: loo" wa shid re" nang yo' dage" shu" thu loo" we'» ga: tid.

¹⁸Houg: yoomo Noa gi nya: yhoem: seing: myhi'- nya: zoo: yi nya: dumoo" yi yo' dage" gyid lhid moo" zeing mo thu boem bye:.

¹⁹Gougnyhoug dangain" yo' ngho' joem dangain" gi nya: phung: yo' phung: gyid lhid moo" zeing mo thu lo" boem ago".

²⁰Noa gi ASEING shid re" phoin: daloem: ri zhug: lho: nyang: gi younglho' da" gougnyhoug yo' ngho' ja: khang" moo" mo dadu: du: ri yu lho: phoin: tho' moo phoid ngei" byid: bye:.

²¹Ngei" to' byid: da" nam pyo: xoin" shoem: ri ASEING gi nheugshid: ziyo' nya: gung nyang: «Xangsu: byu yi da" shoid vhang: khyoo: gang mo ngoo gi mougmyid ri nheing" khoin" khanham we' shoug" nhang: loo wa zi anghoid. Nyang: gi ngi shi" mo nyang: nya: da" myid soin' khyoo: gi nheig akhyeing" ziri ngoo si' bye:. Ngoo gi akhid" lheing: koid yhang: te" da" dei moodei ri said mhoin' pyam khyoo: ri khanham we' ngoo doem koid loo wa anghoid.

²²Mougmyid dajo, jo, gi houg: moo kyoo' khyoo' yo, yo' yham" zheing" yo, gi dajo, jo, nyid wa bye:. Houg: moo ngam" jham" yo, yo' lung yo, zain yo' xung"- nyid" yo' myen" gi khanham we' dajo, jo, wa bye:» ga: tid.