Read Lashi 2 SAMUELA 15 Bible Online

2 SAMUELA 15 - Lashi bible

2 SAMUELA 15

¹Hau: thang: Absalom gi nya: shid re" gyi myang: rheing" da loem: yo' myang: joem ri soin' to" wigi shid moo so" wa shid re" byu wim: xi yug ri we' khyen: too" bye:.

²Nyang: gi no' to' lho: voomoo" vang khyam: khoem" duang: khyoo: moo yhe: yab jo, da:. Kha" ayo, nghoid loug we' dayug yug mo, byo, bo wigi khokham yo' phyen: goo" wa shid re" ri" lang" Absalom gi nyang: ri khe: yu lho: khamo nghoid ga: myid: bye:. Hau: thang: hau: yug gi kha: akung: mo nghoid ziri tid lang".

³Absalom gi «Yu" we' tarha" gi re" shid khyoo: nghoid nyid da:. Nghoid loug we' re" moo" zoo" ri tam" gyoo: byid: wa da" khokham ri aya: byid: to" zi hang" anyid nghoid da» ga: tid.

⁴Nyang: xo' lho: «Ngoo tarha" agyi nghoid ri khayhi' gi wa houg yhang: te" mo, byo, bo da" byu dayug yug nga" jang" mo geing: teing ziyo' mho' yoid ri" lang" lang" nya: shid re" deingmain" khyoo: ri ngoo byid: wa zi nghoid» ga: tid.

⁵Hau: su: Absalom jhang tain" re" lho: nya: shidkhoin" moo re" goeb pid lang" Absalom gi nyang: ri vu, to' yu wigi zei: zeing lho: babug bug bye:.

⁶Deingmain" da" moo" zoo" shid re" khokham jhang re" da" Israela byumyu" dangain" ri Absalom hougsu" lhoem: koid yoomo nyangnu" da" myid veing" dang: gyo: khyoo: ri yo" yu bye:.

⁷Myid: zain myang" thang: ri Absalom gi khokham ri ASEING jhang ngoo to" da" dangsoo" khoin" ri yo" cang pyeing baja". Hebron voomoo" khyoo: ngoo ri yhi: nhang: we'.

⁸Suri mung" Geshuri voogung moo ngoo nyid ayo, ri Yerusalem voogung khyoo: doem shu" lo nghoid rigi Hebron voogung moo ngoo nang ri noku wa ein: ASEING ri dang: soo" byid: too" bye:» ga: tid.

⁹Khokham gi «Yug yoo tung" yhi: we'» ga: tid. Absalom we' Hebron khyoo: yhe: loo" bye:.

¹⁰Nghoid loug we' nyang: gi Israela akung: ako' dangain" bang: jhang khyoo: lagyoo: nhang: kaid wigi laboo" thui: ri shoug" gyoo: lang" «Absalom gi Hebron voogung moo khokham bue" nyid bye: o" ein: nyho: ge'» ga: tid nhang: bye:.

¹¹Absalom khe: to" da" byu eig shoo: yug we' nyang: yo' dage" Yerusalem mo thu lo boem. Nyangnu" gi mhau' zo: ziri asi' yoomo dangain" gi ge da" loem jeing" myid yo' cang lo boem ago".

¹²Khokham David da" phajhi" boo dayug nghoid da" Ahithophela gi Gilo voogung moo xoin" ngei" byid: nyid ri Absalom khe: yu bye:. Khokham ri goemlu gyi koid zigi yoem: gyi: re" wigi Absalom jang" moo cang bang: je myo: lug lo da:.

¹³Lu dang: fu" su: dayug gi «David ri Israela byumyu" yigi Absalom jhang dang: zung" ziyo' nheig dab lo" boem bye:» ga: tid.

¹⁴Houg: yoomo David gi nyang: yo' dage" Yerusalem moo nyid da" nya: gyizoug: yi dangain" ri nyhang" Absalom lo, mo loid byoin nau nghoid rigi akhid" nyang: myab myab phang: loo: shang- hougsu" anghoid rigi nyang: hid: moo amyang" ri ju" re" wigi nyhang" ri re" zain: oung: lho: he: voomoo" mo byu dangain" ri said pyam wa zi nghoid» ga: tid.

¹⁵Nyangnu" gi «Nghoid bye:- aseing: khokham we" nang tid ziyo' dayhang: ti" ngoonu" cang koid wa zi jen" jen" nghoid bye:» ga: tid boem.

¹⁶Houg: yoomo khokham phoo gi khokham vang" zung" wa shid re" dangcang: daxi: ri too" kho' jang" mo lid- nya: ikoin deungkhu: byu yi yo' nya: gyizoug: yi dangain" yo' thu lo" boem bye:.

¹⁷Khokham phoo yo' nya: byu yi dangain" voomoo" mo thu lo" nyid ri lo" thang da" yhoem: moo nyangnu" theing: yu boem ago".

¹⁸Nya: gyizoug: yi dangain" nya: thang: moo no: nyid ri dang: zung" da" kangso' zung" su: nya: shidkhoin" khyoo: cang re" da" Gad voomoo" mo gyizoo: khyug shoo: we' lid lo" ri.

¹⁹Khokham gi nyangnu" vhujhung: Itai ri «Ciwim yoomo nang ngoonu" yo' dage" cang re" lha"- doem tau" lo" lho: khokham seig yo' lo" nyid we'. Nang gi nanya: mung" pyam too" kho' phang: yen" da" tungbau dayug danghoid.

²⁰Nang hid: moo nyid zi daso' shi" danghoid ri ciwim yoomo ngoo yo' dage" nang ri ngoo phang: yen" nhang: wa lha". Ngoo khakhyoo: yhe: lo" zi nyang" ngoo asi'. Nang yo' dage" re" moug: mo yuggi yiri shu" lho: tau" loo" loo ge'. ASEING gi nanu" ri nheig myen: ziyo' lhoug zung" nyid baja" o"» ga: tid.

²¹Nghoid loug we' Itai gi «Aseing: khokham we"- ngoo gi nang khakhyoo: loo" loo"- shid: gyoin noo gyoin shoug" shoug" nang yo' dage" khanham we' cang yen" wa ein: ASEING myeing moo ngoo nang ri dang: theing nheung" too" bye: zi nghoid» ga: tid.

²²David gi «Gi bye:- yhe: loo" loo: ge'» ga: tid. Houg: yoomo Itai gi nya: byu yi dangain" we' nyangnu" ri khougnge: nyid bang: yo' dage" xo' yhe: loo" bye:.

²³David jhang cang bang: thu lo" uri byu yigi thui: zeing yo' cang ngau boem. Khokham gi Kidron gyid lang moo lid yhe: loo" lang" nya: byu yi we' cang dab lo wigi nyangnu" dage" dain" pyoid yoo khyoo: yhe: lo" boem bye:.

²⁴Khainjung Zadog gi gyeung" shang: da" Dang: Theing Kuid: vu, ci: da" Levi byu yi yo' houg: moo dage" nyid nyid da:. Nyangnu" gi hau: ziri khyo' to" wigi byu yi voomoo" mo abain thu thu gi aphang yu" nghoid da:. Khainjung Abiatha we' hougmoo: nyid da:.

²⁵Hau: thang: khokham gi Zadog ri «Dang: Theing Kuid: voogung khyoo: doem yu loo" we'. ASEING gi ngoo ri myid dab nghoid rigi hau: zi jo, da" joyoo mo hau: ziri shau" myang wa shid re" danyid" nyid" ri doem loo nhang: wa zi nghoid.

²⁶Nghoid loug we' nyang: ngoo ri myid adab loo: nghoid- ci: aca"- nyang: myid vho: khyo" koid baja"» ga: tid.

²⁷Nyang: gi Zadog ri doem tid zigi «Yu" we' re" zoo: Ahima yo' Abiatha nya: zoo: Yonathan ri shu" wigi voomoo" khyoo: yug yoo tung" doem tau" loo" we'.

²⁸Akhid" ngoo re" jang" mo lu dang: shoug" gyoo da" ayo, ju" sho' gyid lang thu: tab dain" pyoid yoo moo lang" nyid lang" wa» ga: tid.

²⁹Hougsu" yoomo Zadog yo' Abiatha tang: gi Dang: Theing Kuid: ri Yerusalem moo doem lo" too" bye:.

³⁰David gi kougshu: da" alhoo: khyo" wigi nya: vhuloem moo nghoeb lho: khyid: baid khyoid ci: ziyo' ngau wigi zhainloin: boem khyoo: do, loo" bye:. Nya: thang: cang bang: dangain" we' vhuloem moo nghoeb ziyo' ngau lho: cang do, loo" bye:.

³¹Ahithophela gi Absalom da" gyivoo phung: khyoo: vang loo" bye: ga: ziri David shoug" gyoo: lang" nyang: gi «Jeju" mo ASEING we"- Ahithophela da" phajhi" byid: dang: ri dang: kang: aboo wa khyo" thid byid: we' o"» ga: akyu" mho' nyid da:.

³²David gi boem gung noku jang: moo ju" uri Arkhi mo nya: loem ge" byencang" Hushai we' byimi ri lang: ceig- vhuloem moo myidzhoo" geig goin: wigi nyang: ri re" shoug" bye:.

³³David nyang: ri «Nang ngoo yo' dage" nghoid nyid zigi nang ngoo ri ciwe' yo" bo pang" zi anghoid.

³⁴Nghoid loug we' nang voomoo" khyoo: tau" lo" wigi nya: phoo ri nang dei byid: yhang: ti" nyang: ri we' dang: zung" ziyo' dei byid: wa khyoo: Absalom ri tid kyo" khyo" wigi nang ngoo ri yo" pang" byid: wa zi nghoid. Xo' wigi Ahithophela byid: da" phajhi" dang: dayham" ri yo" toem' byid: wa zi nghoid.

³⁵Houg moo khainjung Zadog yo' Abiatha tang: we' nyid lang" wa zi nghoid wigi khokham vang" moo shau" gyo: gu: dangain" nya: tang: ri tid kyoo" ca" wa zi nghoid.

³⁶Nya: tang: jang" moo nya: zoo: tang: nghoid da" Ahimaza yo' Yonathan tang: we' nyid nyid yoomo nang shoug" zheing" da" lu dang: joem yo' dage" nya: tang: ri nga" jhang khyoo: nhang: kaid byid: ca" wa zi nghoid» ein: tid we'.

³⁷Houg: yoomo David byencang" Hushai Yerusalem voomoo" khyoo: tau" ju" lo" ri Absalom we' ju" lo nyid.