Read Lashi 2 SAMUELA 12 Bible Online

2 SAMUELA 12 - Lashi bible

2 SAMUELA 12

¹ASEING gi lapi: Nathan ri David jhang khyoo: nhang: kaid bye:. Nathan nya: jhang khyoo: yhe: lho: tid zigi «Voogung daloem: moo byu eig yug nyid. Dayug gi yoo" zoo: yoo" shug lho: thang: dayug gi sho" jhen: nyid da:.

²Hau: yoo" zoo: yoo" shug su: gi yang joem nu: joem myoo: sho' yo" nyid uri

³Sho" jhen: su: gi nyang: qei yu da" yang nu" dadu: kyeing" dayo" da:. Nyang: gi hau: yang ri khu: myhu: wigi hau: ziri nya: yhoem: mo nya: zoo: yi yo' dage" gyi: sheung: lo nyid da:. Nyang: gi hau: ziri nya: zooshug byid: zho"- nya: goem mo gyid jhug wigi nya: shidkhoin" khoug: moo vu ci: da:. Hau: yang nu" gi nya: shid re" nya: zoo: myiyi nu" dayug yhang: ti" nghoid nyid da:.

⁴Danyid" da" bidnyid ri yoo" zoo: yoo" shug su: da" yhoem: moo being" voo dayug ju" nyid da:. Houg: lang" hau: yoo" zoo: yoo" shug su: gi being" voo ri zooshug soin byid: wa shid re" nyang: yo" da" gougnyhoug dadu: ri we' anau said nghoid da:. Hougsu" said wa gungthid sho" jhen: su: da" yang zoo: ri yu wigi being" voo shid re" zooshug yhung byid: pyam da» ga: tid.

⁵Houg: lang" David gi yoo" zoo: yoo" shug su: ri nheigloem: gye" yoin ziyo' «Houg: yhang: te" da" byu gi shid: geing: nyid da: ein: kangso' ASEING ri ngoo jham' tang: zi nghoid.

⁶Houg: yhang: ti" zo da" akhyeing" moo" zoo" ri nyang: koid bye: yoomo nyang: yu pyam bye: gu: tho' myid: boem doem lung: lho: xab ca" zi nghoid» ga: wigi tid da:.

⁷Nathan gi David ri «Hau: yug gi nang nghoid nyid da:. He: zigi Israela byumyu" yi da" ASEING Mangsoo tid zi nghoid. Akhid" Sholu da" lo, mo nang ri ngoo khyoid yu lho: Israela byumyu" yi da" khokham ngoo nang ri koid nhang: to" zi nghoid.

⁸Houg: lho: nya: mungdain: ri we' nya: yhoem: seing: myi yiri we' ngoo nang ri ab byid: bye:. Israela yo' Yuda mung" ri vhoebkhang" wa khokham ngoo nang ri bui" nhang: bye:. Houg: zi kyeing" atham: shi" nghoid rigi ngoo nang ri eig boem doem jain" byid: wa zi nghoid.

⁹Hougsu" nghoid ri nga" amyeing" dang: joem ri nang ciwim yoomo atam" gyoo: koid lha". Hid yhang: te" akhyeing" da" moo" zoo" ri nang ciwim yoomo zang" koid lha". Nang Uria ri meing: zain: jang: moo said pyam bye:. Amon byu yi da" lo, yo' nyang: ri said pyam nhang: bye:. Hau: thang: nya: yhoem: seing: myhi' ri nang yu pyam bye: nhung:.

¹⁰Nang gi nga" dang: ri atam" gyoo: wigi Uria da" yhoem: seing: myi ri yu pyam byid: bye: yoomo byu ngoug xiyam: mo re" akung: ako' dayham" gi mi: shid: shid: zi shoug" wa zi nghoid.

¹¹Nang ri yau: khi" byid: wa shid re" ngoo gi nang seing: da" re" ikoin deungkhu: mo dayug yug ri bui" nhang: wa ein: ngoo nang ri jham' tang: bye: zi nghoid. Re" lo, mo re" yhoem: seing: myhi' yiri ngoo yu pyam byid: wigi gootu: byu dayug da" lo, moo ab byid: ziri we' nang shau" myang wa zi nghoid. Houg: lang" nyang: gi nyid" dang: gung tu: da" ayo, ri re" yhoem: seing: myhi' yi yo' myiyi: yuggi gung shoo" zoem" khau: shug wa zi nghoid.

¹²Nang gi gye" goug: khyo" yooboo ri shoid bye:- nghoid loug we' Israela byu yi dangain" bang: yo" myang si' goo" baja" nyid" dang: gung te" da" ayo, ri he: moo" zoo" ri ngoo bui" nhang: wa zi nghoid» ga: tid.

¹³Houg: lang" David gi «Hau: ASEING ri ngoo yooboo shoid bye:» ga: tid. Nathan we' «Hau: ASEING nang ri yooboo khyoid byid: nyid bye:- nang shid: wa zi anghoid.

¹⁴Nghoid loug we' he: moo" zoo" ri koid wigi hau: ASEING ri anoug akhyoid da" moo" zoo" ri koid shug bye: yoomo re" zoo: gi shid: ca" wa zi nghoid» ga: wigi tid da:.

¹⁵Hau: thang: Nathan gi yhoem: khyoo: lo" byug bye:. Uria da" yhoem: seing: myhi' David shid re" khu: byid: da" zooshang: ri ASEING gi gye" noo nhang: bye: da:.

¹⁶David gi hau: zooshang: ge loo wa shid re" Mangsoo jang" moo akyu" mho' bye:. Zooshug daja: ja: zoo: wa shid re" he: pyam wigi myen khang" myen nya: yab khyoo: vang lo" lho: phyang" gung moo jhang" to" wigi myen" ayo, ri lhid: kaid kaid koid nyid da:.

¹⁷Nya: khokham vang" mo nya: gyizoug: bang: nya: jhang re" wigi re" nhoug" yu" nghoid loug we' nyang: he: pyam lho: nyangnu" yo' dage" ciwe' azoo: ashug looza: nyid nyid da:.

¹⁸Labain dabaid thang: ri hau: zooshang: shid: lo" byug bye:. David da" gyizoug: bang: we' hau: lu dang: nyang: ri tid kyoo" wa shid re" gyoug nyid boem ago". Hougsu" yoomo nyangnu" gi «Hau: zooshang: dei nyid shi" uri lang" nyha" dang: ri atam" gyoo: ri akhid" nya: zoo: shid: byug bye: da" khyoo: nyang: ri ngoonu" khasu" yo" tid kyoo" wa lha". Nya: gung ri je" noo sho' zang" koid wa» ga: tid da:.

¹⁹David gi nyangnu" nyang: cang" dang: so' so' go" nyid ziri se' yu" lang" zooshang: shid: bye: ga: ziri se' lo da:. Hougsu" yoomo nyang: gi nyangnu" ri «Zooshang: shid: bye: rhe"» ga: myid: da:. Nyangnu" we' «Nghoid- shid: byug bye:» ga: tid kyo" da:.

²⁰David gi phyang" gung mo to' lho: gung cid"- xam: kyo'- byimi thid void- koid bye:. Hau: thang: nyang: gi ASEING da" yhoem: khyoo: yhe: wigi noku yhe: ku bye:. Nyang: khokham vang" khyoo: doem tau" lo" wigi zooshug lo mho' lho: bain soin' byid: yo' dage" zoo: bye: da:.

²¹Nya: gyizoug: yigi nyang: ri «He: moo" zoo" ngoonu" ase' gyoo: nghoid da:. Zooshang: kangso' dei nyid shi" uri gi zooshang: shid re" nang ngau da:- zooshug we' azoo: nghoid da:- nghoid loug we' nyang: shid: yo' dage" nang to' wigi zooshug we' zo: abye: da» ga: tid.

²²David gi «Nghoid nyang: kangso' dei nyid shi" uri ngoo zooshug zeing: wigi ngau pyam bye:. Houg: lang" ASEING gi ngoo ri nheig khyeug wigi zooshang: ri ashid: nhang: abe ein: myid zi nghoid.

²³Nghoid loug we' akhid" gi nyang: shid: byug bye: yoomo ngoo ciwim wigi zooshug zeing: wa lha". Zooshang: da" kangso' ri doem yo" tau" yu wa lha". Danyid" nyid" ri koem' gi nyang: nyid joyoo khyoo: ngoo loo" wa zi nghoid. Nghoid loug we' nyang: koem gi nga" jhang khyoo: khanham we' tau" loo loo: wa zi anghoid» ga: tid da:.

²⁴Hau: thang: David gi nya: yhoem: seing: myhi' Bathsheba ri nheig teing yoem: byid: wigi gung shoo" zoem" khau: lho: yuggi nu" dayug khu: byid: ziyo' hau: zooshang: ri David gi Sholumon ga: myheing byid: bye:. ASEING we' zooshang: ri jheddab ziyo'

²⁵lapi: Nathan ri amyeing" byid: lho: ASEING we' zooshang: ri jheddab nyid yoomo zooshang: hau: ziri Jedidi ga: myheing byid: bye:.

²⁶Akhid" Yoab gi Amon voomoo" mo Raba voomoo" ri xo' khaid zain: wigi hau: voogung ri meing: zain: oung: wa ziza: danghoid lo: da:.

²⁷Nyang: gi David jhang khyoo: lagyoo: joem ri nhang: kaid wigi «Raba voogung ri ngoo zain: lho: voomoo" ri gyid byid: da" gyid thung" ri yo" yu too" bye:.

²⁸Akhid" deing nyid shi" da" gyizoo: yiri zheing" yu wigi gyi zain: lho: nang nyang: hau: ziri seing: yu we'. Hau: voomoo" ri ngoo doem zain: oung: wigi langi: anau koid» ga: pyeung: kaid.

²⁹Hougsu" nghoid yoomo David gi nya: gyizoo: yiri zheing" yu wigi Raba voomoo" khyoo: yhe: lho: hau: voo ri yhe: zain: wigi meing: zain: oung: bye: zi nghoid.

³⁰David gi yu lo da" Amon yu phara" Moleg soolhoo: vhuloem mo sheing: yo' koid to" wigi 18 joid: jain" lid: da" bidmug ri yu lo da:- hau: jang" moo phoug" dab da" lug nyoug we' bo da:. David gi phoug" dab da" lug nyoug ri we' yu lo lho: nya: bidmug moo nyang: hau: ziri kaid to" da:. Nyang: gi hau: voomoo" mo jonu" ri we' myoo: sho' yu lo da:.

³¹Voobyu yiri seig sheig joem joto' khoebmoo" joem joto' voozung: joem ri moo" zei: wa shid re" byid: lho: nyangnu" ri zhoothung" phoid da" moo" zoo" ri akoid atho' zei: nhang: bye: da:. Gootu: Amon voo joem dangain" moo nyid da" byu yiri we' houg yhang: ti" koid nhang: bye: zi nghoid. Hau: thang: nyang: yo' nya: byu yi Yerusalem khyoo: doem tau" loo" bye: da:.