Read Lashi APOEM AYANG: 9 Bible Online

APOEM AYANG: 9 - Lashi bible

APOEM AYANG: 9

¹Mangsoo gi Noa yo' nya: zoo: yiri mainkaid byid: lho: «Nanu" da" amyed ashen yigi mougmyid gyab goin" moo nyid byeung" loo" wa shid re" zooshang: myoo" sho' yoo" goo" baja".

²Gougnyhoug joem dangain"- ngho' joem yo' wimdo, joem dangain" gi nanu" ri gyoug loo goo" baja". Nyangnu" ri nanu" da" yoem: so' khoug: moo to" too" bye:.

³Akhid" nanu" gi nyoug moonyoug nghang" pho shivoo: ri yo" zoo: bye:. Ngoo gi gougnyhoug dangain" ri we' re" zoo: shug khyo" byid: bye:.

⁴ Suid" daboo shi" da" shoo" rigi azo: goo". Suid" moo kangso' boo yoomo he: ziri ngoo toung: to".

⁵Hang" nghoid loug we' byu da" kang: phyed nghoid rigi nyang: we' yooboo dam kaid zi shoug" wa nghoid. Ngoo gi byu dayug yug da" kang: ri phyed da" ce: gougnyhoug ri we' shid: da" yooboo dam byid: wa.

⁶ Byu gi Mangso gung du: phain" so: to" zi nghoid yoomo byu dayug da" kang: ri kuang said su: hang" nghoid loug we' nyang: gung nyang: nya: bidnoem yi wigi said pyam zi shoug" wa nghoid.

⁷ Nanu" da" amyed ashen yigi moug: gyab goin" moo byeung" loo" sho' nanu" gi zooshang: myoo" sho' khu: ge'» ga: tid.

⁸Mangsoo gi Noa yo' nya: zoo: yiri

⁹«Ngoo gi nanu" yo' we' nanu" da" amyed ashen yi yo' we' akhid" thang" cab koid too" bye:.

¹⁰Houg: lho: nanu" yo' dage" gyid lhid moo" zeing mo loid thu da" ngho' zoo: yen" zoo:- gougnyhoug gougdoo:- dei moodei nyid moonyid dangain" yo' we' thang" cab to" too" bye:.

¹¹Dei moodei dangain" ri tigyid shi' khyo" khanham we' ngoo gi phyo' shoin' pyam zi ashau" nhang: loo wa. Tigyid gi khanham we' mougmyid ri aphyo' shoin' loo wa. He: dang: gi nanu" yo' ngoo to" da" thang" cab dang: soo" nghoid.

¹²Nanu" yo' we' dei moodei yo' we' ngoo koid to" da" apyaid ato: da" thang" cab void voo khyo"

¹³Ngoo gi jhoemmoug" khoug: moo nga" seing: yhang: yo, gain: ri to" too" bye:. Hau: zigi mougmyid yo' ngoo to" to" da" thang" cab' void voo: nghoid jo, wa bye:.

¹⁴Ngoo gi mougkhung: ri jhoemmoug" yo' nghoeb zeing" to" lho: seing: yhang: yo, gain: thu jo, khang" moo"-

¹⁵Dei moodei ri khanham we' tigyid shi' khyo" aphyo' shoin' pyam loo: wa ein: nanu" ri we' gougnyhoug joem riwe' ngoo byid: to" da" nga" dang: thang" cab ri doem myid soo" wa nghoid.

¹⁶Seing: yhang: yo, gain: gi jhoemmoug" moo thu lang" ngoo gi hau: ziri myang lho: mougmyid tho' mo dei moodei dangain" bang: yo' nga" agyoo: moo to" to" da" apyaid ato: thang" cab ri doem myid so" loo wa.

¹⁷He: zigi dei moodei dangain" mo, ri ngoo byid: to" da" dangsoo" void voo: nghoid».

¹⁸Gyid lhid moo" zeing mo loid byoin thu lo da" Noa da" zooshang: yigi Shem- Ham- Yaphed bang: nghoid boem. Ham gi Khanan da" nya: phoug" phyid" nghoid.

¹⁹He: da" Noa nya: zoo: soem" yug gi mougmyid xangsu: byu dangain" da" phoug" phyid" nyang: nghoid bye:.

²⁰Noa gi dain" moo" zei: zoo: su: dayug nghoid lho: zabyid shi" khyam: ri xang: shi" koid su: we' nghoid.

²¹Hau: thang: nyang: gi zabyid yhid: shug yid wigi nya: byimi dangain" shang: pyam lho: nya: zoem" khoug: moo gung cen: jhang" to".

²²Khanan da" nya: phoo Ham gi nya: ba" Noa gung cen: bue" nyid ziri myang lang" nya: mang: yo' nhung" tang: ri yhe: tid kyo" da:.

²³Houg: lang" Shem yo' Yaphed tang: gi byisheing: dakhyab ri yu lho: nya: tang: da" lo sain: moo ke" ci: wigi zoem" khoug: khyoo: nung zoid zoid yhe: lho: nya: phoo ri yhe: nghoeb byid: bye:. Gung cen: bue" jo, ziri amyang sho' nya: tang: gi myonhoo: goo" shoid shu: boem ago".

²⁴Noa gi doem gyeing: lo lho: nya: zoothang yug nyang: moo byisheing: lo foid to" ziri si' lang"

²⁵Nyang: gi «Khanan gi nheing" khoin" zang" baja". Nyang: gi nya: mang: nhung" yi da" join bue" loo baja".

²⁶Shem da" Mangsoo ASEING ri coung" o". Khanan gi Shem da" join bui" wa nghoid.

²⁷Mangsoo gi Yaphed ri nya: mougmyid ri gyi: myang: myoo: tham: nhang: baja". Nya: da" amyed ashen yigi Shem byumyu" yi yo' dage" nyid goo" baja". Khanan gi Yaphed da" join bui" wa nghoid» ga: tid.

²⁸Tigyid shi' thang: moo Noa gi 350 zain xo' nyid lho:

²⁹Apyaid 950 zain moo shid: khari" bye:.